មិនចង់ឲ្យជីវិតកូនធ្លាក់ចុះពេលធំឡើង ឪពុកម្តាយគួរជៀសកំហុស៧យ៉ាងពេលកូននៅតូច
- 2019-02-28 01:30:00
- ចំនួនមតិ 0 | ចំនួនចែករំលែក 0
មិនចង់ឲ្យជីវិតកូនធ្លាក់ចុះពេលធំឡើង ឪពុកម្តាយគួរជៀសកំហុស៧យ៉ាងពេលកូននៅតូច
ទំនួលខុសត្រូវរបស់ឪពុកម្តាយគ្រប់រូបគឺតែងធ្វើអ្វីៗដើម្បីឲ្យកូនសប្បាយរីករាយនិងជោគជ័យទៅថ្ងៃមុខ ប៉ុន្តែពេលខ្លះអ្វីៗមិនអាចសមតាមបំណងឡើយ។ មានកំហុសមួយចំនួនធំ ដែលឪពុកម្តាយ បានប្រព្រឹត្តដោយមិនដឹងខ្លួន ជាហេតុបង្កផលប៉ះពាល់ជាអវិជ្ជមានដល់កូន នៅពេលពួកគេធំដឹងក្តី។ តើកំហុស៧យ៉ាងនោះមានអ្វីខ្លះទៅ?
១. មិនបង្ហាញក្តីស្រលាញ់ដល់ពួកគេ
សម្រាប់ក្មេង មានតែម្តាយឪពុកនេះហើយដែលជាមនុស្សសំខាន់ជាងគេលើលោក។ តើនឹងមានអ្វីកើតឡើង ពេលដែលអ្នកមិនបង្ហាញក្តីស្រលាញ់ដល់កូនៗ?
កូនៗនឹងរកការឈឺចាប់ផ្នែកផ្លូវចិត្ត និងមិនស្រលាញ់ខ្លួនឯង។ លទ្ធផលជាក់ស្តែង ពេលពេញវ័យ ពួកគេនឹងគិតចង់ផ្លាស់ប្តូរខ្លួនឯង ដោយការវះកាត់កែសម្ផស្សជាដើម។
ផ្ទុយទៅវិញបើអ្នកស្រលាញ់ពួកគេ ប៉ុន្តែការគ្រប់គ្រងតឹងតែងខ្លាំងពេក ក៏អាចធ្វើឲ្យកូនរងសម្ពាធផ្លូវចិត្តដែរ។
២. ព្យាយាមគ្រប់គ្រងអ្វីៗគ្រប់យ៉ាង
បើឪពុកម្តាយព្យាយាមគ្រប់គ្រងអ្វីៗគ្រប់យ៉ាងពេក នោះក្មេងគ្មានសមត្ថភាពគិតរឿងផ្សេងក្រៅពីការបញ្ជារបស់អ្នកឡើយ។ ម៉្យាងវិញទៀត ពេលធំឡើងកូនអាចនឹងមានបញ្ហាផ្នែកទំនាក់ទំនង ដោយសារតែពួកគេមិនហ៊ានសម្រេចចិត្ត ហើយធ្វើអ្វីគិតតែពីខ្លួនឯង។ ចរិតបែបនេះ អាចបង្កទៅជាជម្លោះ បានយ៉ាងងាយ ពិសេសពេលពួកគេមានដៃគូ។
៣. អ្នកមិនបើកឲ្យសិទ្ធិកូនធ្វើការសម្រេចចិត្តលើជំហរខ្លួនឯង
ពេលដែលឪពុកម្តាយជួយសម្រេចចិត្តឲ្យកូនគ្រប់រឿង ហាក់បីដូចជាកំពុងតែរារាំងកូនមិនឲ្យស្គាល់ភាពឯករាជ្យ ព្រោះកូនៗទាំងអស់គួរតែមានសិទ្ធិចេះសម្រេចចិត្តតាំងពីតូច (បូកផ្សំជាមួយនឹងការលើកទឹកចិត្តនិងអាយុរបស់កូន)។ បើមិនចេះសម្រេចចិត្តដោយជំហរផ្ទាល់ខ្លួនទេនោះ ពួកគេក៏អសមត្ថភាពក្នុងការដោះស្រាយបញ្ហាផ្សេងៗ ថែមទាំងត្រូវការអ្នកជួយជានិច្ច ព្រោះមិនដឹងថាខ្លួនឯងត្រូវការអ្វីពិតប្រាកដ។
