ពាក្យ ៥ ឃ្លាដាច់ខាតកុំនិយាយទៅកាន់ឪពុកម្ដាយឲ្យសោះ ទោះជ្រុលមាត់ក៏ដោយ
- 2019-03-25 02:42:35
- ចំនួនមតិ 0 | ចំនួនចែករំលែក 0
ពាក្យ ៥ ឃ្លាដាច់ខាតកុំនិយាយទៅកាន់ឪពុកម្ដាយឲ្យសោះ ទោះជ្រុលមាត់ក៏ដោយ
ប្រសិនបើធ្លាប់និយាយពាក្យទាំងនេះដាក់អ្នកមានគុណ អ្នកគួរពិចារណាពីវាឡើងវិញ ហើយដកពិសោធន៍កុំបន្តប្រព្រឹត្តទៀត។ ទោះបីជាមានអ្វីផ្លាស់ប្ដូរក៏ដោយ ក៏ប៉ាម៉ាក់ជាអ្នកចិញ្ចឹមយើងឲ្យបានដឹងក្ដីមកដល់សព្វថ្ងៃដែរ។ ទោះពេលខ្លះ គាត់ស្ដីបន្ទោស ឬតឹងតែងដាក់យើងក៏ដោយ ក៏គ្មានអ្វីក្រៅពីចង់ឲ្យយើងល្អឡើយ។ យ៉ាងណាក្ដី ដោយសារហេតុផលណាមួយ យើងតែងតែជ្រុលជ្រួសសម្ដីជាមួយគាត់។ ទោះមិនបង្ហាញនៅខាងមុខក៏ដោយ តែក្រោយខ្នងយើង គាត់អាចសម្ងំស្រក់ទឹកភ្នែកក៏ថាបាន។ ដូចនេះ ១០ ឃ្លាទាំងនេះគឺមិនគួរនិយាយដាក់ពួកគាត់ឡើយ ទោះគ្រាន់ជាការជ្រុលមាត់ក៏ដោយ។
១. ដឹងហើយ ដឹងហើយ កុំនិយាយច្រើនពេក
គួរឲ្យអាណិតអ្នកមានគុណខ្លាំងណាស់ នៅពេលព្យាយាមពន្យល់ប្រាប់កូន បែរជាត្រូវកូនកាត់សម្ដី ដោយសារធុញទ្រាន់ទៅវិញ។ តើអ្នកមានដឹងទេថា មនុស្សជាច្រើនដែលលែងមានប៉ាម៉ាក់ ចង់ស្ដាប់ពាក្យប្រដៅទាំងនេះក៏មិនបានដែរ។
២. មានរឿងអីអត់? ខ្ញុំបិទទូរសព្ទហើយ
ប៉ាម៉ាក់ជាច្រើន ពេលខ្លះ ទូរសព្ទទៅកូនមិនមែនដោយសារតែមានរឿងនោះទេ តែដោយសារតែគាត់ចង់ស្ដាប់សំឡេងកូន និងចង់ដឹងពីសុខទុក្ខរបស់កូនប៉ុណ្ណោះ។ តែដោយសារតែជីវិតរវល់ កូនៗខ្លះ មិនចាប់អារម្មណ៍ពីរឿងនេះឡើយ ហើយប្រញាប់តែបិទទូរសព្ទដើម្បីបន្តការងារ ធ្វើឲ្យប៉ាម៉ាក់អន់ចិត្តជាខ្លាំង។
៣. ទោះខ្ញុំនិយាយក៏ប៉ាម៉ាក់មិនយល់ដែរ កុំសួរទៀត
ដោយសារអាយុច្រើន និងមានរឿងថ្មីជាច្រើននៅក្នុងសង្គមដែលចាស់ៗមិនទាន់ចាប់បាន។ ក្នុងនាមជាកូន នៅពេលគាត់មិនយល់ យើងគួរគប្បីពន្យល់គាត់ មិនមែនប្រាប់គាត់ឲ្យឈប់សួរនោះឡើយ។ កាលយើងមិនចេះអី ហេតុអ្វីគាត់បង្រៀនយើងបាន តែដល់ពេលគាត់មិនយល់ ម៉េចក៏យើងស្រែកឲ្យគាត់កុំឆ្ងល់ទៅវិញ?
៤. ប៉ាម៉ាក់ឯងមិនបាច់ធ្វើអីទេ ធ្វើក៏មិនបានអីដែរ
ជាមួយកិច្ចការដែលបំាម៉ាក់មិនអាចធ្វើបាន ឬយើងមិនចង់ឲ្យគាត់ធ្វើ គួរតែប្រើពាក្យបញ្ចុះបញ្ចូលគាត់ ដើម្បីឲ្យគាត់យល់ មិនមែននិយាយចេញមកសម្លាប់ទឹកចិត្តគាត់ឡើយ ព្រោះគាត់ចង់ធ្វើ ក៏ដើម្បីតែយើងដែរ។
៥. គំនិតរបស់ប៉ាម៉ាក់ឯងហួសសម័យហើយ
ពេលខ្លះ ការគិតរបស់អ្នកមានគុណ លែងមានប្រសិទ្ធិភាពដូចមុនដោយសារតែសង្គមមានការផ្លាស់ប្ដូរ។ តែប្រតិកម្មចំពោះ គំនិតរបស់គាត់មិនចាំបាច់ដល់ថ្នាក់ដាច់អហង្ការ ដូចជាថាឲ្យគាត់ហួសសម័យទេ។ ព្រោះគាត់មិនបាន តាមបច្ចេកវិទ្យាមិនទាន់ទើបនៅរក្សាផ្នត់គំនិតចាស់ យើងមិនត្រូវថាដាក់ឪពុកម្ដាយខ្លាំងៗបែបនេះឡើយ៕
ចុចអានបន្ត៖ មហាសេដ្ឋីលេខ១ក្នុងលោកប្រើវិធី ៨ យ៉ាងនេះ ដើម្បីឲ្យមុខជំនួញជោគជ័យលឿន