លង់ស្រឡាញ់គេម្នាក់ឯង តែមិនហ៊ាននឹងចាប់ផ្ដើម គួរសាកវិធីនេះ

2019-01-10 02:00:00
ចំនួនមតិ 0 | ចំនួនចែករំលែក 0

មិនថាប្រុសឬក៏ស្រីនោះទេពេលខ្លះដឹងខ្លួនថាចាប់អារម្មណ៍គេដែរតែចេះតែខ្លាចហើយមិនហ៊ាននិយាយជាមួយគេឡើយ រហូតដល់គេចមុខក៏មានដែរ។ មែនទែនទៅត្រូវដឹងថាបើចេះតែគេចបែបនេះតើពេលណាបានស្គាល់គ្នាទៅ? ខាងក្រោមនេះជាវិធីសាស្ត្រខ្លះសម្រាប់ជួយអ្នកនៅពេលពិបាកនិយាយជាមួយមនុស្សដែលអ្នកចាប់អារម្មណ៍ ៖

១. កុំគេចពីគេ

ពេលខ្លះបើចៃដន្យដើរជួបគេ អ្នកមិនត្រូវគេចឬធ្វើមិនឃើញនោះទេ គួរតែបើកភ្នែកមើលមុខគេឲ្យមានភាពជឿជាក់បំផុត។ កែវភ្នែកគឺជាអាវុធដ៏សំខាន់បំផុតដែលអាចទាក់ទាញចិត្តមនុស្សបានយ៉ាងងាយ។

រូបតំណាង

**២. ញញឹម**

ទោះញញឹមចោលក៏វាមិនខាតដែរ ព្រោះភាពរីករាយអាចឲ្យអ្នកជុំវិញយើងអារម្មណ៍ល្អបាន។ បើជួបគេញញឹមដាក់គេទៅ ទោះមិនបាននិយាយអីក៏ដោយក៏វាជាភាពទាក់ទាញមួយដែរ មិនមែនឃើញគេធ្វើមុខមាំ មុខស្មើនោះទេ ព្រោះនៅពេលដែលអ្នករួសរាយរាក់ទាក់អ្នកណាក៏ចង់មកនិយាយជាមួយដែរ។

៣. បង្កើតឱកាសខ្លួនឯង

ពេលខ្លះកុំចាំតែភាពចៃដន្យពេក បើអាចបង្កើតឱកាសខ្លួនឯងបានគួរតែព្យាយាម។ ឧទាហរណ៍ដូចជា រកវិធីបានឃើញមុខគេ ឬចូលជិតគេជាដើម ដើម្បីឲ្យគាត់កាន់តែស្គាល់អ្នក។ ម្យ៉ាងទៀតបើអ្នកអាចស្គាល់មិត្តភក្តិគេកាន់តែល្អ ព្រោះរឹតតែជួយឲ្យអ្នកចូលកាន់តែកៀកគេ។

៤. ធ្វើខ្លួនឲ្យស្រស់ស្រាយ

គ្មានអ្នកណាចង់នៅជិតមនុស្សដែលមើលទៅស្មុគស្មាញ គួរឲ្យធុញនោះទេ ដូច្នេះអ្នកត្រូវធ្វើខ្លួនឲ្យធូរស្រាល ស្រស់ស្រាយជានិច្ច។ មួយវិញទៀតរឿងរៀបចំខ្លួនក៏ត្រូវតែស្អាតបាតដែរ មិនត្រូវរយីរយាកខ្លាំងពេកឡើយ ព្រោះអាចធ្វើឲ្យបាត់បង់ការទាក់ទាញ។

៥. និយាយជាមួយគេតែចំណុចសំខាន់

ដោយសារតែអ្នកមិនសូវហ៊ាននិយាយច្រើននោះ វិធីនេះគឺល្អបំផុត។ បើអ្នក និងគេជាអ្នកធ្វើការជាមួយគ្នានោះ គួរតែរកអីសួរទាក់ទងពីការងារ។ បើគេជាសិស្សច្បងអ្នក គួរតែសួរគេទាក់ទងនឹងការរៀនសូត្រជាដើម។ ម្យ៉ាងទៀតត្រូវមើលពីចំណង់ចំណូលចិត្តគេហើយនិយាយឲ្យចំគោលដៅ។ បើគាត់ចូលចិត្តជិះកង់ គួរតែសួរឬនិយាយពីការជិះកង់តែម្ដង ។