ពេលស្រលាញ់បុរសម្នាក់ ស្រីៗធ្វើតែ៦ចំណុចនេះ ខាងប្រុសដឹងតែស្រលាញ់យូរអង្វែង

2018-12-09 05:20:00
ចំនួនមតិ 0 | ចំនួនចែករំលែក 0

ចិត្តរបស់បុរសពេលខ្លះងាយយល់ ពេលខ្លះក៏មើលមិនធ្លុះដូចគ្នា។ បើអ្នកកំពុងស្ថិតក្នុងទំនាក់ទំនងជាមួយបុរសម្នាក់ ហើយមិនទាន់ប្រាកដថាគាត់អាចនឹងផ្ដល់ក្ដីស្រលាញ់ពិតប្រាកដឱ្យអ្នកដែរអត់នោះ ថ្ងៃនេះ កញ្ញា នឹងណែនាំចំណុចពិសេសមួយចំនួនដែលនារីធ្វើ ហើយគាត់នឹងស្រលាញ់អ្នកវិញស្ទើរលេប មិនងាយបែកចិត្តឡើយ។

រូបតំណាង

**ស្វែងយល់** បុរសក៏មិនខុសពីនារី និងមនុស្សគ្រប់គ្នាដែរ។ គ្មានអ្នកណាកើតមកល្អឥតខ្ចោះទាំង១០នោះទេ។ មានពេលខ្លះ គាត់អាចឆេវឆាវ ពេលខ្លះក៏គ្មានភាពរឹងប៉ឹង ពេលខ្លះក៏ពិបាកនឹងគ្រប់គ្រងអារម្មណ៍ខ្លួនឯងបាន។ ដូច្នេះអ្វីដែលអ្នកគួរធ្វើក្នុងទំនាក់ទំនងមួយនេះដំបូងគេ គឺស្វែងយល់ពីគាត់ និងយោគយល់ឱ្យបានច្រើនដូចដែលគាត់នឹងធ្វើចំពោះអ្នក ជាជាងរំពឹងឱ្យតែគាត់ធ្វើមកលើអ្នកតែម្ខាង។

សេរីភាព ផ្ដល់ឱ្យគាត់នូវសេរីភាពខ្លះក្នុងការធ្វើអ្វីដែលគាត់ស្រលាញ់។ កុំដាក់ប្រអប់គាត់ ឬឃុំឃាំងគាត់តែជាមួយអ្នក រហូតបាត់បង់ចំណង់ចំណូលចិត្តផ្ទាល់ខ្លួនរបស់គាត់។ ត្រូវចាំម្យ៉ាងថា បើគាត់ពិតជាស្រលាញ់អ្នកពិតប្រាកដ គាត់នឹងមិនធ្វើរឿងដែលធ្វើឱ្យអ្នកឈឺចាប់ ឬខកបំណងឡើយ។ ដូច្នេះមានហេតុផលអីដែលត្រូវទៅដាក់ច្រវាក់គាត់ មិនឱ្យធ្វើអ្វីបាននោះ?

រូបតំណាង

ធ្វើទង្វើតបវិញ បង្ហាញឱ្យគាត់ដឹងថា អ្នកក៏ស្រលាញ់គាត់ពិតប្រាកដវិញដែរ។ បង្ហាញតាមរយៈការយកចិត្តទុកដាក់ តែមិនហួងហែងហួសហេតុពេក ចេះសួរនាំសុខទុក្ខគាត់ តែមិនដេញដោលរឿងអត់ប្រយោជន៍ លើកទឹកចិត្តឱ្យគាត់ ពេលគាត់បាក់ទឹកចិត្តជាដើម។

គោរព អ្វីដែលមនុស្សប្រុសត្រូវការបំផុតគឺការគោរព។ បើអ្នកជាមនុស្សដែលគាត់ស្រលាញ់ ហើយចេះផ្ដល់ការគោរពចំពោះគាត់ គាត់នឹងគិតថាអ្នកទុកគាត់ជាមនុស្សសំខាន់ អ្នកឱ្យតម្លៃគាត់ មិនមែនអាងតែស្រលាញ់គ្នា ប្រើពាក្យសម្ដីមិនដឹងចាស់ទុំ ឬហ៊ានលេងវាយក្បាល ឬធ្វើទង្វើមិនសមរម្យលើគាត់ឡើយ។

ភាពកក់ក្ដៅ ការផ្ដល់ក្ដីស្រលាញ់ដោយការឱបគាត់យ៉ាងណែន កាន់ដៃគាត់ និងបង្ហាញឱ្យគាត់ដឹងថា អ្នកនឹងនៅក្បែរគាត់មិនថាមានបញ្ហាឬសុខយ៉ាងណាក៏ដោយ។

យកចិត្តទុកដាក់ ដូចមនុស្សស្រីយើង ពេលមានស្នេហាតែងត្រូវការឱ្យខាងប្រុសយកចិត្តទុកដាក់ខ្ពស់ចំពោះខ្លួន តែពេលខ្លះយើងក៏ភ្លេចយកចិត្តទុកដាក់ចំពោះគាត់វិញដែរ។ អ្នកណាក៏ត្រូវការចំណុចនេះ ដូច្នេះបើជាមនុស្សស្រលាញ់គ្នា កុំរំពឹងថាខាងណាត្រូវផ្ដល់ឱ្យខាងណាអី គឺត្រូវចេះផ្ដល់ឱ្យគ្នាឱ្យបានច្រើនតាមតែដែលអាចធ្វើបានទៅ គឺល្អណាស់ទៅហើយ៕