ស្រីៗមានម្ដាយក្មេកប្រភេទនេះ សំណាងជាងរើសបានមាស ១០ គីឡូទៀត

2019-04-12 01:30:00
ចំនួនមតិ 0 | ចំនួនចែករំលែក 0

ពាក្យចាស់និយាយថា «នារីណាបានប្ដីល្អគឺហៅថាមានសំណាង តែបើមានម្ដាយឪពុកក្មេកល្អទៀតនោះហៅថាជាតិមុននាងធ្វើបុណ្យដល់ហើយ»។ មិនថាតាំងពីបុរាណ ឬក្នុងសង្គមសម័យថ្មីទេ រឿងចម្រូងចម្រាស់រវាងម្ដាយក្មេកនិងកូនប្រសាស្រីនៅតែជាប្រធានបទក្ដៅសម្រាប់គូស្វាមីប្ដីប្រពន្ធ។ ឲ្យតែរៀបការហើយបើសិនជាប្ដីប្រពន្ធរស់នៅផ្ទះខាងប្ដីមិនយូរមិនឆាប់រឿងក្ដៅក្រហាយនឹងមកបណ្ដាក់គ្នារាល់ថ្ងៃ ប៉ុន្តែបើសិនជាម្ដាយក្មេករបស់អ្នកជាមនុស្សប្រភេទនេះអ្នកពិតជាមនុស្សសំណាងរកលេខដាក់គ្មានទេ។

គាត់គោរពសេរីភាពរបស់អ្នក

ម្ដាយក្មេកដ៏ល្អម្នាក់គឺគាត់តែងតែគោរពសេរីភាពរបស់អ្នក។ គាត់នឹងមិនចូលផ្ទះឬបន្ទប់របស់អ្នកពេលអ្នកមិននៅទេ ព្រោះគាត់មិនចង់ឲ្យអ្នកមានអារម្មណ៍មិនល្អចំពោះគាត់។

គាត់ចាំថ្ងៃពិសេសរបស់អ្នក

បើសិនជាម្ដាយក្មេកឲ្យកាដូខ្សែដៃដល់អ្នកក្នុងថ្ងៃកំណើតរបស់អ្នក ទោះបីវាមិនមានជារបស់ដែលអ្នកចូលចិត្ត ប៉ុន្តែវាបានបង្ហាញថាគាត់ស្រលាញ់អ្នក ហើយចង់ចាំថ្ងៃពិសេសរបស់អ្នក។ ត្រូវតែពេញចិត្តនូវអ្វីដែលគាត់បានឲ្យ។

មិនហៅអ្នកឲ្យក្រោកនៅពេលព្រឹក

ប្ដីប្រពន្ធភាគច្រើនតែងតែក្រោករៀងយឺតបន្តិចនៅថ្ងៃឈប់សម្រាក ហើយម្ដាយក្មេកដែលយល់ដឹងនឹងមិនទៅស្រែកហៅ ឬ Call ទៅប្ដីរបស់អ្នកហើយប្រាប់ឲ្យក្រោកនោះទេ។ គាត់នឹងរង់ចាំមើលរហូតដល់ម៉ោង ១០ ឬមុនពេលញ៉ាំអាហារថ្ងៃត្រង់នៅថ្ងៃចុងសប្ដាហ៍។

គាត់ដឹងពីរបៀបរស់នៅរបស់អ្នក

ម្នាក់ៗតែងតែរបៀបរស់នៅខុសៗគ្នា។ម្ដាយក្មេកដែលត្រឹមត្រូវមួយរូបតែងតែផ្ដោតអារម្មណ៍និងដឹងពីទម្លាប់រស់នៅប្រចាំថ្ងៃដូចជា របៀបចម្អិន របៀបសម្អាតផ្ទះ និងលាងចានឆ្នាំងជាដើម និងមិនធ្វើឲ្យផ្ទះបាយរញ៉េរញ៉ៃទេពេលអ្នកមិននៅផ្ទះ។

គាត់ជាអ្នកពូកែមើលថែក្មេង

រឿងដែលកូនប្រសាស្រីតែងតែសរសើរម្ដាយក្មេកខ្លួនឯងនោះគឺគាត់ជាមនុស្សដែលពូកែមើលថែនិងស្រលាញ់ចៅបង្កើតខ្លួនឯង។ ម្ដាយក្មេកល្អតែងតែជួយមើលថែកូនៗរបស់អ្នកពេលដែលអ្នករវល់ធ្វើការ ព្រោះក្មេងៗត្រូវចំណាយពេលច្រើនដើម្បីមើលថែពួកគេ។

គាត់មិនប្រៀបធៀបអ្នកជាមួយនឹងកូនស្រីបង្កើត ឬកូនប្រសាស្រីផ្សេងទៀត

អ្នកប្រហែលជាជួបការប៉ះទង្គិចគ្នាតិចតួចពេលដែលរស់នៅជាមួយបងឬប្អូនថ្លៃស្រី ក៏ប៉ុន្តែម្ដាយក្មេកដែលមានភាពយុត្តិធម៌នឹងមិនយកអ្នកទៅប្រៀបធៀបជាមួយកូនរបស់គាត់ទេ។ គាត់នឹងស្ដាប់អ្នក ហើយមើលលើភាពជាក់ស្ដែង ទោះបីជាគាត់ទទួលយកការពិតមិនបានក៏ដោយ។

គាត់យល់ថាអ្នកក៏ជាម្ដាយគេដែរ

គាត់ដឹងថាអ្នកក៏ជាម្ដាយម្នាក់ដែរ ហើយអ្នកដឹងថាអ្នករវល់ខ្លាំងជាមួយការងារនៅកន្លែងធ្វើការផង និងនៅផ្ទះទៀត។ ម្ដាយក្មេកចិត្តព្រះនឹងយោគយល់ហើយអាណិតអ្នក។

គាត់តែងតែគាំទ្រអ្នក

ជឿឬមិនជឿ តែបើសិនជាអ្នកសាកល្បង អ្នកនឹងដឹងថាម្ដាយក្មេកល្អតែងតែជួយអ្នកប្រឆាំងនឹងកូនប្រុសរបស់គាត់។ គាត់នឹងវិភាគរកខុសត្រូវ ហើយនឹងកែតម្រូវអ្នកនិងប្ដីរបស់អ្នក៕

ចុចអាន៖

ប្រភព៖ emdep ប្រែសម្រួល៖ ឃួន សុលីកា