ដាច់ឆ្នាំទៅ ក៏ជីវិតអ្នកនៅតែវេទនាដដែល បើមិនបោះចោលទម្លាប់ ៣យ៉ាង

2018-12-11 04:12:00
ចំនួនមតិ 0 | ចំនួនចែករំលែក 0

ទើបមួយភ្លែតសោះ ជិតដាច់ឆ្នាំបាត់ហើយ។ មនុស្សជាច្រើនអាចនឹងមានអារម្មណ៍ភិតភ័យចំពោះពេលវេលាដែលដើរលឿនហួសការរំពឹងទុក។ យ៉ាងណាមិញ ជិតដាច់ឆ្នាំបែបនេះ គឺជាពេលវេលាដែលយើងគួរពិចារណាឡើងវិញ ថាមួយឆ្នាំកន្លងមកនេះយើងធ្វើអ្វីបានល្អខ្ល អ្វីមិនល្អខ្លះ ហើយហេតុផលអ្វីខ្លះដែលធ្វើឲ្យជីវិតរបស់យើងទៅមុខមិនរួច។ ពិនិត្យមើលខ្លួនឯង បើមានទម្លាប់ដូច ៣ចំណុចខាងក្រោមនេះ អ្នកគួរតែផ្លាស់ប្ដូរវាចេញឲ្យអស់មុនឆ្នាំថ្មីចូលមកដល់ បើចង់បានជីវិតមួយដែលប្រសើរជាងមុន៖

រូបតំណាង

**១. មើលងាយខ្លួនឯង**

អ្នកណាខ្លះចូលចិត្តមើលងាយខ្លួនឯង? គិតថាខ្លួនឯងមិនស្អាត មិនពូកែ មិនល្អ ចូលចិត្តយកខ្លួនឯងទៅប្រៀបធៀបជាមួយអ្នកដទៃ រហូតធ្វើឲ្យមានអារម្មណ៍ថាគ្មានទំនុកចិត្ត គិតច្រើន នឹកឃើញតែចំណុចមិនល្អរបស់ខ្លួន ។ល។ ការគិតទាំងអស់នេះនឹងរារាំងយើងមិនឲ្យហ៊ានធ្វើអ្វីដើម្បីសម្រេចគោលដៅធំៗបានឡើយ។ ដូច្នេះហើយគួរផ្លាស់ប្ដូរការប្រៀបធៀបខ្លួនឯងទៅនឹងអ្នកដទៃ មកពីការប្រៀបធៀបខ្លួនឯងបច្ចុប្បន្ននិងខ្លួនឯងពីមុនវិញថាតើយើងរីកចម្រើនអ្វីខ្លះ។ អ្វីដែលសំខាន់គឺកុំភ្លេចអភិវឌ្ឍខ្លួនឯងរាល់ថ្ងៃ។ មនុស្សយើងគ្រប់គ្នាសុទ្ធតែមានចំណុចខ្លាំង ចំណុចលេចធ្លោផ្ទាល់ខ្លួនទាំងអស់ហ្នឹង ដូច្នេះហើយចូររកវាឲ្យឃើញ ហើយជឿជាក់លើខ្លួនឯងវិញទើបប្រសើរ។

២. ខ្វល់អារម្មណ៍អ្នកដទៃពេក រហូតភ្លេចគិតដល់ខ្លួនឯង

ការយកចិត្តទុកដាក់ជាមួយអ្នកនៅជុំវិញខ្លួនគឺជារឿងល្អ ប៉ុន្តែការខ្វល់ពីអារម្មណ៍ ឬសម្ដីអ្នកដទៃខ្លាំងរហូតបាត់បង់ភាពជាខ្លួនឯង នោះមិនសូវជាល្អប៉ុន្មានទេ។ តួយ៉ាងដូចជាមិនហ៊ានបដិសេធមិត្តភ័ក្ដិ ព្រោះខ្លាចគេថាខ្លួនជាមនុស្សមិនល្អ ហើយចេះតែគិតច្រើន។ អ្នកដែលធ្លាក់ក្នុងស្ថានភាពបែបនេះញឹកញាប់ សូមសាកល្បងប្ដូរមកខ្វល់ពីខ្លួនឯងឲ្យបានច្រើនជាងមុន។ ធ្វើជាខ្លួនឯង និងជឿជាក់ខ្លួនឯង មិនចាំបាច់ខ្វល់ពីអារម្មណ៍ ឬការយល់ឃើញរបស់អ្នកដទៃច្រើនជាងខ្លួនឯងទេ។

៣. ចាំស្អែកហើយស្អែកទៀត មិនព្រមចាប់ផ្ដើមធ្វើសោះ

ជឿថាទម្លាប់ចាំស្អែកៗ គឺជាអ្វីដែលមនុស្សជាច្រើនមានជាប់ខ្លួន។ ជាច្រើនលើកដែលមិនបានធ្វើអ្វីដែលខ្លួនឯងគិតថានឹងធ្វើ ពេលខ្លះមានអ្វីមួយមករំខាន ក៏ទុករឿងនោះមួយដុំសិន រហូតពេលខ្លះក៏ទុកចោលតែម្ដង។ ចុងក្រោយគឺមិនបានធ្វើអីទាំងអស់។ អ្នកខ្លះគ្រោងសម្រកទម្ងន់តាំងពីដើមឆ្នាំ ប៉ុន្តែជិតដាច់ឆ្នាំនៅតែមិនស្រក ឬបែរជាលើសដើម ព្រោះតែពាក្យថា "ចាំស្អែកសឹមសម្រក”។ ដូច្នេះហើយត្រូវដាស់តឿនខ្លួនឯងជានិច្ចថាបើតាំងចិត្តថាធ្វើអ្វី ត្រូវចាប់ផ្ដើមធ្វើភ្លាមៗ ទើបគោលដៅរបស់យើងបានសម្រេច។

កំណត់វិន័យខ្លួនឯងឲ្យបានច្បាស់លាស់ ព្រោះបើចេះតែបណ្ដោយៗតាមចិត្តនឹកឃើញ ជីវិតអ្នកនឹងជួបបញ្ហាកាន់តែពិបាក ៕

ចុចអានបន្ត៖

ប្រភព៖ jelly ប្រែសម្រួល៖ ស្វាយ វ៉ាន់ថន