ហេតុផលដែលអ្នកត្រូវអរគុណ ទាំងមនុស្សល្អនិងអាក្រក់ដែលបានចូលមកក្នុងជីវិតនេះ

2019-01-29 09:20:00
ចំនួនមតិ 0 | ចំនួនចែករំលែក 0

មនុស្សគ្រប់គ្នាដែលបានចូលមកក្នុងជីវិតយើង សុទ្ធតែបានបន្សល់ទុកអ្វីមួយពេលដែលពួកគេចាកចេញ ទោះល្អឬអាក្រក់ មានតែខ្លួនយើងប៉ុណ្ណោះដែលមានសិទ្ធិជ្រើសរើសវា។

យើងបានជួបមនុស្សប្លែកមុខច្រើនរាប់មិនអស់ នៅក្នុងជីវិត ប៉ុន្តែមានតែប៉ុន្មាននាក់ប៉ុណ្ណោះដែលជិតស្និទ្ធជាមួយគ្នា។

អ្នកខ្លះត្រឹមជាមិត្តរួមថ្នាក់ ខ្លះជាមិត្តរាប់អានគ្នាធម្មតា ឬជាមិត្តរកស៊ីជាមួយគ្នា ឯខ្លះទៀតគឺជាមិត្តស្លាប់រស់ និងអាចជាមិត្តផងជាគូជីវិតផង។

យ៉ាងណាមិញ មិត្តភាពមិនមែនអាចបំពេញនូវអ្វីដែលអ្នកត្រូវការ ឬអ្វីដែលបានគិតទុកនោះឡើយ។ មនុស្សមួយចំនួន បង្ហាញមុខតែមួយភ្លែត ក៏បាត់ស្រមោលសូន្យឈឹង ចំណែកឯប្រភេទផ្សេងវិញ ចូលមកបានយូរផ្តល់ក្តីសង្ឃឹមពេញលេញហើយ តែទីបំផុតទំនាក់ទំនងនៅតែរលាយគ្មានសល់ដដែល។

វាអាចនឹងធ្វើឲ្យអ្នកខូចចិត្ត អង្គុយស្តាយ មានអារម្មណ៍ច្របូកច្របល់ ស្តីបន្ទោសដល់មនុស្សទាំងអស់នោះ ប៉ុន្តែត្រូវចាំថា រឿងល្អនិងអាក្រក់តែងតែអាចកើតឡើងដំណាលគ្នា ដូច្នេះមនុស្សល្អនិងអាក្រក់ក៏អាចដើរចូលមកក្នុងផ្លូវតែមួយដែរ។ សំខាន់អ្នកដឹងថាអ្វីគួររើសទុក អ្វីគួរបោះចោល ដូចជាអ្នកនេសាទអីចឹងដែរ ពេលបង់សំណាញ់អាចបានទាំងត្រីនិងសំរាម ហើយគេទុកតែរបស់ដែលមានប្រយោជន៍តែប៉ុណ្ណោះ សំរាមស្អុយកខ្វក់បោះចោលទោក៏មិនខាតអីដែរ។

មិនគួរបន្ទោស តែត្រូវអរគុណដល់មនុស្សល្អនិងអាក្រក់ដែលចូលមកពាក់ព័ន្ធក្នុងជីវិតមួយនេះ។ វត្តមាននិងការចាកចេញរបស់ពួកគេ បានធ្វើឲ្យអ្នកស្គាល់នូវមេរៀនជាច្រើនដែលគ្មាននៅសាលា អ្នករឹងមាំជាងមុន យល់ដឹងច្រើនជាងមុន និងចេះប្រុងប្រយ័ត្នខ្ពស់ទៅថ្ងៃមុន ដូច្នេះធ្លាប់ជួបរឿងរ៉ាវបែបនេះ គ្មានទេពាក្យថាស្តាយក្រោយ មានតែអរគុណៗៗ៕

ចុចអានបន្ត៖ អាចនឹងស្ដាយក្រោយ បើមិនបានធ្វើរឿង ១៤ យ៉ាងនេះ មុនអាយុ ៣៥ ឆ្នាំចូលមកដល់

ប្រភព៖ pentahugs ប្រែសម្រួល៖ ដេត ឈុនអ៉ី