៥យ៉ាង ដែលប្រុសៗគិតថាស្រីៗធ្វើចរិតដូចកូនក្មេង តែមិនគួរឲ្យស្រលាញ់អីបន្តិចសោះ

2019-01-22 03:10:00
ចំនួនមតិ 0 | ចំនួនចែករំលែក 0

សម្រាប់មនុស្សស្រីណាដែលគិតថា ធ្វើឫកពាដូចកូនក្មេង មើលទៅគួរឲ្យស្រលាញ់ និងមានបុរសចូលចិត្តចង់នៅក្បែរនោះ គឺគិតខុសហើយ។ មនុស្សប្រុសចាប់ចិត្តលើនារីដែលមានភាពក្រមិចក្រមើម ចេះកំប្លែង មានភាពម៉ឺងម៉ាត់តាមកាលតាមវេលា និងមានហេតុផល មិនមែនខំប្រឹងធ្វើចរិតក្មេង ដើម្បីចង់បានភាពទាក់ទាញឡើយ។ បើអ្នកមានទម្លាប់៥យ៉ាងនេះ គួរជម្រុះចោលទៅ ពុំដូច្នោះទេ ថ្ងៃមុខថ្ងៃក្រោយ គ្មាននរណាចង់នៅជិតទៀតទេ។

១. ដឹងតែពេលសប្បាយ ពេលជួបបញ្ហាមិនចូលរួមដោះស្រាយ

ពេលមនុស្សប្រុសជ្រើសរើសនរណាម្នាក់ជាគូស្នេហ៍ គាត់រំពឹងថា នាងអាចធ្វើជាដៃគូដល់ល្អ ទាំងពេលសប្បាយនិងពេលកើតទុក្ខ។ នៅពេលគាត់ជួបបញ្ហា ទោះមិនអាចជួយអ្វីច្រើនក៏ដោយ យ៉ាងហោចណាស់ អាចជួបមុខគ្នា ជជែកពិភាក្សា រកដំណោះស្រាយសមរម្យមួយ។ បើសូម្បីតែពាក្យលើកទឹកចិត្តក៏គ្មានដែរនោះ គាត់ច្បាស់ជាគិតថាអ្នកនៅមានចរិតកូនក្មេងមិនដឹងអីទាល់សោះ។

២. ធ្វើខ្លួនដូចព្រះនាង ឲ្យគេខ្វល់ខ្វាយលំដាប់លេខមួយ

ការស្រលាញ់ ទាមទារឲ្យមានការគិតគូរយកចិត្តទុកដាក់ពីគ្នា ប៉ុន្តែក៏មិនមែនជ្រុលហួសហេតុរហូតហាមឃាត់ បិទសិទ្ធសេរីភាពគេគ្រប់បែបយ៉ាង ដើម្បីតែសុភមង្គលផ្ទាល់ខ្លួនឡើយ។ បើរវល់តែធ្វើខ្លួនដូចព្រះនាង ឲ្យគេខ្វល់ខ្វាយលំដាប់លេខមួយនោះ ច្បាស់ជាគេធុញស្លាប់ហើយ ព្រោះចង់ធ្វើកិច្ចការសំខាន់អ្វីផ្សេងទៀតក៏ពិបាក។

៣. មានរឿងអីបន្តិច គឺហាមាត់បែកគ្នា

កុំអាងមានរឿងបន្តិចយកពាក្យបែកគ្នាមកគំរាមគេរហូត ព្រោះបើគង់តែមិនបែកគ្នាដាច់ ប្រើពាក្យដដែលដូច្នោះ ស្តាប់យូរៗទៅឡើងសាំត្រចៀក គ្មានអ្វីចម្លែក ហើយមិនចង់ឮទៀតដែរ។

៤. ពេលឈ្លោះគ្នា គិតតែពីយំ មិនស្តាប់ហេតុផល

មនុស្សប្រុសឈឺក្បាលបំផុត នៅពេលឈ្លោះគ្នា មនុស្សស្រីមិនព្រមនិយាយឲ្យដឹងខុសត្រូវរកហេតុផល គិតតែខឹងទ្រគោះបោះបោក ឬអង្គុយយំមិនឈប់។ ចរិតបែបនេះ មិនខុសពីក្មេងមិនទាន់ដឹងក្តីនោះទេ។

៥. ចូលចិត្តនិយាយឲ្យតែរួចពីមាត់ មិនពិចារណាសិន

ដូចដែលអ្នកដឹងហើយថា កូនក្មេងមុននិយាយឬធ្វើអ្វីមួយ មិនបានគិតគូជាមុនឡើយ ព្រោះខួរក្បាលនៅក្មេងខ្ចីមិនទាន់លូតលាស់ពេញលេញ។ ចុះអ្នកវិញ បើធំដឹងក្តីពេញវ័យហើយ ហេតុអីនៅធ្វើដូចក្មេងទៀត? ហេតុនេះ ដើម្បីការពារកុំឲ្យមានភាពស្តាយក្រោយ និងមានជម្លោះកើតឡើងញឹកញាប់ មុនហាមាត់ស្តី និងធ្វើអ្វីមួយគួរពិចារណាឲ្យបានត្រឹមត្រូវជាមុនសិន៕