ប្អូនប្រុស Fan Bingbing ត្រូវប៉ុស្តិ៍ទូរទស្សន៍ធ្វើបាបដោយសាររឿងអាស្រូវបងស្រី
- 2018-11-28 03:08:04
- ចំនួនមតិ 0 | ចំនួនចែករំលែក 0
ប្អូនប្រុស Fan Bingbing ត្រូវប៉ុស្តិ៍ទូរទស្សន៍ធ្វើបាបដោយសាររឿងអាស្រូវបងស្រី
យោងតាមបណ្ដាញព័ត៌មានចិន រឿងអាស្រូវគេចពន្ធរបស់កំពូលតារាសម្ដែងស្រី Fan Bingbing បានជះឥទ្ធិពលអវិជ្ជមានដល់ប្អូនប្រុសក៏ដូចជាគូដណ្ដឹងរបស់នាងជាទម្ងន់។
ផ្អែកតាមបណ្ដាញព័ត៌មាន Ifeng រឿងអាស្រូវគេចពន្ធរបស់តារាសម្ដែងស្រីជួរមុខចិន Fan Bingbing ជាថ្មីម្ដងទៀតបានប៉ះពាល់ដល់អាជីពជាតារាចម្រៀងរបស់ប្អូនប្រុសនាងយ៉ាងខ្លាំង។ តាមនោះដែរ ហេតុការណ៍នេះបានកើតឡើងកាលពីថ្ងៃទី២៥ ខែវិច្ឆិកា នៅពេលប្រុសស្អាតរូបនេះចូលរួមក្នុងកម្មវិធីល្បីឈ្មោះ Idol Hits China។ តាមនោះដែរ អ្នកគាំទ្ររបស់តារាចម្រៀងវ័យក្មេង Fan Chengcheng បានភ្ញាក់ផ្អើលជាខ្លាំងព្រោះវត្តមានរបស់តារាវ័យ១៨ឆ្នាំ នៅក្នុងកម្មវិធីត្រូវបានគេកាត់ចោលទាំងស្រុង ទោះបីជាលោកបានចូលរួមថតដូចសមាជិកដទៃដែរ។ សូម្បីតែឈ្មោះរបស់លោកក៏ត្រូវគេកាត់ចេញដូចគ្នា។ ក្នុងកម្មវិធីទាំងស្រុងប្រមាណ២ម៉ោង គេឃើញរូបលោកប្រមាណប៉ុន្មានវិនាទីតែប៉ុណ្ណោះ គឺរូបភាពពីចម្ងាយ និងរួមគ្នាជាក្រុមដែលពិបាកកាត់ចេញបាន។ នៅក្នុងវគ្គសម្ភាសន៍សមាជិក ប្រុសស្អាតកើតឆ្នាំ២០០០មិនត្រូវបានពិធីករសួរសំនួរមួយណាទាំងអស់។
តាមប្រភពដដែល នេះគឺបណ្ដាលមកពីរឿងអាស្រូវរបស់ Fan Bingbing ដែលធ្វើឲ្យប្អូនប្រុសនាងក៏ត្រូវរងលទ្ធផលបែបនេះ។ មិនត្រឹមតែ Fan Chengcheng ដែលត្រូវគេរើសអើង សូម្បីតែ Li Chen គូដណ្ដឹងស្រីស្អាតវ័យ៣៧ឆ្នាំក៏ត្រូវទទួលសកម្មភាពដូចនេះដូចគ្នា ព្រោះកាលពីថ្ងៃខួបរបស់លោកកាលពីថ្ងៃទី២៤ ខែវិច្ឆិកាមុននេះ គឺគ្មានតារារូបណាហ៊ានជូនពរលោកទាំងអស់ ព្រោះខ្លាចត្រូវរឿងអាស្រូវគេចពន្ធធ្វើឲ្យប៉ះពាល់ដល់ខ្លួន៕