នៅក្បែរប្ដីថ្មី តែអារម្មណ៍នៅតែនឹកប្ដីចាស់

2018-12-03 03:43:52
ចំនួនមតិ 0 | ចំនួនចែករំលែក 0

ប្ដីចាស់របស់ខ្ញុំ ជានិច្ចកាលនៅតែទាក់ទងមក សួរថាខ្ញុំមានសុភមង្គលឬអត់ ហើយថានៅនឹកខ្ញុំ។ ពេលនោះធ្វើឲ្យខ្ញុំមានអារម្មណ៍ថាមានកំហុសនឹងប្ដីបច្ចុប្បន្នខ្លាំងណាស់ ព្រោះខ្ញុំនៅតែមិនអាចបំភ្លេចអ្នកចាស់បាន។

ខ្ញុំឆ្នាំនេះឈានចូលវ័យ៣៦ឆ្នាំ ហើយធ្លាប់លែងលះប្ដីម្ដងរួចហើយ។ ប្ដីមុន និងខ្ញុំលែងគ្នាដោយសារតែគាត់មានស្រីខាងក្រៅ។ ស្រីម្នាក់នោះ មានចំណុចលេចធ្លោជាងខ្ញុំជាច្រើន ហើយសំខាន់នោះគឺអាចផ្ដល់កិត្តិយសឲ្យគាត់បានខ្ពស់មុខខ្ពស់មាត់ប្រសិនបើយកនាង ទើបគាត់លែងខ្ញុំ។ នៅពេលនោះ ខ្ញុំមានអាយុ២៧ឆ្នាំ មិនទាន់មានកូន ជាអ្នកខេត្តមករស់នៅទីក្រុង ជួលផ្ទះគេនៅ។ ២ឆ្នាំក្រោយការបែកបាក់នោះ ខ្ញុំរៀបការជាលើកទី២។ សព្វថ្ងៃ គ្រួសារខ្ញុំមានផ្ទះខ្លួនឯងតូចល្មមមួយនៅទីក្រុង និងមានកូន២នាក់។ និយាយរួមទៅគឺជីវិតមានក្ដីសុខ។

រូបតំណាង

តាមការពិត ខ្ញុំគួរតែពេញចិត្តនឹងអ្វីដែលខ្លួនមានសព្វថ្ងៃ ព្រោះប្ដីថ្មីមិនដែលយករឿងខ្ញុំធ្លាប់មានប្ដីមកធ្វើទុក្ខបុកម្នេញខ្ញុំឡើយ ទាំងដែលពេលការខ្ញុំ គេជាកម្លោះ និងប្អូនខ្ញុំ២ឆ្នាំក៏ដោយ។ មួយថ្ងៃៗ ក្រៅពីម៉ោងការងារគឺជាយកដាក់នឹងគ្រួសារជាទីបំផុត។ ដើម្បីអាចផ្គត់ផ្គង់ឲ្យគ្រួសារបានគ្រប់គ្រាន់ គាត់មិនដែលត្អូញត្អែរពីរឿងត្រូវធ្វើការដល់យប់ជ្រៅនោះឡើយ។ ដោយសារតែរៀនមិនបានខ្ពស់ ដូចនេះការងាររបស់គាត់ហត់ជាងគេច្រើន តែមិនដែលបង្ហាញឲ្យខ្ញុំ និងកូនឃើញឡើយ។

ការងារខ្ញុំគឺគណនេយ្យម្នាក់ ដោយសារតែការងារ ខ្ញុំមានឱកាសជួបអ្នកមានច្រើនគួរសម។ គួបផ្សំនឹងរូបរាងខ្ញុំគ្រាន់បើដែរ មិនខ្វះទេអ្នកដែលមានចិត្តលើខ្ញុំ។ ខ្ញុំមិនលោភលន់ឡើយ តែក៏មានមានគំនិតផ្លាស់ប្ដូរជីវិតដូចគេឯងដែរ។ ប្ដីចាស់យូរៗក៏នៅតែទាក់ទងមក សួរសុខទុក្ខ។ ការពិតពេលនោះ គេបែកខ្ញុំមិនមែនដោយសារតែអស់ស្រលាញ់ តែមកពីចង់ស្រវាអ្នកមានជាងខ្ញុំ។ មកទល់ពេលនេះ គេនៅតែមានចិត្តលើខ្ញុំ។ ច្រើនលើក ច្រើនសា ខ្ញុំមានអារម្មណ៍ថាខ្មាសខ្លួនឯង ព្រោះនៅនឹកប្ដីចាស់។ មួយព្រោះអនុស្សាវរីយ៍ចាស់ ហើយពីរគឺទឹកលុយរបស់គេតែម្ដង។ ព្រោះពេលនេះ គេបានមានមុខមាត់ហើយ ព្រោះប្រពន្ធថ្មី។ គេធ្លាប់បង្ហើបថា បើខ្វះខាតអាចរកគេបាន។ ខ្ញុំមានអារម្មណ៍ថាខ្លួនអាត្មានិយមខ្លាំង ពេលហុតទឹកសម្លឹងកាកដូចនេះ។ តែខ្ញុំពិតជាមិនអាចឃាត់អារម្មណ៍នេះពិតមែន។ តើខ្ញុំគួរធ្វើបែបណា ទើបភ្លេចគេបាន ?

ប្រភព៖ Phunuonline ប្រែសម្រួល៖ Caramel