ទាន់កូននៅក្មេង ត្រូវចេះពត់គំនិតពួកគេឲ្យបានល្អ តាមវិធី៥យ៉ាងនេះ
- 2019-04-12 09:00:00
- ចំនួនមតិ 0 | ចំនួនចែករំលែក 0
ទាន់កូននៅក្មេង ត្រូវចេះពត់គំនិតពួកគេឲ្យបានល្អ តាមវិធី៥យ៉ាងនេះ
ការបង្ហាត់បង្រៀន ប្រៀនប្រដៅកូនៗ ឲ្យបានទាន់ពេលវេលា ជារឿងដែលឪពុកម្តាយគ្រប់រូបគួរដឹង។ ពេលកូនៗនៅវ័យក្មេង ប្រៀបបាននឹងក្រដាស សទទេស្អាត ដូច្នេះឪពុកម្តាយគឺជាអ្នកពត់បត់បែន និងអាចជួយបណ្តុះគំនិតពួកគេឲ្យល្អប្រសើរ តាំងពីតូចក្រូចឆ្មា ដោយវិធី៥យ៉ាងខាងក្រោមនេះ៖
១. របស់លេងកាន់តែតិច ក្មេងកាន់តែឆ្លាត
ទោះបីជាសម្បូរលុយច្រើនយ៉ាងណាក៏ដោយ ត្រូវចាំថាមិនគួរទិញរបស់លេងឲ្យកូនច្រើនពេកទេ។
មូលហេតុអ្វីបានជារបស់របរលេងច្រើនពេល បែរជាមិនល្អដល់ការអភិវឌ្ឍខួរក្បាលរបស់កូនទៅវិញ? ដោយសារមានចំនួនច្រើននេះហើយ ធ្វើឲ្យពួកគេ កាន់នេះបន្តិចនោះបន្តិច ភ្នែកសម្លឹងមើលរបស់ច្រើន មិនអាចផ្តោតសំខាន់និងស្វែងយល់ឲ្យបានច្បាស់ពីរបស់ជាក់លាក់ណាមួយ។ ពេលដែលក្មេង មិនចាប់អារម្មណ៍៍ចង់ដឹងពីរបស់អ្វីមួយហើយ ពួកគេលេងវាតិចជាង៣នាទី នឹងប្រលែងចោល ហើយនេះគឺជាទម្លាប់អាក្រក់មួយផងដែរ។
របស់លេងកាន់តែតិច ខួរក្បាលក្មេងមានការវិវត្តកាន់តែច្រើន។ ពួកគេនឹងចាប់កាន់វា លេងដោយយកចិត្តទុកដាក់ និងស្រលាញ់កាន់តែខ្លាំង។ គ្រប់ប្រដាប់ប្រដាលេង ដែលបញ្ជាខួរក្បាលក្មេងឲ្យគិត រុករក និងឆ្ងល់ អាចជួយឲ្យពួកគេកាន់តែឆ្លាតជាងមុន។
២. បង្រៀនឲ្យពួកគេញ៉ាំអាហារដោយខ្លួនឯង
ក្មេងដែលអាចញ៉ាំអាហារដោយខ្លួនឯង គឺជារឿងធម្មតា ប៉ុន្តែវាក៏ជាវិធីមួយ ដើម្បីហ្វឹកហាត់ឲ្យពួកគេមានទម្លាប់និងអាកប្បកិរិយាល្អក្នុងជីវិតផងដែរ។ ឪពុកម្តាយដែលចូលចិត្តបញ្ចុកកូនរាល់ថ្ងៃ ធ្វើឲ្យពួកគេទម្រើស និងកាន់តែមិនចង់ញ៉ាំ។
៣. ឲ្យកូនគេងឲ្យបានគ្រប់គ្រាន់
អ្នកម្តាយភាគច្រើនតែងគិតថា បើគេងបានគ្រប់គ្រាន់ មិនចាំបាច់ចូលគេងទៀងម៉ោងក៏បានដែរ ដូច្នេះហើយពេលខ្លះទម្លាប់បំបៅកូនពេលយប់ ឬបណ្តោយឲ្យពួកគេលេងដល់យប់ជ្រៅជាដើម។ ប៉ុន្តែនេះក៏ជាកំហុសមួយដែរ។ ក្មេងតូចៗដែលគេងបានគ្រប់គ្រាន់ទៀងពេល នឹងមានសុខភាពល្អ អារម្មណ៍ស្រស់ស្រាយ ថែមទាំងធ្វើឲ្យខួរក្បាលមានការវិវត្ត បានយ៉ាងល្អក្នុងអំឡុងពេលគេង។
៤. បណ្តោយឲ្យកូនប្រឈមនឹងឧបសគ្គ
ពេលឃើញកូនឈឺ ឬត្រូវរបួសតិចតួចក្តី អ្នកតែងបារម្ភពីពួកគេខ្លាំង។ យ៉ាងណាមិញ អ្នកមិនបាច់ភ័យពេកទេ ហើយបណ្តោយឲ្យពូកគេឈឺជាមួយរបួសខ្លះទៅ ដើម្បីឲ្យពួកគេចេះប្រឈមជាមួយភាពលំបាកដែលកើតឡើង។ បើមានរឿងអីតិចតួច ម្តាយឪពុកចេញមុខរ៉ាប់រងទាំងអស់នោះ ចុះពេលធំឡើង ធ្វើម៉េចពួកគេអាចមានជំហរដោះស្រាយបញ្ហាផ្សេងៗក្នុងជីវិតបានដោយខ្លួនឯង?
៥. យកកូនទៅដើរលេង ឲ្យស្គាល់ពិភពខាងក្រៅ
ពេលដែលអ្នកបាននាំកូនចេញដើរលេងនៅខាងក្រៅច្រើន អាចឲ្យកូនជួបរឿងរ៉ាវថ្មីប្លែកៗ បង្កើនសមត្ថភាពនិងចំណេះដឹងរបស់ពួកគេទ្វេដង។ ឪ់ពុកម្តាយមួយចំនួនវិញគិតថា កូនដែលក្រោមអាយុ៣ឆ្នាំ មិនអាចចាំអ្វីបានទេ នាំដើរលេងច្រើននាំតែខាតលុយនិងពេលវេលា នេះគឺជាការគិតខុស។
ក្មេងដែលបានជួបពិសោធន៍ថ្មីៗ ឃើញអ្វីៗដោយភ្នែករបស់ពួកគេផ្ទាល់ រូបភាពរួមទាំងសំឡេង នឹងដក់ជាប់ផ្នែកណាមួយនៃខួរក្បាល ដែលអាចក្លាយជាប្រយោជន៍ទៅថ្ងៃមុខ។
ចុចអានបន្ត៖