ចូលដល់ ២០១៩ ហើយ នៅម្នាក់ឯងដល់ពេលណាទៀត? បើអាចសាកចាប់ផ្ដើមសិនក៏ល្អ
- 2019-01-02 05:00:00
- ចំនួនមតិ 0 | ចំនួនចែករំលែក 0
ចូលដល់ ២០១៩ ហើយ នៅម្នាក់ឯងដល់ពេលណាទៀត? បើអាចសាកចាប់ផ្ដើមសិនក៏ល្អ
ឆ្នាំមុនមិនមានស្នេហាអ្នកគិតថាវាមិនជាបញ្ហានោះទេ តែនេះដាច់ឆ្នាំចូលឆ្នាំថ្មីហើយណា គួរតែចាប់ផ្ដើមមានមនុស្សល្អម្នាក់ហើយ។
ឆ្នាំចាស់កន្លងផុតទៅ ដោយបន្សល់នូវរឿងរ៉ាវជាច្រើន តែឆ្នាំថ្មីក៏ចូលមកអ្នកក៏ត្រូវតែទទួលវាឲ្យបានល្អ និងកក់ក្ដៅបំផុត។ គ្មានស្នេហាអ្នកក៏គិតថាគ្មានអីជារឿងពិបាកចិត្តនោះទេ ព្រោះអ្នកនៅតែរីករាយជាមួយជីវិតបានយ៉ាងប្រសើរ ដោយគ្មានសម្ពាធ គ្មានរឿងត្រូវលំបាកចិត្តឡើយ។ នោះប្រហែលមកពីអ្នកមិនទាន់ជួបមនុស្សម្នាក់ដែលធ្វើឲ្យអ្នកចង់មានជីវិតគូ ឬអាចមកពីអ្នករាងចាលនឹងស្នេហាកន្លងមកដោយមិនចង់ចាប់ផ្ដើមជាមួយអ្នកណាទាំងអស់។
ឆ្នាំថ្មីហើយដូច្នេះគួរតែជម្រះរឿងចាស់ៗចោលឲ្យអស់ ហើយកុំព្យាយាមយកអតីតកាលមកលាយឡំទៀត។ អ្នកគួរតែរៀនបើបេះដូងសារជាថ្មី ឬក៏ចាប់យកឱកាសជាមួយមនុស្សដែលអ្នកលួចស្រឡាញ់ឲ្យបានក្នុងឆ្នាំថ្មីនេះ។
ការពិតទៅមានស្នេហាគឺជាពេលដែលស្រស់បំព្រងបំផុត ជាពេលដែលរីករាយបំផុតឲ្យតែអ្នកស្រឡាញ់មនុស្សដែលគេស្រឡាញ់អ្នកវិញដូចគ្នា។ មនុស្សពីរអ្នកដែលស្រឡាញ់គ្នា គេនឹងមិនធ្វើឲ្យម្នាក់ណារងរបួសចិត្តនោះទេ គេនឹងព្យាយាមស្វែងរកភាពរីករាយឲ្យគ្នាទៅវិញទៅមក។
មិនចាប់បាច់អីច្រើននោះទេ ជីវិតដែលមានគូគ្រាន់តែបើភ្នែកមកឃើញសារពីគេ ឬឮសំឡេងគេក៏មានអារម្មណ៍ល្អដែរ។ ជួបគ្នាមានអារម្មណ៍ថាហេតុអីពេលវេលាដើរលឿនបែបនេះ មិនទាន់នៅជាមួយគ្នាឆ្អែតផង? នេះហើយជាឥទ្ធិពលនៃស្នេហាដែលធ្វើឲ្យមនុស្សម្នាក់កែប្រែខ្លួនឯងដើម្បីមនុស្សម្នាក់ទៀតដោយមិនបាច់ឲ្យអ្នកណាមកប្រាប់ គឺកែប្រែដោយខ្លួនឯងតែម្ដង។
ជីវិតមានដៃគូល្អគឺជីវិតដែលមានកម្លាំងចិត្ត គ្មានសម្ពាធ គ្មានភាពឯកា និងគ្មានអារម្មណ៍ចង់រស់នៅម្នាក់ឯងឡើយ ព្រោះគ្រប់ពេលគឺចង់មានម្នាក់នោះមកធ្វើរឿងល្អៗជាមួយគ្នា។
ម្នាក់ឯងជារឿងល្អ តែជីវិតនេះនៅតែត្រូវការក្ដីស្រឡាញ់ ដូច្នេះឆ្នាំថ្មីហើយគួរតែមានក្ដីស្រឡាញ់ដ៏កក់ក្ដៅមួយ៕
ចុចអាន៖ស្រលាញ់គ្នាត្រូវតែឲ្យ password Facebook គ្នា? ឬក៏មកពីទំនុកចិត្តមិនទាន់គ្រប់គ្រាន់