បើរៀបបន្ទប់ទឹកបែបនេះ កុំឆ្ងល់ហេតុអីសមាជិកក្នុងផ្ទះឈឺមិនបាត់ លុយចេញមិនឈប់
- 2019-03-18 08:00:00
- ចំនួនមតិ 0 | ចំនួនចែករំលែក 0
បើរៀបបន្ទប់ទឹកបែបនេះ កុំឆ្ងល់ហេតុអីសមាជិកក្នុងផ្ទះឈឺមិនបាត់ លុយចេញមិនឈប់
ដូចគ្នានឹងផ្ទះបាយ និងបន្ទប់គេងដែរ របៀបរៀបចំបន្ទប់ទឹកគឺសំខាន់ខ្លាំងចំពោះម្ចាស់ផ្ទះ ទាំងខាងសុខភាព និងរឿងលាភសំណាង។ ដើម្បីកុំឲ្យសុខភាពអ្នកក្នុងផ្ទះមានរឿងមិនចេះចប់ និងលុយចេះតែហូរចេញនោះ អ្នកគួរជៀសវាងរបៀបរៀបបន្ទប់ទឹកដូចខាងក្រោម៖
១. បន្ទប់ទឹកនៅកណ្ដាលផ្ទះ
ចំណុចកណ្ដាលផ្ទះមានសារៈសំខាន់ប្រៀបដូចជាសួតមនុស្សយើងដែរ ព្រោះជាចំណុចផ្ដល់ឥទ្ធិពលដល់ម្ចាស់ផ្ទះ។ បើដាក់បន្ទប់ទឹកនៅទីនេះ នឹងធ្វើឲ្យផ្ទះធ្ងន់ទៅដោយភាពអវិជ្ជមាន ចំហាយអាក្រក់ច្រើន ជះឥទ្ធិពលមិនល្អដល់សុខភាពអ្នករស់នៅក្នុងផ្ទះ។ មិនត្រឹមតែប៉ុណ្ណោះ វាអាចធ្វើឲ្យទំនាក់ទំនងសមាជិកក្នុងគ្រួសារ ចម្រូងចម្រាស់គ្នាទៀតផង។
**២. នៅទល់មុខទ្វារធំ**
ទ្វារធំមុខផ្ទះគឺជាច្រកទទួលថាមពលល្អឲ្យរត់ចូលផ្ទះ។ បើដាក់បន្ទប់ទឹកនៅទល់មុខទ្វារធំ នោះទ្វារទាំង២នឹងប្រឈមគ្នា ធ្វើឲ្យការហូរចូលនៃរាល់លាភសំណាងនឹងរអាក់រអួល។ មិនត្រឹមតែប៉ុណ្ណោះ ការរៀបបែបនេះ ក៏ធ្វើឲ្យអ្នកប្រើបន្ទប់ទឹកមានអារម្មណ៍មិនស្ងប់ពេលប្រើ ព្រោះទល់នឹងទ្វារធំ។
៣. នៅជាប់ផ្ទះបាយ
តាមក្បួនហុងស៊ុយផ្ទះសម្បែង បន្ទប់ទឹកតំណាងឲ្យធាតុទឹក ផ្ទះបាយតំណាងឲ្យធាតុភ្លើង។ ហេតុនេះហើយ កន្លែងទាំង២នេះមិនអាចនៅជិតគ្នាបានឡើយ ព្រោះឆុងគ្នា។ បើកន្លែងទាំង២នេះនៅជិតគ្នា នោះក្នុងផ្ទះនឹងកើតជម្លោះមិនដាច់។
៤. នៅចំពីលើក្បាលដំណេក
បើមានបន្ទប់ទឹកនៅចំពីលើក្បាលដំណេក នោះអ្នកដែលស្នាក់នៅខាងក្រោមបន្ទប់ទឹកនឹងត្រូវរងឥទ្ធិពលអាក្រក់ច្រើន ដែលអាចបណ្ដាលឲ្យមានបញ្ហាផ្នែកសុខភាព ចេះតែឈឺរ៉ាំរ៉ៃ។
ក្រៅពីនេះ ខាងក្រោមនេះគឺជាចំណុចមួយចំនួនដែលគួរចងចាំពេលធ្វើបន្ទប់ទឹក
-គួរដាក់នៅកន្លែងដែលមើលមិនឃើញ
-ដាក់ឆ្ងាយពីហឹង ឬអាសនៈ
-គួរមានកង្ហារខ្យល់ ឬបង្អួច ឲ្យមានខ្យល់ចេញចូល
-ដាំដើមឈើមួយផើង ពីរផើងក្នុងបន្ទប់ទឹក
-កម្រាលឥដ្ឋបន្ទប់ទឹក មិនគួរខ្ពស់ជាងកម្រាលឥដ្ឋក្នុងផ្ទះ៕
ចុចអាន៖ម៉ូដសក់អាចបង្ហាញពីចរិតខុសៗគ្នារបស់មនុស្សស្រី