៤. ឈ្លោះគ្នាមុខកូនជារឿយៗ
បើអ្នកឧស្សាហ៍ឈ្លោះគ្នារវាងប្តីប្រពន្ធ នៅចំពោះមុខកូន ពួកគេច្បាស់ជាមិនយល់ថាមានរឿងអ្វីកំពុងតែកើតឡើង អារម្មណ៍ច្របូកច្របល់ភ័យតក់ស្លុត។ ឥទ្ធិពលដែលអាចជះទៅលើកូននាពេលអនាគត មាន២ប្រភេទដូចជាពួកគេតែងតែចង់ជៀសពីជម្លោះគ្រប់បែបយ៉ាង ឬមួយទៀតគេអាចនឹងចូលចិត្តប្រើហិង្សាដាក់អ្នកដទៃក៏ថាបាន។ បើជាកូនស្រី នាងនឹងបង្ហាញអាកប្បកិរិយាចង់យកឈ្នះមនុស្ស តែបើកូនប្រុសវិញ គេអាចនឹងយកតម្រាប់តាមឪពុករបស់ខ្លួន។
៥. ទាមទារចង់ឲ្យកូនធ្វើអ្វីដែលមិនសមហេតុផល
ក្មេងមានទំនុកចិត្តលើខ្លួនឯង កាលណាឪពុកម្តាយ ទទួលយកលទ្ធផលបរាជ័យបន្ទាប់ពីពួកគេបានខំប្រឹងរួចមកហើយ។ ប៉ុន្តែបើអ្នកទាមទារខ្ពស់ពេក ថែមទាំងស្តីបន្ទោសពេលពួកគេមិនអាចធ្វើបាន នោះកូននឹងគិតថា ខ្លូនជាអ្នកចាញ់ មិនសប្បាយចិត្ត និងកើតទុក្ខក្រៀមក្រំ។ ពួកគេអាចក្លាយជាមនុស្សដែលពិបាករស់នៅជាមួយ ផ្តោតលើភាពជោគជ័យខ្លាំងពេក ថែមទាំងប្រកាន់គំនិតទាមទារអ្វីដែលមិនអាចទៅរួចនិងគ្មានហេតុផល។
៦. ឪពុកមិនយកចិត្តទុកដាក់ជាមួយនឹងកូន
ឪពុកដែលមិនរវីរវល់ជាមួយកូន ធ្វើឲ្យប៉ះពាល់ទាំងកូនស្រីនិងកូនប្រុសទៅថ្ងៃមុខ។ កូនប្រុសនឹងយកតម្រាប់តាមឪពុក ចំណែកឯកូនស្រី ពិបាកនឹងមានស្នេហាបែបរ៉ូមែនទិកណាស់ ហើយអ្វីដែលនាងធ្លាប់ឆ្លងកាត់កាលពីក្មេងធ្វើឲ្យនាងចេះសង្ស័យមិនទុកចិត្តលើមនុស្សប្រុស។
៧. មិនឲ្យកូនបង្ហាញអារម្មណ៍ពិត
ពេលខ្លះក្មេងអាចយំរខឹងដោយសារតែរឿងកំប៉ិកកំប៉ុក ដែលអ្នកគិតថាវាមិនអី ហើយព្យាយាមឲ្យពួកគេបាត់យំឬខឹងភ្លាម។ តាមការពិត វាសំខាន់ណាស់ដែលបណ្តោយឲ្យពួកគេធ្វើតាមចិត្ត និងបង្ហាញអារម្មណ៍ពិតសិន ពុំដូច្នោះទេពួកគេនឹងចូលចិត្តលាក់អារម្មណ៍ទុកក្នុងចិត្តរហូតដល់ធំ ក៏នៅតែមានទម្លាប់មួយនេះ មិនហ៊ានបង្ហាញចេញ ទុករហូតស្ទើរតែផ្ទុះក្នុងទ្រូង។
ចុចអានបន្ត៖ ប៉ា ៥ ប្រភេទខុសៗគ្នាដែលកូនគ្រប់រូបគួរដឹង