អ្នកជិតខាងគឺបុគ្គលគួរឲ្យខ្លាចបំផុតប្រចាំឆ្នាំ ជំនាញខាងពន្លើស
- 2019-01-20 07:03:54
- ចំនួនមតិ 0 | ចំនួនចែករំលែក 0
អ្នកជិតខាងគឺបុគ្គលគួរឲ្យខ្លាចបំផុតប្រចាំឆ្នាំ ជំនាញខាងពន្លើស
សួរថាអ្នកណាមិនខ្លាច បើគ្រាន់តែអ្នករៀនជាមួយខ្ញុំមកយកទៅរៀន ព្រោះម៉ូតូខូចនោះ ស្រាប់តែមកវិញមួយភូមិគេថាខ្ញុំស្រីរកស៊ីគ្រប់គ្នានៀក។
គេថាអ្នកជិតខាង ពេលខ្លះសំខាន់មិនចាញ់គ្រួសារទេ ព្រោះពេលរឿងអីម្ដងៗគឺមានញាតិជិតខាងនេះហើយ ដែលជាអ្នកនៅចាំជួយគ្នាទាន់ពេល។ តែចំណងមិត្តភាពជាមួយអ្នកជិតខាងក៏ត្រូវប្រេះស្រាំនៅពេលជំនាញនិយាយពន្លើស ក៏ដូចជាភាពស្រមើស្រមៃរបស់ពួកគាត់កាន់តែមានភាពច្នៃប្រឌិតកាន់តែខ្ពស់។ មិនដឹងជាពួកគាត់រៀនមកពីណាណ តែជំនាញផ្សព្វផ្សាយក៏ដូចជាប៉ាន់ស្មានរឿងរបស់ពួកគាត់គឺសាហាវជាកំពូលអ្នកសរសេរប្រលោមលោកទៅទៀត។ ឮពួកគាត់និយាយដើមខ្លួនឯងម្ដងៗ ស្មានតែបុគ្គលដែលត្រូវនិយាយដើមនោះគឺជាតួក្នុងរឿងទេតើ ព្រោះព្រឹត្តិការណ៍ដែលគាត់បរិយាយនោះគឺគ្មានពិតទាល់តែសោះ។
ខាងក្រោមនេះគឺជាកំពូលរឿងច្នៃប្រឌិតដែលអ្នកជិតខាងតែងចែកចាយគ្នាក្នុងជីវភាពរស់នៅប្រចាំថ្ងៃ ដែលអ្នកណាក៏ធ្លាប់ឆ្លងកាត់៖
១. ខ្ញុំទៅទិញម្ជូរមួយថង់មកញ៉ាំ ព្រោះសាបមាត់ពេក ស្រាប់តែពីដើមភូមិដល់ចុងភូមិ នាំគ្នាវែកញែកថាមិនដឹងថាខ្ញុំចាញ់កូនប៉ុន្មានខែ។
២. ប្អូនប្រុសទៅលេងហ្គេមនៅហាងអ៊ីនធឺណិត ដល់ម៉ោង៩យប់ទើបចូលផ្ទះ ស្រាប់តែព្រឹកឡើង ឮគេនិយាយថាប្អូនប្រុសខ្ញុំរត់ចោលផ្ទះអស់៣ថ្ងៃហើយ អស់លុយបានស្រវេស្រវាមកផ្ទះវិញ។
៣. គ្រាន់តែខ្ញុំអង្គុយច្រៀងនៅមុខផ្ទះសោះ ស្រាប់តែអ៊ីជិតផ្ទះថា ខ្ញុំត្រូវសង្សារទាត់ក្បាលចោល ទើបពិបាកចិត្តអង្គុយច្រៀងទាំងទុក្ខសោកបែបនេះ។ អ្វីដែលសំខាន់នោះគឺ ខ្ញុំអត់មានសង្សារទេ។
៤. ខ្ញុំកម្មង់អីញ៉ាំតាមអ៊ីនធឺណិតហើយមានគេដឹកមកឲ្យដល់ផ្ទះ ២ម៉ោងក្រោយស្រាប់តែឮអ៊ុំជិតផ្ទះដើរប្រាប់គេថាមីកូនហ្នឹងមានប្រុសទិញអីឲ្យញ៉ាំដល់ផ្ទះ។
៥. ដោយសារតែម៉ូតូខូចហើយ មានឥវ៉ាន់ច្រើនត្រូវយកទៅក្រុមហ៊ុនផងនោះ ក៏ដាច់ចិត្តហៅតាក់ស៊ីជិះ។ មកពីធ្វើការវិញ ស្រាប់តែម៉ែសួរថាមានតាចិញ្ចឹមមែន បានមកយកដល់ផ្ទះដូចនេះ ព្រោះព្រឹកមិញអ្នកជិតខាងឃើញថាមានតាបើកឡានមកយកដល់ផ្ទះ។
៦. ខំធ្វើការទាំងយប់ ទាំងថ្ងៃដើម្បីកុំឲ្យប៉ាម៉ាក់ពិបាក ស្រាប់តែគេផ្អើលពេញមួយភូមិថា មីកូនហ្នឹងនៅក្មេងតែអត់សុំលុយម៉ែឪវាចាយទេ ប្រហែលធ្វើស្រីរកស៊ីហើយ៕
ចុចអាន៖នៅពេលមានគំនិតចាស់ទុំមែនទែន អ្នកនឹងមានការគិតខុសប្លែកពីមុន ៥យ៉ាងនេះ