អានអត្ថបទនេះរួចអ្នកនឹងដឹងថា មនុស្សស្រីយើងចាំបាច់ត្រូវតែធ្វើខ្លួនឲ្យស្អាត
- 2019-02-11 02:30:00
- ចំនួនមតិ 0 | ចំនួនចែករំលែក 0
អានអត្ថបទនេះរួចអ្នកនឹងដឹងថា មនុស្សស្រីយើងចាំបាច់ត្រូវតែធ្វើខ្លួនឲ្យស្អាត
ហួសហើយសម័យដែលគេថា មនុស្សស្រីលើសខ្វះគ្នាត្រឹមប្ដីមួយនាក់នោះ ព្រោះសម័យនេះ បើចង់ប្រៀបធៀប អ្នកណាលើអ្នកណា គឺគេមើលទៅលើសម្រស់របស់មនុស្សស្រីនោះ។
មនុស្សស្រីមានផលប្រយោជន៍ច្រើនរាប់មិនអស់ ដូចនេះកុំឆោតទុកខ្លួនអាក្រក់ឲ្យសោះ។ ត្រូវរៀនពីគ្នាឯង រៀនពីពីវិធីធ្វើខ្លួន ហើយស្អាតបំផុតតាមដែលអាចធ្វើបាន។ នៅពេលមនុស្សស្រីពួយនាំគ្នាទៅធ្វើខ្លួន មនុស្សជាច្រើនគ្រវីក្បាលខ្សឹបគ្នាថា៖ មិនមែនឲ្យតែស្អាតគឺទប់ជើងប្ដីបានឯណា សំខាន់ចរិតលក្ខណៈត្រូវតែល្អ។ បើស្អាតទប់ជើងប្ដីជាប់ មិនមែនបវរកញ្ញាក៏លែងគ្នានោះទេ។
មែន មនុស្សស្រីមិនប្រាកដបានប្ដីឲ្យតម្លៃទេ ព្រោះទោះប្រពន្ធស្អាតយ៉ាងណាក៏ជារបស់ដែលប្រើហើយ។ ទោះជាអាថ្មី មិនល្អដូច តែយ៉ាងហោចណាស់ក៏វាបានប្ដូរឱជារសដែរ។ កុំជឿសម្ដីមនុស្សប្រុសនិយាយពីចរិតលក្ខណៈ មនុស្សស្រីចង់ឲ្យមនុស្សប្រុសស្រលាញ់ មុនដំបូងគឺត្រូវតែស្អាតសិន។ បុរសល្អ ទោះចង់ប្រពន្ធស្អាត ឬអាក្រក់ ក្មេង ឬចាស់ក៏គេនៅតែស្រលាញ់ ថែរក្សាដែរ។ បុរសដែលចិត្តដាច់ហើយ ទោះជាប្រពន្ធស្អាតដូចទេពអប្សរ ក៏ជួយរក្សាមង្គលមិនរួចដែរ។
កុំជឿសម្ដីមនុស្សប្រុសឲ្យសោះ ពួកគេចង់ឲ្យខ្លួនមានតម្លៃ ទើបនិយាយពីចរិតលក្ខណៈសំខាន់សម្រស់មិនបាច់ខ្វល់ទេ។ តែអ្នកច្រឡំហើយ មនុស្សប្រុសនេះហើយ ដែលជាបុគ្គលដែលស្រលាញ់ភាពស្អាតជាងគេ។ ត្រូវស្អាតមុន ចាំគិតដល់ចរិតក្រោយ។ មនុស្សស្រីលង់ជឿសម្ដីមនុស្សប្រុស រវល់តែរៀបចំទុកដាក់ផ្ទះសម្បែង រឿងក្រៅ រឿងក្នុង បោះបង់ខ្លួនឯង មុនក្រោយ ក៏ត្រូវប្ដីធុញទៀត។
មនុស្សស្រីធ្វើខ្លួនគឺជាកាតព្វកិច្ច គឺត្រូវតែធ្វើ គ្មានពាក់ព័ន្ធអីនឹងមនុស្សប្រុសឡើយ ហើយក៏មិនបានធ្វើដើម្បីប្រជែងជាមួយអ្នកណាដែរ គឺគ្រាន់តែចង់ឲ្យខ្លួនស្អាតជាងមុនតែប៉ុណ្ណោះ។ គ្រាន់តែចាំថា ពេលស្អាត អ្វីក៏ងាយស្រួលជាងដែរ។ ប្រៀបនឹងអ្នកដទៃ ក៏ត្រូវបានគេយោគយល់ច្រើនជាង។
ក្រឡេកមើលទៅសង្គមសព្វថ្ងៃទៅ ស្រីស្អាត បើបុរសម្នាក់មិនស្រលាញ់ ប្រាកដជាមានបុរសផ្សេងទៀតមកស្រលាញ់។ ពេលស្រីស្អាតយំ រងទុក្ខ ពិបាកចិត្ត អ្នកផងមើលទៅក៏ខ្លោចចិត្តជាងអ្នកមិនសូវស្អាតដែរ។ មិនបាច់និយាយអ្វីច្រើន សមត្ថភាពស្មើគ្នាពេលទៅរកការងារធ្វើ បើអ្នកអាក្រក់ជាងគេ គេប្រាកដជារើសដែលស្អាតជាងហើយ។ កន្លែងខ្លះសុខចិត្តយកអ្នកស្អាតមិនចេះធ្វើការក៏មាន ដោយយកលេសថា យកមកហើយចាំបង្រៀនក៏បាន។
សរុបសេចក្ដីមក ចេះធ្វើខ្លួនគឺចេះស្រលាញ់ខ្លួនឯង ហើយអ្នកដែលស្រលាញ់ខ្លួនឯង មិនខ្វះទេអ្នកដែលស្រលាញ់យើង៕
ចុចអាន៖មនុស្សស្រីរូបណាក៏មានសេរីភាពពេញលេញ រហូតដល់មុនពេលយកប្ដី