ចង់ឲ្យកូនមានចរិតល្អតាំងពីតូច ឪពុកម្តាយគួរមានទម្លាប់មួយនេះ

2018-12-11 06:00:00
ចំនួនមតិ 0 | ចំនួនចែករំលែក 0

ក្នុងពិព័រណ៍សៀវភៅកម្ពុជាលើកទី៧ ក្រោមប្រធានបទ "សៀវភៅរស់ចំណេះរីក" ដែលបានធ្វើឡើង នាបរិវេណបណ្ណាល័យជាតិនៅថ្ងៃទី ៧-៩ ខែធ្នូឆ្នាំ២០១៨ កាលពីពេលថ្មីៗនេះ។ ក្នុងនោះដែរ ឃើញមានវត្តមានរបស់អ្នកស្រី ទ្រី សម្ផស្ស ដែលជាអ្នកនិពន្ធរឿងនិទានខ្លីសម្រាប់កុមារបានដាក់តាំងលក់សៀវភៅនិងទទួលបានការចាប់អារម្មណ៍ច្រើនពីសិស្សនិស្សិត ដែលបានមកចូលរួមក្នុងពិព័រណ៍នេះ។

អ្នកនិពន្ធបទពិសោធន៍១០ឆ្នាំ បានរៀបរាប់ប្រាប់មកកាន់វេបសាយ "កញ្ញា" ថា "មូលហេតុនៃការនិពន្ធសៀវភៅនេះឡើង ដើមឡើយដោយសារតែខ្ញុំជាអ្នកចូលចិត្តគូរររូប ដូច្នេះហើយបានជាខ្ញុំ ចង់បង្កើតស្នាដៃចងក្រងសៀវភៅលាយឡំជាមួយរូបភាព ដែលសុទ្ធតែជាគំនិតច្នៃប្រឌិតផ្ទាល់របស់ខ្ញុំរួមមានការគូរដោយដៃ កំព្យូទ័រ... និងមានទាំងភាសាខ្មែរនិងអង់គ្លេស ក្នុងអត្ថន័យអប់រំបង្កើនចំណេះដឹងសម្រាប់កុមារ។”

អ្នកស្រី ទ្រី សម្ផស្ស

ដោយយល់ឃើញថា ការអានមានគុណសម្បតិយ៉ាងច្រើនដូចជា កូនឆាប់ចេះអាន អាចដឹងអក្សរដោយស្វ័យប្រវត្តមុនពេលចូលរៀន ស្វែងយល់ពីរឿងរ៉ាវដែលនៅជុំវិញខ្លួនគាត់ ប្រសើរជាងការលេងតែទូរសព្ទ ដែលអាចបង្កផលប៉ះពាល់យ៉ាងខ្លាំងចំពោះកុមារ ធ្វើឲ្យពួកគេឆាប់ខឹងមួម៉ៅ គ្មានចំណាប់អារម្មណ៍ជាមួយសៀវភៅ ឬគ្មានចំណង់ក្នុងការអាន។ "អ្នកស្រី សម្ភស្ស បញ្ជាក់”។

អ្នកនិពន្ធវ័យក្បែរ៤០ឆ្នាំរូបនេះ បានបន្តទៀតថា "ចាប់ពី៦ខែឡើង ក្មេងអាចស្តាប់និងព្យាយាមចង់និយាយតាម ដូច្នេះឪពុកម្តាយ គួរមានទម្លាប់និទានរឿងឲ្យកូនតូចស្តាប់យ៉ាងហោចណាស់ឲ្យបាន១ម៉ោងមុនពេលចូលគេង ព្រោះគ្រប់សៀវភៅរឿងកុមារទាំងអស់សុទ្ធតែបង្កប់ន័យអប់រំ និងពន្យល់ពីទិដ្ឋភាពជាក់ស្តែងនៅជុំវិញខ្លួន"។

រូបតំណាង

ជាចុងក្រោយអ្នកស្រី ទ្រី សម្ផស្ស ចង់ផ្តែផ្តាំទៅកាន់ឪពុកម្តាយគ្រប់រូប ដែលមានកូនតូចៗទោះបីរវល់យ៉ាងណា ក៏មិនគួរទុកកូនចោលជាមួយទូរសព្ទ ព្រោះវាអាចប៉ះពាល់យ៉ាងខ្លាំងដល់ទំនាក់ទំនងរបស់ពួកគេជាមួយមនុស្សជុំវិញខ្លួន ដូចជាក្មេងក្រចេះនិយាយជាដើម។ ដំណោះស្រាយដ៏ល្អបំផុត គួរទិញសៀវភៅកុមារ និងរបស់របរក្មេងលេងណា ដែលអាចផ្តល់ចំណេះដឹង ភាពសប្បាយរីករាយ និងបង្កើនភាពស្និទ្ធស្នាល៕