ការពារប្រសើរជាងព្យាបាល! ៧យ៉ាងត្រូវជៀស បើមិនចង់ឲ្យស្នេហាបែកបាក់
- 2019-02-08 06:00:00
- ចំនួនមតិ 0 | ចំនួនចែករំលែក 0
ការពារប្រសើរជាងព្យាបាល! ៧យ៉ាងត្រូវជៀស បើមិនចង់ឲ្យស្នេហាបែកបាក់
ចាំអត់ កាលពីគ្រាណាត់ជួបគ្នាដំបូង តើអ្នកទាំងពីរ បានធ្វើរឿងអ្វីខ្លះ? ផ្អែមល្ហែម រ៉ូមែនទិកបែបណាខ្លះ? យូរៗទៅអារម្មណ៍រំជើបរំជួលទាំងនោះ ក៏បានបាត់បង់បន្តិចម្តងៗដោយមិនដឹងខ្លួន និងអាចនាំឲ្យស្នេហាឈានដល់ការបែកបាក់ក៏មាន។ ឈប់បណ្តោយតទៅទៀត ត្រូវរកវិធីទប់ស្កាត់ការពារ និងជៀសឲ្យឆ្ងាយពីទង្វើគ្រោះថ្នាក់ធំៗ៧យ៉ាង។
១. ចុចតែទូរសព្ទមិនសម្រាក
ក្នុងយុគសម័យបច្ចេកវិទ្យាទំនើប មនុស្សភាគច្រើនរវល់តែឱនឈ្ងោកចុចទូរសព្ទសឹងតែគ្រប់ទីកន្លែងគ្រប់ពេលវេលា រហូតភ្លេចយកចិត្តទុកដាក់ពីអ្នកនៅជិតខ្លួន។ បែបនេះញយដងពេក ជីវិតគូស្នេហ៍នឹងមានអារម្មណ៍ថាឃ្លាតឆ្ងាយគ្នាពីមួយថ្ងៃទៅមួយថ្ងៃ ហើយបើនៅជិតគ្នាគឺកាន់តែធុញ។
**២. ចូលចិត្តតែសង្ស័យច្រើន**
បើអ្នកចេះតែគិតអវិជ្ជមាន សង្ស័យនេះនោះមិនចេះចប់ ថ្ងៃណាមួយចំណងស្នេហ៍នឹងមិនអាចបន្តទៅមុខទៀតបានទេ ព្រោះស្នេហាដែលខ្វះការទុកចិត្ត គឺមិនរឹងមាំឡើយ។
៣. ធ្វើរឿងតូចឲ្យក្លាយជាធំ
រឿងតូចតាចតែងតែកើតមានជៀសមិនរួច ប៉ុន្តែរឿងណាដែលអាចដោះស្រាយអធ្យាស្រ័យបាន គួរអត់អោនយោគយល់ខ្លះ ទើបមិនសូវក្តៅចិត្ត បង្ករឿងតូចទៅជាធំ រកក្តីសុខមិនឃើញ។
៤. តឹងរឹងគ្រប់រឿង
ធ្វើជាមនុស្សម៉ឺងម៉ាត់តែក៏មិនមែនតឹងរឹងគ្រប់ពេលរហូតពេកដែរ។ រឿងណាដែលមិនសូវស្មុគស្មាញ កុំយកវាមកអង្គុយគិត នាំឲ្យឈឺក្បាលយូរពេក។ បោះចោលឲ្យស្រាលខ្លួនខ្លះទៅក៏ល្អម្យ៉ាងដែរ។
៥. មិនបែងចែកឲ្យដាច់រវាងការងារនឹងស្នេហា
មិនមែនឲ្យចំណាយពេលលើរឿងស្នេហាច្រើនជាងការងារនោះទេ ប៉ុន្តែគួរចេះបែងចែកពេលវេលាឲ្យច្បាស់។ កុំដោយសារតែ សម្ពាធតានតឹងពីការងារ យកអារម្មណ៍មិនល្អមកជះលើមនុស្សដែលមិនដឹងអី ឬយកលេសរវល់ រហូតមិនអាចផ្តល់ភាពកក់ក្តៅដល់ដៃគូបានឲ្យសោះ។
៦. មិនបង្ហាញក្តីស្រលាញ់
សម័យនេះហើយ នៅអៀនដល់ណាទៀត ហ៊ានស្រលាញ់ក៏ត្រូវហ៊ានបង្ហាញចេញដូចគ្នា។ ពេលខ្លះ អ្នកអាចគិតថា វាគ្រាន់តែជាពាក្យសម្តីនិងទង្វើតូចតាច មិនសំខាន់អីទេ តែបើនិយាយក្នុងទំនាក់ទំនងស្នេហាវិញពិតជាសំខាន់មិនអាចខ្វះបាន។
៧. នៅស្អិតល្មួតគ្រប់ពេលពេក
ដឹងហើយថាស្នេហា ត្រូវការភាពស្និទ្ធស្នាលនៅជិតគ្នា ប៉ុន្តែស្អិតល្មួតគ្រប់ពេលពេក អ្នកទាំងពីរក៏ឆាប់ធុញគ្នាដែរ។ មួយវិញទៀត មនុស្សម្នាក់ៗមានកិច្ចការរវល់រៀងៗខ្លួន ដូច្នេះនៅឆ្ងាយគ្នា ហើយចេះបង្កើនទំនុកចិត្តឲ្យគ្នាទៅវិញទៅមកទើបជាការប្រសើរ៕
ចុចអានបន្ត៖ ៥យ៉ាងដែលមនុស្សស្រីគួររៀនសម្របខ្លួនជាមួយមនុស្សប្រុសខ្លះទើបល្អ