អនាគតម៉ាក់ប៉ាក្មេកពេញចិត្តស្ដូកមិនខាន បើចេះវិធីយកចិត្តចាស់ទុំទាំង ៥នេះ

2018-12-13 07:39:53
ចំនួនមតិ 0 | ចំនួនចែករំលែក 0

ទោះបីយើងជាយុវវ័យចូលចិត្តនៅជាមួយក្មេងៗដូចគ្នា ច្រើនជាងនៅជាមួយមនុស្សចាស់ ប៉ុន្តែការចេះរៀបចំខ្លួនឯងឲ្យមានទំនាក់ទំនងល្អជាមួយមនុស្សចាស់ គឺពិតជាសំខាន់ និងផ្ដល់ផលល្អច្រើនចំពោះយើង។ ជាក់ស្ដែងនៅពេលយើងត្រូវការសុំជំនួយអ្វីមួយពីពួកគាត់ នៅពេលមានបញ្ហាត្រូវចរចារឿងផ្សេងៗជាមួយពួកគាត់ ឬពិសេសអ្នកត្រូវការកសាងទំនាក់ទំនងល្អជាមួយអនាគតឪពុកម្ដាយក្មេក។ ខាងក្រោមនេះ កញ្ញានឹងបង្ហាញវិធីខ្លះៗដើម្បីឲ្យចាស់ទុំស្រលាញ់ចូលចិត្ត ៖

រូបតំណាង

**១. រក្សាមារយាទថ្លៃថ្នូរ**

ត្រូវបង្ហាញការគោរពចំពោះមនុស្សចាស់ជានិច្ច បើទោះបីពួកគាត់មិនជាប់សាច់ឈាមជាមួយយើងក៏ដោយ។ ពេលជួប ពេលលា គួរលើកដៃសំពះ និយាយពាក្យលា ឬជំរាបសួរយ៉ាងទន់ភ្លន់ ផ្ដល់ស្នាមញញឹម មិនដើរកន្លង និងរៀបចំឥរិយាបថឲ្យបានស្ងប់ស្ងៀម។ ទោះបីទើបតែស្គាល់គ្នា តែបើអ្នកមានអាកប្បកិរិយាបែបនេះ នឹងអាចធ្វើឲ្យពួកគាត់ចាប់ផ្ដើមចូលចិត្តបាន។

២. ចេះដាក់ខ្លួន

ការមិននិយាយអួតអាងពីអ្វីដែលខ្លួនចេះ ឬមានក្នុងឥរិយាបថសំញែងពើងទ្រូវ គឺជាទង្វើដែលគួរចៀសវាង មិនមែនចំពោះតែជាមួយមនុស្សចាស់ទេ ប៉ុន្តែជាមួយអ្នកអាយុស្រករគ្នា បើអាចចៀសបានក៏ល្អ ព្រោះវាជាទង្វើដែលមនុស្សភាគច្រើនមិនចូលចិត្ត។

៣. ជួយការងារដោយមិនរអ៊ូ

មនុស្សចាស់តែងចូលចិត្តក្មេងដែលមានចរិតឧស្សាហ៍ ចេះដឹងទុក្ខធុរៈ ដូច្នេះដើម្បីទទួលបានការទុកចិត្តពីពួកគាត់ អ្នកគួរធ្វើការងារដែលគាត់ផ្ដល់ឲ្យដោយតាំងចិត្ត មានភាពស្វាហាប់ និងធ្វើឲ្យរួចរាល់មុនពេលកំណត់។ ត្បិតតែវាមិនហុចផលដល់អ្នកភ្លាមៗ ប៉ុន្តែអ្នកនឹងអាចទទួលបានឱកាសល្អៗទៅអនាគត។

៤. ធ្វើខុសត្រូវចេះទទួលខុស

មនុស្ស និងកំហុសគឺជារឿងដែលមិនអាចចៀសផុត ហើយក៏គ្មានអ្នកណាល្អឥតខ្ចោះគ្រប់យ៉ាងដែរ សំខាន់នៅពេលដឹងថាខ្លួនធ្វើអ្វីខុស យើងត្រូវចេះទទួលកំហុស និយាយសុំទោស និងប្រញាប់កែប្រែ ឬដោះស្រាយ។ ទោះបីកំហុសនោះបង្កភាពខូចខាត ធ្វើឲ្យចាស់ទុំខឹង និងមិនពេញចិត្ត ប៉ុន្តែឲ្យតែអ្នកចេះភ្ញាក់រឭក មានទំនួលខុសត្រូវក្នុងការកែប្រែ លោកនឹងអាចយោគយល់ និងអភ័យទោសឲ្យបាន កុំឲ្យតែយើងធ្វើខុសញឹកញាប់ដដែលៗពេក។

៥. មិនប្រកែកយកឈ្នះ គ្មានហេតុផល

វាអាចនឹងមានពេលខ្លះដែលយើងមានអារម្មណ៍ធុញទ្រាន់ ខឹង ឬរំខានដោយសារភាពសាំញ៉ាំរបស់មនុស្សចាស់ ក៏ដូចជាការស្ដីបន្ទោស ឬចាំចាប់កំហុសរបស់ពួកគាត់ រហូតអត់ទ្រាំតមាត់ត ក មិនបាន។ ប៉ុន្តែភាគច្រើនការឈ្លោះប្រកែកជាមួយមនុស្សចាស់ គឺមិនសូវជាផ្ដល់ផលល្អសម្រាប់យើងឡើយ ព្រោះយើងនឹងអាចក្លាយជាមនុស្សមិនចេះគោរពចាស់ទុំ គ្មានសុជីវធម៌។ ដូច្នេះហើយអ្វីដែលមិនចាំបាច់ ចេះតែបិទមាត់ៗខ្លះទៅ ៕