ភាពខុសគ្នារវាងមនុស្សប្រុស និងមនុស្សស្រីក្នុងទំនាក់ទំនងស្នេហា

2019-01-07 06:19:18
ចំនួនមតិ 0 | ចំនួនចែករំលែក 0

ធម្មជាតិនៃបុរស និងនារីគឺខុសគ្នា ដូច្នេះទើបពេលដែលមានស្នេហាមានការមិនយល់ពីគ្នាច្រើន។ ពេលខ្លះមនុស្សប្រុសគិតបែបនេះ មនុស្សស្រីគិតបែបនោះហើយធ្វើការសន្និដ្ឋានទាំងមិនបានដឹងពីការពិត។ខាងក្រោមនេះកញ្ញា នឹងបង្ហាញពីភាពខុសគ្នារវាងមនុស្សប្រុស និងមនុស្សស្រីនៅក្នុងទំនាក់ទំនងស្នេហា ៖

១. ការនិយាយ

មនុស្សប្រុសមិនសូវនិយាយច្រើនដូចមនុស្សស្រីទេ។ ភាគច្រើនគេស្ងៀមស្ងាត់ ហើយមិនសូវរអ៊ូច្រើនទោះមានរឿងអីមិនពេញចិត្តក៏ដោយ។ រឿងខ្លះទៀតគឺគេឲ្យវាកន្លងហួស ដោយមិនប្រកាន់។ ដោយឡែកមនុស្សស្រីវិញគឺចូលចិត្តនិយាយច្រើន ទោះរឿងតូចតាចយ៉ាងក៏នាងនិយាយឲ្យខាងប្រុសស្ដាប់ដែរ ហើយអាចថាមនុស្សស្រីគឺរអ៊ូច្រើនពេលមានរឿងអីកើតឡើង។

២. អារម្មណ៍

បុរសគឺមានអារម្មណ៍នឹងធឹងជាងមនុស្សស្រី។ គេមិនសូវរំភើបខ្លាំង ហើយក៏មិនសូវប៉ះទង្គិចផ្លូវចិត្តប៉ុន្មានដែរបើរឿងនោះតិចតួច។ ភាគច្រើនគឺគេមិនសូវអន់ចិត្ត ឬគិតអីច្រើនឡើយ ដែលជាហេតុធ្វើឲ្យគេមើលទៅមិនសូវផ្អែមល្ហែម ឬរឹងៗដូចគល់ឈើជាដើម។ ប៉ុន្តែមនុស្សស្រីគឺឆាប់រំភើប ឆាប់ខឹង ឆាប់អន់ចិត្ត ឆាប់ងរង៉ក់ណាស់ នាងត្រូវការការលួងលោមច្រើន ការផ្អែមល្ហែមច្រើន។ម្យ៉ាងទៀតនាងគិតច្រើនជាងបុរសទោះបីរឿងនោះតិចតួចក៏ដោយ។

៣. ការមើលឃើញ

ភាគច្រើនមនុស្សស្រីតែងគិតថាមនុស្សប្រុសមើលឃើញស្រីដែលសិចស៊ី តែងខ្លួនឆើតឆាយស្អាត ប៉ុន្តែការពិតមនុស្សប្រុសមិនបានមើលឃើញនារីបែបនោះស្អាតឡើយ។ គាត់ការពិតមើលឃើញនារីដែលសាមញ្ញៗស្អាតច្រើនជាង ហើយគាត់ចូលចិត្ត និងចាប់អារម្មណ៍ភាពធម្មតាទាំងនោះ។ ចំណែកមនុស្សស្រីមើលឃើញថាខ្លួនឯងតែងខ្លួនសាមញ្ញមិនស្អាត ហើយតែងព្យាយាមតែងខ្លួនច្រើនដើម្បីឲ្យមនុស្សប្រុសចាប់អារម្មណ៍ទៅវិញ។

រូបតំណាង

៤. ពេលខឹង

បុរសពេលខឹងភាគច្រើនគឺមិនសូវនិយាយតែម្ដង គឺគាត់ដើរចេញទៅរកកន្លែងដែលស្ងាត់ដើម្បីរំងាប់កំហឹងសិន សឹមមកនិយាយដោះស្រាយគ្នាតាមក្រោយ។ នេះមិនមែនគាត់មិនខ្វល់ខ្វាយនោះទេ តែគាត់មិនចង់និយាយច្រើនពេលខឹង ព្រោះអាចមានរឿងកាន់តែធំ។ រីឯមនុស្សស្រីឲ្យតែពេលខឹងគឺចង់តែឲ្យមនុស្សប្រុសលួងភ្លាមៗ ហើយមិននិយាយរកហេតុផលសិនទេ គឺខឹងដាច់ក្បាលដាច់កន្ទុយតែម្ដង ដល់បាត់ខឹងទៅដឹងថាខុស ឬធ្វើបែបនេះ បែបនោះមិនត្រូវ។

៥. ការស្រឡាញ់

ដោយសារតែមនុស្សភាគច្រើនមិនសូវចូលចិត្តបង្ហាញអារម្មណ៍ទើបមនុស្សស្រីគិតថាគាត់មិនសូវជាស្រឡាញ់ខ្លួន តែការពិតគាត់ស្រឡាញ់ គាត់បារម្ភណាស់។ គាត់យកចិត្តទុកដាក់លើនារីដែលគាត់ស្រឡាញ់ច្រើនជាងនាងមើលឃើញទៅទៀត។ ចំណែកខាងភាគីនារីវិញគឺចូលចិត្តបង្ហាញ ទាំងកាយវិការ និងអារម្មណ៍។ នាងខ្វល់ខ្វាយគ្រប់រឿង រហូតពេលខ្លះហាមឃាត់នេះ ហាមឃាត់នោះ ឬសួរច្រើនរហូតដល់ធ្វើឲ្យមនុស្សប្រុសមានអារម្មណ៍ថាមានសម្ពាធ។