ទម្លាយ ៤ មូលហេតុដែលគូស្នេហ៍កាន់តែឈ្លោះគ្នា កាន់តែស្រលាញ់គ្នាជ្រាលជ្រៅ

2018-12-23 07:00:49
ចំនួនមតិ 0 | ចំនួនចែករំលែក 0

មនោសញ្ចេតនាដែលគ្មានការប្រកែកគ្នាហាក់ដូចសម្លមិនដាក់គ្រឿង គឺគ្មានឱជារសសោះតែម្ដង។ ជួនខ្លះ ឈ្លោះគ្នាមិនមែនកើតឡើងដោយសារតែមានបញ្ហានឹងគ្នានោះឡើយ វាគ្រាន់តែជួយឲ្យភាគីទាំងសងខាងយល់ពីគ្នាជាងមុនតែប៉ុណ្ណោះ។ ខាងក្រោមនេះគឺជាហេតុផលទាំង ៤ ដែលបង្ហាញថាគូស្នេហ៍ដែលឈ្លោះគ្នា ទើបជាគូស្នេហ៍ដែលមានសុភមង្គលពិតប្រាកដ។

១. ឈ្លោះគ្នាព្រោះបារម្ភ

នៅពេលស្រលាញ់នរណាម្នាក់ចេញពីចិត្ត យើងតែងចង់ឲ្យគេទទួលបាននូវអ្វីៗដែលល្អបំផុត ទោះបីជាពេលខ្លះ ពេលនិយាយចេញក្រៅ អាចធ្វើឲ្យអ្នកទាំង២ ប្រកែកគ្នាក៏មិនខ្លាចដែរ។ ព្រោះអ្នកចង់តម្រង់ឲ្យគេទៅរកអ្វីដែលល្អចំពោះ ទោះបីជាគេមិនទាន់បើកចិត្តទទួលយកក៏ដោយ តែអ្នកនៅតែនិយាយចេញ។ ប្រការនេះអាចធ្វើឲ្យអ្នកទាំង២ ឈ្លោះគ្នា តែពេលត្រូវគ្នាវិញ គេនឹងយល់ពីសណ្ដានចិត្តរបស់យើង។

២. ឈ្លោះគ្នាដើម្បីយល់ពីគ្នាជាងមុន

ជំនួសឲ្យការរក្សាភាពស្ងៀមស្ងាត់ទាំងសងខាង ហើយឈានដល់ការបែកគ្នានោះ យកល្អអ្នកគួរតែឈ្លោះគ្នាឲ្យបែកផ្សែងម្ដងគឺប្រសើរជាងឆ្ងាយណាស់។ ព្រោះប្រសិនបើបែកគ្នាមែននោះ យ៉ាងហោចណាស់ក៏យើងបានដឹងហេតុផលដែរ គ្រាន់បើជាងបែកគ្នាស្ងាត់ៗ។ ក្រោយការជជែកគ្នាអ្នកទាំង២ អាចនឹងយល់ពីគ្នាច្រើនជាងមុន ព្រោះម្នាក់ៗបានបើកចិត្តនិយាយចេញមក។

៣. ឈ្លោះគ្នាដើម្បីដំណោះស្រាយ

បើមានរឿង ហើយម្នាក់ៗធ្វើឫកធ្វើពារទាំងសងខាង មិនព្រមហើបមាត់ទាល់តែសោះនោះ បញ្ហាមួយនោះនឹងនៅអ៊ីចឹងរហូត ហើយរាល់ពេលមានរឿងម្ដងៗ នឹងជីកបញ្ហានោះមកឈ្លោះគ្នាសារជាថ្មី។ ដើម្បីជៀសវាងរឿងនេះកើតឡើងម្ដងជាពីរដង អ្នកទាំងគូស្នេហ៍គួរមានការជជែកគ្នាឲ្យស៊ីជម្រៅមួយដើម្បីដោះស្រាយបញ្ហាមួយនោះឲ្យដាច់ស្រេច កុំឲ្យវាកើតឡើងបន្តទៀត។

៤. ឈ្លោះគ្នាដើម្បីឲ្យមនោសញ្ចេតនាជ្រាលជ្រៅជាងមុន

ស្ដាប់ទៅហាក់ដូចកំប្លែង តែតាមការពិត គូស្នេហ៍ជាច្រើនបានទទួលស្គាល់ថា ក្រោយឈ្លោះគ្នាម្ដងៗ ពួកគេតែងមានទំនោរស្និទ្ធិស្នាលជាងមុន។ ការឈ្លោះគ្នាក្នុងរឿងស្នេហាប្រៀបដូច គ្រឿងបង់សម្លដែរ បើរលូនទៅរហូត ប្រាកដជាគ្មានឱជារស់ឡើយ។ ប្រសិនបើយើងជជែកគ្នាដោយទទួលដឹងខុសត្រូវ ជឿជាក់ថា អ្នកទាំង២នឹងយល់ពីគ្នាជាងមុន៕

ចុចអាន៖កុំស្រលាញ់មនុស្សប្រុសដែលមិនព្យាយាមធ្វើអ្វីសោះ ដើម្បីបានបេះដូងអ្នក

ប្រភព៖ Spiceee អត្ថបទ៖Caramel