ក្មេងតូចពូកែចាប់ចង្កឹះដែលល្បីលើអ៊ីនធើណិតកំពុងត្រូវជំងឺមហារីកបៀតបៀនយ៉ាងសាហាវ
- 2019-03-21 09:07:46
- ចំនួនមតិ 0 | ចំនួនចែករំលែក 0
ក្មេងតូចពូកែចាប់ចង្កឹះដែលល្បីលើអ៊ីនធើណិតកំពុងត្រូវជំងឺមហារីកបៀតបៀនយ៉ាងសាហាវ
Haihai ជាក្មេងប្រុសគួរឲ្យស្រលាញ់ម្នាក់ដែលត្រូវបានគេស្គាល់ច្រើននាក់តាមរយៈការប្រើចង្កឹះយ៉ាងស្ទាត់ជំនាញរបស់គេ។ ឥឡូវនេះកំពុងតែមានជំងឺមហារីកដែលអាចបណ្ដាលឲ្យស្លាប់បាន។
ក្មេងប្រុសអាយុ ២ឆ្នាំមកពី Hulunbuir ក្នុងតំបន់ Inner Mongolia បានក្លាយជាអ្នកល្បីម្នាក់លើអ៊ីនធឺណិត បន្ទាប់ពីវីដេអូញ៉ាំអាហារដោយប្រើចង្កឹះយ៉ាងប៉ិនប្រសប់របស់គេត្រូវបានបង្ហោះនៅលើបណ្ដាញសង្គមរបស់ប្រទេសចិន។
បន្ទាប់ពីវីដេអូរបស់គាត់បានចែកចាយលើបណ្ដាញសង្គមហើយមិនបានប៉ុន្មានផង ស្រាប់តែឮដំណឹងថា Haihai កំពុងតែត្រូវបានបៀតបៀនដោយជំងឺមហារីកយ៉ាងធ្ងន់ធ្ងរ។
បើយោងតាមសារព័ត៌មាន South China Morning Post បានឲ្យដឹងថា Haihai ទទួលរងការធ្វើបាបដោយជំងឺមហារីកគ្រាប់ឈាមចាប់តាំងពីខែមករា ឆ្នាំ២០១៨មកម្ល៉េះ។
ចំពោះការព្យាបាល គ្រួសាររបស់គាត់បានយកទៅព្យាបាលនៅមន្ទីរពេទ្យក្នុងទីក្រុងប៉េកាំង ដែលពួកគេបានចំណាយលុយអស់ ៧០ម៉ឺនយាន់ (ជាង១០ម៉ឹនដុល្លារសហរដ្ឋអាមេរិក) រួចមកហើយ។ លុយដែលយកទៅបង់ថ្លៃពេទ្យនោះគឺបានមកពីការខ្ចីមិត្តភក្តិនិងសាច់ញាតិ។
គ្រួសាររបស់ Haihai ក៏កាន់តែដុនដាបខ្លាំង ដោយសារតែមិនអាចព្យាបាលជីដូនរបស់ Haihai ដែលកំពុងតែកើតជំងឺមហារីកសុដន់ម្នាក់ទៀត។
គេបានឲ្យដឹងទៀតថា ជីដូនរបស់គេបានបោះបង់ការព្យាបាលជំងឺរបស់គាត់ដើម្បីជួយ Haihai ដោយសារគ្រួសារពួកគេគ្មានលទ្ធភាពព្យាបាលពួកគាត់ក្នុងពេលតែមួយបាន។
នៅពេលដែលសាច់ញាតិ និងមិត្តភក្តិមិនឲ្យគ្រួសាររបស់ Haihai សងបំណុលនោះវិញទេ ព្រោះតែទឹកចិត្តស្រលាញ់និងអាណិតធ្វើឲ្យគ្រួសាររបស់ក្មេងតូចមានសម្ពាធមិនអាចខ្ចីលុយពួកគេទៀតបាន ឪពុកម្តាយរបស់ Haihai ក៏សម្រេចចិត្តសុំជំនួយពីសប្បុរសជន។
គ្រួសាររបស់ Haihai បានបង្ហោះវីដេអូដំបូងពីការប្រើចង្កឹះដ៏ប៉ិនប្រសប់របស់គេ នៅលើបណ្តាយសង្គមរបស់ចិន Kuaishou នៅថ្ងៃទី៥ មករា ហើយឪពុកម្ដាយរបស់គេបានបញ្ជាក់ពីការឈឺចាប់យ៉ាងខ្លាំងក្នុងការព្យាបាលប្រឆាំងជំងឺមហារីកគ្រាប់ឈាម។
«គាត់តែងតែទ្រាំមិនយំទេពេលបូមឈាម និងពេលចាក់ថ្នាំ ប៉ុន្តែអ្វីគាត់ខ្លាចនិងមិនអាចទ្រាំបានគឺពេលចាក់ម្ជុលនៅត្រង់ចង្កេះពីក្រោយខ្នង (ជាវិធីព្យាបាលដែលគេប្រើម្ជុលចាក់បញ្ចូលក្នុងឆ្អឹងខ្នងផ្នែកខាងក្រោម)» ម្ដាយរបស់ Haihai បានប្រាប់ទៀតថា Haihai ត្រូវបានគេព្យាបាលបែបនេះអស់ជិត ៣០ដងហើយ។
«ម្ជុលដែលបានចាក់ចូលក្នុងរាងកាយដ៏តូចមួយនេះ ប្រៀបបានដូចនឹងការយកម្ជុលមកចាក់ចំបេះដូងខ្ញុំអ៊ីចឹងដែរ វាជាការឈឺចាប់ដែលគ្មានអ្វីប្រៀបបានឡើយ» សម្ដីរបស់ម្ដាយ Haihai។
ម្ដាយរបស់ Haihai ក៏បានប្រាប់ថាមានមនុស្សជាច្រើនបានចូលរួមជួយ Haihai និងនិយាយលើកទឹកចិត្តគេខ្លាំងណាស់៕
ចុចអាន៖ មិត្តប្រុសស្លាប់១ឆ្នាំហើយតែនាងនៅតែផុសរូបជាមួយគ្នាស្ទើររាល់ថ្ងៃ