ហេតុអ្វីពេលលួចស្រលាញ់គេ រំភើបតែម្នាក់ឯង ខូចចិត្តក៏តែម្នាក់ឯង?

2018-12-19 05:00:00
ចំនួនមតិ 0 | ចំនួនចែករំលែក 0

ពេលលួចស្រលាញ់នរណាម្នាក់ ឲ្យតែបានជួបមុខគេម្តងៗ អ្វីៗហាក់ដូចជាស្រស់បំព្រងខុសពីធម្មតា។ ក្នុងចិត្តនឹកស្រមៃថា បើថ្ងៃណាមួយអ្នកទាំងពីរបានគ្នាជាគូពិតមែន អ្នកច្បាស់ជាធ្វើឲ្យស្នេហាមួយនេះផ្អែមល្ហែមដូចក្នុងរឿងភាគ មិនឈ្លោះប្រកែក មិនខឹងប្រចណ្ឌផ្តេសផ្តាស ប៉ុន្តែអ្វីៗត្រឹមជាក្តីស្រមៃដែលគ្មានថ្ងៃក្លាយជាការពិត។ ភាគច្រើនអ្នកលួចស្រលាញ់គេ គឺកើតចេញពីអារម្មណ៍តែម្ខាង ឯម្ខាងទៀតមិនដឹងខ្លួនទាល់តែសោះក៏មាន។ នេះអាចមកពីអ្នកគិតផ្សេងធ្វើផ្សិងនៅចំពោះមុខគេ ខ្វះភាពក្លាហានមិនហ៊ានបញ្ចេញ។

ពេលបាននិយាយជាមួយគ្នា បេះដូងលោតញាប់ កែវភ្នែកស្រស់ថ្លា ហើយក៏បន្តតាមដានគេនៅក្នុងបណ្តាញសង្គមឥតឈប់ឈរ ដោយសារតែខួរក្បាលបានផ្តិតជាប់រូបរបស់គេ បើមិនបានឃើញមួយថ្ងៃគឺនៅមិនសុខឡើយ។ អារម្មណ៍បែបនេះពិបាកទប់ទល់ជាមួយខ្លាំងណាស់ ជួនកាលវាបានធ្វើឲ្យអ្នកបាត់បង់ភាពជាខ្លួនឯង មានរឿងលាក់បាំងក្នុងចិត្តអន្ទះសាចង់ឲ្យគេដឹងតែមិនយល់ថាគួរធ្វើបែបណា ពេលខ្លះរវល់តែគិតខ្វល់ពីគេ រហូតមិនអាចផ្តោតចិត្តធ្វើរឿងអ្វីផ្សេង។

អ្នកតែងខ្លាចមនុស្សដែលអ្នកកំពុងតែលួចស្រលាញ់ ទៅចាប់ចិត្តលើនរណាផ្សេងដែលល្អជាងអ្នក ស្អាតជាងអ្នក មានជាងអ្នក ពូកែជាងអ្នក។ សូម្បីតែពេលគេនៅជិតគ្នាស្និទ្ធស្នាលដូចមិត្តភ័ក្តិ ក៏អ្នកលួចច្រណែនឈឺចាប់ ខ្លាចថ្ងៃណាមួយម្ចាស់គ្រងបេះដូងរបស់គេជានរណាផ្សេងមិនមែនអ្នក។

ភាពស្ងប់ស្ងាត់របស់អ្នក បានធ្វើឲ្យគេមិនអាចកត់សម្គាល់ដឹងថា អ្នកកំពុងតែលួចស្រលាញ់នោះទេ។ ទីបញ្ចប់អ្នកស្រលាញ់គេតែម្នាក់ឯង ឈឺចាប់ក៏គ្មាននរណាដឹង ហើយចាប់ផ្តើមបន្ទោសខ្លួនឯង បន្ទោសនិស្ស័យដែលមិនអាចនាំអ្នកឲ្យជួបគ្នា។

បើសិនជាម្នាក់នោះ ជ្រើសរើសនរណាផ្សេងមិនមែនអ្នក ក៏មិនគួរទម្លាក់កំហុសបន្ទោសគុំខឹងអីដែរ ចាត់ទុកថាព្រហ្មលិខិតពិតជាមិនអាចកំណត់ឲ្យអ្នកទាំងពីរជាគូនឹងគ្នា ហើយព្យាយាមបើកចិត្តសម្លឹងមើលអ្នកផ្សេង នោះអ្នកនឹងបានដឹងថា លើលោកនេះមិនខ្វះទេមនុស្សល្អស័ក្តិសមជាមួយអ្នក៕