គួរបន្តឬលាឈប់ពីកន្លែងការងារ បើអ្នកបានប្រាក់ខែទាំងមិនពេញចិត្ត?
- 2019-04-11 10:00:00
- ចំនួនមតិ 0 | ចំនួនចែករំលែក 0
គួរបន្តឬលាឈប់ពីកន្លែងការងារ បើអ្នកបានប្រាក់ខែទាំងមិនពេញចិត្ត?
ដោយសារតែ កាលពីប៉ុន្មាន២-៣ឆ្នាំមុន ក្រុមហ៊ុនល្បីគួរសម ដែលអ្នកកំពុងតែធ្វើការឲ្យសព្វថ្ងៃ បានប្រកាសក្តែងៗដើម្បីស្វែងរកបុគ្គលិក ដូច្នេះហើយប្រហែលជាអ្នកសម្រេចចិត្តដាក់ពាក្យ ដោយមិនបានពិចារណា ថាតើការងារនោះជាចំណង់ចំណូលចិត្តរបស់ខ្លួនដែរឬទេ? ពេលធ្វើបានយូរបន្តិច អ្នកចាប់ផ្តើមមានអារម្មណ៍នឿយណាយ ស្តាយក្រោយនឹងការសម្រេចចិត្តមួយនេះ។
លោក Steve Jobs ដែលជាពាណិជ្ជករ និងជាម្ចាស់ក្រុមហ៊ុន Apple ដ៏ល្បីនៅសហរដ្ឋអាមេរិក បាននិយាយក្នុងកិច្ចបើកកម្មវិធី នៃសកលវិទ្យាល័យ Standford ថា "ពេលវេលារបស់មនុស្សយើងមានកំណត់ ដូច្នេះកុំខ្ជះខ្ជាយវាធ្វើអ្វីដែលខ្លួនឯងមិនពេញចិត្ត” "កុំឲ្យទឹកមាត់អ្នកដទៃមកពន្លិចក្តីស្រមៃរបស់អ្នក"។
បើប្រៀបធៀបក្តីសុបិនរបស់អ្នកកាលនៅអាយុ ១០ឆ្នាំ ជាមួយនឹងឥលូវនេះវិញ មានភាពខុសគ្នាដូចមេឃនិងដី ព្រោះតែកត្តាក្នុងសង្គម បានធ្វើឲ្យគំនិតអ្នកផ្លាស់ប្តូរ។ ពេលជ្រើសរើសការងារអ្វីមួយ ដើម្បីចិញ្ចឹមជីវិត កុំគិតរំពឹងតែលើប្រាក់ខែមួយមុខ។ ត្រូវចោទសំណួរពីរសំខាន់ៗ ទៅខ្លួនឯងថា តើវាជាការងារដែលអ្នកស្រលាញ់ពិតប្រាកដដែរទេ? តើវាផ្តល់ឱកាសល្អ សម្រាប់ពេលអនាគតដែរទេ?
ពេលអ្នកមានអារម្មណ៍ថា ការងារដែលកំពុងធ្វើសព្វថ្ងៃ មិនអាចជួយអភិវឌ្ឍអ្វីបានទេ អាចជ្រើសរើសផ្លូវថ្មីដើម្បីបំពេញបំណងដែលអ្នកចង់បានប្រសើរជាង។ ពេលខ្លះ ទោះបីជាអ្នកធ្វើការល្អប៉ុណ្ណាប៉ុន្តែអ្នកគ្មានចិត្តសប្បាយរីករាយនឹងលទ្ធផលដែលទទួលបានឡើយ។ សបញ្ជាក់ច្បាស់ថា អ្នកកំពុងតែធ្វើការដែលផ្ទុយពីឧត្តមគតិរបស់ខ្លួនឯង។
ត្រូវចេះវិភាគ និងវាយតម្លៃពីស្ថានភាពបច្ចុប្បន្ន
មិនថាអ្នកមានឬអ្នកក្រ ជីវិតតែងតែដើរទៅដល់ចំណុចមួយ ដែលនាំអ្នកកើតទុក្ខ បាក់ទឹកចិត្ត ដោយសារមូលហេតុផ្សេងៗគ្នា។ បើជួបរឿងបែបនេះមែន អ្នកគួរឈប់សម្រាកបន្តិចសិន រហូតដល់អាចគិតបានច្បាស់លាស់ហើយ យកប៊ិចនិងសៀវភៅ រាយឈ្មោះការងារដែលអ្នកចូលចិត្ត ហើយជ្រើសយកមួយដែលស្រលាញ់បំផុតសមនឹងសមត្ថភាព អ្នកអាចគោរពតាមការសម្រេចចិត្តលើកនេះហើយ មិនបាច់រារែកទៀតទេ។
រៀនទទួលស្គាល់ខ្លួនឯង និងគិតឲ្យបានធំ នេះប្រហែលជាផ្នែកមួយដែលពិបាកធ្វើបន្តិចហើយ ប៉ុន្តែត្រូវចេះទទួលស្គាល់ថា កាលពីមុនអ្នកបានសាងកំហុសក្នុងការសម្រេចចិត្តម្តងរួចទៅហើយ ដូច្នេះការសម្រេចចិត្តលើកទីពីរ អ្នកគួរមានទំនួលខុសត្រូវ ត្រៀមខ្លួនរួចរាល់ក្នុងការទទួលយក សម្ពាធព្រមទាំងហានិភ័យផ្សេងៗដែលមិនអាចទាយដឹងមុន។ ដើរលើផ្លូវដែលអ្នកមិនពេញចិត្ត ចង់ផ្លាស់ប្តូរក៏មិនទាស់ខុសអីដែរ។ បើនៅទ្រាំធ្វើដោយបង្ខំចិត្តដដែល លុយរកបានច្រើនប៉ុណ្ណា វាគ្មានតម្លៃនិងមិនអាចយកមកព្យាបាលទុក្ខសោកសៅសម្ពាធក្នុងចិត្តបានឡើយ។ ចូរធ្វើឲ្យការខិតខំប្រឹងប្រែងនិងភាពជោគជ័យ សមនឹងអ្វីដែលអ្នកប្រាថ្នាក្នុងជីវិត ទើបមិនស្តាយក្រោយ៕
ចុចអានបន្ត៖