ចង់ក្លាយជានារីដែលមនុស្សប្រុសចង់ក្បែរ គួរមានទម្លាប់បែបនេះ

2018-12-10 01:25:00
ចំនួនមតិ 0 | ចំនួនចែករំលែក 0

មនុស្សស្រីដែលអាចទាក់ចិត្តមនុស្សឲ្យចង់ក្បែរមិនមែនជាមនុស្សស្រីដែលស្អាតនោះទេ តែគឺជានារីដែលមានទម្លាប់ និងឥរិយាបថល្អដែលធ្វើឲ្យពួកគេមានអារម្មណ៍ល្អពេលនៅជាមួយ។ ខាងក្រោមនេះជាទម្លាប់មួយចំនួនដែលអ្នកគួរតែប្រកាន់យកដើម្បីឲ្យមនុស្សប្រុសមានអារម្មណ៍ចង់នៅក្បែរ ៖

១. ទម្លាប់ស្ដាប់គេនិយាយ

ទម្លាប់ស្ដាប់នេះគឺសំខាន់ណាស់ព្រោះបើអ្នកចេះតែដណ្ដើមគេនិយាយគេនឹងបាត់បង់អារម្មណ៍ ព្រោះគេមិនសប្បាយចិត្តគេចង់បានអ្នកស្ដាប់ដ៏ល្អម្នាក់ មិនមែនអ្នកនិយាយដ៏ល្អម្នាក់ទេ។ ត្រូវស្ដាប់គេដោយយកចិត្តទុកដាក់ និងផ្ដោតសំខាន់ទៅលើគេ នោះអ្នកនឹងក្លាយជាមនុស្សស្រីដែលគេចូលចិត្តនឹងចង់នៅក្បែរ។

២. មានការឆ្លើយតបត្រឹមត្រូវ

គួរយល់នូវកាលៈទេសៈ រឿងខ្លះត្រូវនិយាយអ្នកគួរតែនិយាយព្រោះពេលខ្លះពួកគេត្រូវការយោបល់ពីអ្នកណាស់ តែបើមិនគួរនិយាយនោះកុំទាន់និយាយអី។ ត្រូវចាំថាពេលដែលអ្នកជាមនុស្សដែលគ្រប់គ្នាមានអារម្មណ៍ល្អហើយ ពួកគេតែងតែចង់នៅជាមួយអ្នកដោយគ្មានលក្ខខណ្ឌ។

៣. ចេះធ្វើឲ្យបរិយាកាសរីករាយ

មនុស្សដែលតែងតែរីករាយ ស្រស់ស្រាយគឺជាប្រភេទមនុស្សស្រីដែលមនុស្សប្រុសចង់ក្បែរ។ បើអ្នកចេះធ្វើឲ្យមនុស្សជុំវិញអ្នកសើច សប្បាយបាននោះ វាពិតជាចំណុចពិសេសមួយ ព្រោះគ្មានអ្នកណាចង់នៅក្បែរមនុស្សដែលគួរឲ្យធុញ ស្មុគស្មាញ និងកើតទុក្ខច្រើននោះទេ។ ត្រូវធ្វើជាថ្នាំរីករាយមួយដែលមនុស្សចង់ញ៉ាំពេលគេកើតទុក្ខ។

រូបតំណាង

៤. មានភាពទន់ភ្លន់ និងផ្អែមល្ហែម

នេះគឺជាធម្មជាតិដែលមនុស្សប្រុសគ្រប់គ្នាត្រូវការ បើអ្នកមានភាពទន់ភ្លន់ ផ្អែមល្ហែមដោយចេញពីចិត្តនោះពួកគេនឹងចង់ក្បែរអ្នក។ នៅពេលដែលមនុស្សស្រីមានភាពផ្អែមល្ហែម ទន់ភ្លន់ គួរឲ្យស្រឡាញ់នោះ មនុស្សប្រុសនឹងមានអារម្មណ៍កក់ក្ដៅ ធូរស្រាលបន្ទាប់ពីបាននៅជាមួយអ្នកហើយ។

៥. លើកទឹកចិត្ត មិនមែនស្ដីបន្ទោស

ពេលមនុស្សមានបញ្ហាអ្វីដែលពួកគេចង់បានមិនមែនការស្ដី ការបន្ទោសឡើយ ពួកគេចង់បានការលើកទឹកចិត្ត និងការគាំទ្រ។ ពួកគេនឹងមានអារម្មណ៍ប្រសើរឡើងវិញនៅពេលពួកគេមានអ្នកលើកទឹកចិត្ត ជំរុញពួកគេបន្ទាប់បីពួកគេធ្លាក់ខ្លួន។

៦. មិនសួរដេញដោលច្រើន

បើចូលចិត្តសួរច្រើនពេក ដឹងស្រាប់ហើយថាអារម្មណ៍ពេលគេសួរច្រើន ដេញដោលពីនេះពីនោះច្រើនវាបែបម៉េច។ រឿងខ្លះគួរតែសួរអ្នកក៏សួរទៅ តែមិនមែនសួរបែបជីកឬសជីកគល់រហូតធ្វើឲ្យគេលែងចង់ឃើញមុខអ្នកទេ៕