៦វិធីជួយឱ្យអ្នកញ៉ាំទឹកបានច្រើនជាងធម្មតា ដើម្បីរាងកាយមានសុខភាពល្អ

2019-04-03 03:28:18
ចំនួនមតិ 0 | ចំនួនចែករំលែក 0

គ្រប់សុទ្ធតែដឹងថា ការផឹកទឹកមិនបានគ្រប់គ្រាន់នឹងធ្វើឱ្យរាងកាយបាត់បង់ថាមពល ស្លេកស្លាំង ឬងាយនឹងឈឺនេះឈឺនោះ ប៉ុន្តែក៏មានមនុស្សច្រើនណាស់ដែរដែលមិនបានអនុវត្តការផឹកទឹកឱ្យបានច្រើន ដោយសាររវល់ការងារជាដើម។

ម្យ៉ាងទៀត ដោយហេតុផលថា ការផឹកទឹកច្រើននាំឱ្យនោមក៏ច្រើន ដែលអាចរំខានដល់ការធ្វើការ ទើបពួកគេមិនសូវចូលចិត្តផឹកទឹក ជាពិសេសនៅកន្លែងធ្វើការ។ ថ្ងៃនេះ កញ្ញាមានវិធីសាស្ត្រងាយៗដែលអាចជួយឱ្យគ្នាយើងញ៉ាំទឹកបានច្រើន និងរក្សាបានសុខភាពល្អ។

ចុចអាន៖ សញ្ញាសុខភាព១០យ៉ាង បញ្ជាក់ថាអ្នកផឹកទឹកមិនគ្រប់តាមរាងកាយត្រូវការ

១. ញ៉ាំទឹកនៅដើម និងចុងម៉ោងធ្វើការ

សម្រាប់អ្នករវល់ការងារច្រើន ឬមិនចង់ងើបទៅបន្ទប់ទឹកញឹក អាចជ្រើសវិធីញ៉ាំផឹកនៅដើមម៉ោងធ្វើការ២-៣កែវ និងចុងម៉ោង២-៣កែវទៀត។ បែបនេះនឹងមិនធ្វើឱ្យរាងកាយយើងបាត់បង់ជាតិទឹក ទោះរវល់ការងារយ៉ាងណាក៏ដោយ។

២. ញ៉ាំទឹកមួយកែវបន្ទាប់ពីកាហ្វេ

ជឿអត់? អ្នកខ្លះអត់សូវញ៉ាំទឹក តែកាហ្វេមួយថ្ងៃលើសពី២កែវផងក៏មាន។ ដូច្នេះសម្រាប់អ្នកដែលចូលចិត្តកាហ្វេ គួរញ៉ាំទឹកមួយកែវៗក្រោយអស់កាហ្វេម្ដងៗ ដើម្បីរក្សាជាតិទឹកក្នុងខ្លួនឱ្យមានតុល្យភាព និងលាងសម្អាតជាតិកាហ្វេអ៊ីនពីក្នុងរាងកាយបានផង។

ចុចអាន៖ ត្រឹម១ម៉ោង បន្ទាប់ពីផឹកភេសជ្ជៈទាំងនេះ រាងកាយនឹងរងផលប៉ះពាល់ជាច្រើន

៣. ញ៉ាំអាហារហឹរ

ការញ៉ាំអាហារហឹរនឹងជួយបង្កើនការញ៉ាំទឹកលើសពីរាល់ដង។ ប៉ុន្តែត្រូវប្រាកដថា អ្នកគ្មានជំងឺក្រពះ ឬពោះវៀនដែលអាចធ្វើទុក្ខ ពេលញ៉ាំអាហារហឹរចូលទៅ។

៤. ប្រើទុយោបឺតទឹក

មនុស្សភាគច្រើនអាចនឹងផឹកទឹកច្រើនជាងធម្មតា ដោយការប្រើទុយោជំនួសឱ្យការញ៉ាំទឹកពីដបផ្ទាល់។ គួរប្រើទុយោដែលជាអ៊ីណុកមិនចេះច្រែះ ឬទុយោធ្វើពីឫស្សី ឬស្លឹកគ្រៃដើម្បីកាត់បន្ថយការបំពុលបរិស្ថាន និងការឡើងកម្ដៅផែនដី។

៥. ប្រើកម្មវិធីទូរសព្ទជាជំនួយ

កម្មវិធីទូរសព្ទជាច្រើនដូចជា Gulps អាចជួយអ្នកឱ្យផឹកទឹកបានច្រើនដោយមានជាការរម្លឹកអ្នកពីក្នុងទូរសព្ទមកទាក់ទងនឹងចំណុះទឹកដែលអ្នកត្រូវញ៉ាំក្នុងមួយថ្ងៃៗ។ វាស្រួលម្យ៉ាង បើពេលអ្នករវល់ការងារខ្លាំងមិនបាននឹកឃើញដល់ការញ៉ាំទឹក App ទាំងនោះអាចជួយអ្នកបាន។

៦. ដាក់ផែនការសុខភាពសម្រាប់ខ្លួនឯង

អ្នកខ្លះទាល់តែដាក់ផែនការសម្រកទម្ងន់ ទើបអាចស្រកបាន។ អ្នកញ៉ាំទឹកដ៏ដូចគ្នា ទាល់តែដាក់កំណត់ខ្លួនឯង ឬមានអ្នកណាម្នាក់ជាហេតុផលនៃការតាំងចិត្តនេះ ទើបអាចសម្រេចលទ្ធផលបានលឿន។ បើអ្នកជាមនុស្សពូកែភ្លេច ឬមិនសូវចូលចិត្តទឹក គួរដាក់កំណត់ខ្លួនឯងទាក់ទងនឹងរឿងសុខភាពនេះដោយកំណត់ចំនួនកែវទឹកដែលត្រូវផឹក និងតាមដានសុខភាពរាល់ពេល១អាទិត្យម្ដង ដើម្បីដឹងពីភាពខុសប្លែក៕

ប្រភព៖ huffpost

ប្រែសម្រួល៖ សរ សុគន្ធី