មេរៀនសំខាន់សម្រាប់បើកទំព័រថ្មីនៃជីវិត

2019-01-02 06:00:00
ចំនួនមតិ 0 | ចំនួនចែករំលែក 0

ជីវិតមនុស្សយើងមានចុះមានឡើងជារឿងធម្មតា ជួបបញ្ហាតូចឬធំជៀសមិនរួច។ យ៉ាងណាត្រូវចាំថារាល់បញ្ហាទាំងឡាយដែលអ្នកជួបប្រទះសុទ្ធតែជាមេរៀនល្អៗ ដើម្បីឲ្យអ្នកមានការប្រុងប្រយ័ត្នទៅថ្ងៃមុខ និងអាចដើរឈានទៅកាន់ទំព័រថ្មីនៃជីវិត។

១.ភាពបរាជ័យមិនមែនជាទីបញ្ចប់ ប៉ុន្តែវាជាបទពិសោធន៍ល្អសម្រាប់អ្នក។ បើអ្វីៗមិនសមតាមបំណង សម្រាកបន្តិច ធ្វើអារម្មណ៍ឲ្យស្រស់ថ្លា គិតសារឡើងវិញ ព្យាយាមរកវិធីថ្មីផ្សេងទៀត នោះឱកាសជោគជ័យ នឹងមានច្រើនជាងអ្នកដែលមិនហ៊ានសាកល្បងទាល់តែសោះ។

២.គំនិតអ្នកដទៃមិនសំខាន់ជាងគំនិតរបស់អ្នកនោះទេ។ ពេលចង់ធ្វើអ្វីមួយ បើរវល់តែខ្លាច អ្នកផ្សេងនិយាយមិនល្អបែបនេះបែបនោះ អ្នកគ្មានថ្ងៃអាចសម្រេចក្តីសុបិនរបស់ខ្លួនឯងបានឡើយ។ សម្តីអ្នកផ្សេងដែលនាំឲ្យខូចអារម្មណ៍គួរបំភ្លេចចោលទៅ។

៣.បើចង់ស្រកទម្ងន់មានរាងស្លីមស្អាត ត្រូវស្វែងយល់ពីម្ហូបអាហារនិងលំហាត់ប្រាណដែលមានប្រសិទ្ធភាព។ បើចង់ជោគជ័យលើអាជីពការងារ ត្រូវអនុវត្តសិក្សារៀនសូត្រ ជំនាញថ្មីៗបន្ថែមឲ្យបានច្បាស់លាស់។

៤.ហ៊ាននិយាយប្រកែកថា "ទេ" ដូចជាពេលមានមិត្តភ័ក្តិបបួលជប់លៀង ដើរលេង ផឹកស៊ី... ប្រសិនបើអ្នកមិនចង់ គិតថាឥតប្រយោជន៍ ក៏មិនចាំបាច់បង្ខំចិត្តដែរ។

៥.មានលុយកាន់តែច្រើន មិនមែនបានន័យថា សុភមង្គលក៏អាចកើនឡើងតាមទឹកលុយឡើយ ព្រោះពេលខ្លះ ខំប្រឹងធ្វើការបានលុយច្រើនជាងមុនមែន ប៉ុន្តែសម្ពាធក៏មានច្រើនលើសពីធម្មតា ដូច្នោះហើយកុំគិតតែពីលុយមួយមុខពេក ចូរធ្វើអ្វីដែលអាចឲ្យខ្លួនសប្បាយចិត្តផង។

ទំនាក់ទំនងគឺជាធាតុសំខាន់ឆ្ពោះទៅកាន់ជោគជ័យ៖

១.ចេះស្តាប់ហេតុផលពីមនុស្សដែលអ្នកស្រលាញ់

២.ពេលខឹងដើរចេញសិន កុំច្រឡោត

៣.ពេលមានបញ្ហាផ្ទុះឡើង ចាំមានអារម្មណ៍ល្អចាំនិយាយវែកញែករកខុសត្រូវ ផ្តល់ឱកាសឲ្យគេបញ្ចេញមតិ ព្រោះមនុស្សម្នាក់ៗមានសិទ្ធិស្មើគ្នា

៤.កុំចង្អុលមុខ ត្រូវបង្ហាញអារម្មណ៍ពិត។

**ផ្តល់សុភមង្គលឲ្យខ្លួនឯង មានស្នាមញញឹមទៅកាន់អ្នកដទៃ អ្វីៗនឹងស្រស់ថ្លាអាស្រ័យលើអារម្មណ៍ជាចម្បង៕