ខ្ជិលទិញដីផ្ទះដូចតារាផ្សេង នាងចាំងគីមទិញមន្ទីរពេទ្យតែម្ដង

2019-01-08 03:55:34
ចំនួនមតិ 0 | ចំនួនចែករំលែក 0

កំពូលតារាសម្ដែងស្រីកូរ៉េ Lee Young Ae បានសម្រេចចិត្តទិញមន្ទីរពេទ្យដែលនាងធ្លាប់សម្រាលកូនភ្លោះនោះ ឲ្យក្លាយជាកម្មសិទ្ធិខ្លួនឯងផ្ទាល់តែម្ដង។

កាលពីថ្ងៃទី៦ ខែមករាមុននេះ បណ្ដាញព័ត៌មាន Mydaily របស់កូរ៉េបានរាយការណ៍ថា តារាសម្ដែងស្រីជើងចាស់កូរ៉េ Lee Young Ae បានទិញផ្ដាច់មន្ទីរពេទ្យពហុជំនាញ និងសម្ភពលំដាប់ខ្ពស់ Cheil ហើយ។ នាយកនៃមន្ទីរពេទ្យបានឲ្យដឹងថា តារាស្រីរូបនេះនឹងឡើងកាន់តំណែងនាពេលឆាប់ៗ ហើយពួកគេក៏មានគម្រោងជួសជុល និងសាងសង់អគារបន្ថែមផងដែរ។

ទោះបីជាតួលេខពិតប្រាកដមិនត្រូវបានបង្ហើបក្ដី តែប្រភពជាច្រើនជឿជាក់ថា តម្លៃនៃពេទ្យលំដាប់កំពូលនេះ គឺមិនក្រោម១០០លានដុល្លារនោះឡើយ។ តួរឿង "ជីវិតនាងចាំងគីម" សម្រេចទិញមន្ទីរពេទ្យនេះ ក្រោយពេលនាងបានសម្រាលកូនភ្លោះនៅទីនេះ ហើយគិតថាពេទ្យនេះមានសេវាកម្មល្អ។ គួរបញ្ជាក់ផងដែរថា មន្ទីរពេទ្យ Cheil ត្រូវបានបើកដំបូងនៅឆ្នាំ១៩៦៣ ហើយតែងស្ថិតក្នុងពេទ្យលំដាប់កំពូលជានិច្ចខាងផ្នែកសម្ភពសម្រាលកូន។

គួររំលឹកផងដែរថា ក្នុងចំណោមតារាកូរ៉េដែលមានទ្រព្យសម្បត្តិច្រើនជាងគេ Lee Young Ae គឺមានវត្តមាននៅក្នុង Top ១០ ដោយទ្រព្យសរុបរបស់តារាវ័យ ៤៨ឆ្នាំ គឺមានប្រមាណ២០០០លានដុល្លារ៕

ចុចអាន៖រៀបការនឹងគ្នាតែ៤ឆ្នាំសោះ ទ្រព្យរួម Yang Mi និង Harwick Lau ឡើងដល់ ១ ពាន់លានដុល្លារ

ប្រភព៖ news.zing.vn ប្រែសម្រួល៖ Caramel