ត្រូវគេកាត់កុងត្រាខ្ទេច Fan Bingbing នៅតែរក្សាបានកុងត្រាប្រេនលំដាប់កំពូលមួយ
- 2018-11-20 02:11:16
- ចំនួនមតិ 0 | ចំនួនចែករំលែក 0
ត្រូវគេកាត់កុងត្រាខ្ទេច Fan Bingbing នៅតែរក្សាបានកុងត្រាប្រេនលំដាប់កំពូលមួយ
សកម្មភាពថ្មីបំផុតរបស់ប្រេនសំលៀកបំពាក់កំពូលមួយបានបញ្ជាក់ឲ្យឃើញថា តារាសម្ដែងស្រីចិន Fan Bingbing នៅតែជាតារាជួរមុខដដែលទោះឆ្លងកាត់រឿងអាស្រូវធំប៉ុណ្ណាក៏ដោយ។
ក្រោយរឿងអាស្រូវគេចពន្ធឡើងដល់រាប់រយលានដុល្លារ កេរ្តិ៍ឈ្មោះរបស់តារាសម្ដែងស្រីជើងចាស់ចិន Fan Bingbing ត្រូវរងផលប៉ះពាល់ជាទម្ងន់។ ជាក់ស្ដែង ក្រៅពីត្រូវកាត់ចេញពីខ្សែភាពយន្តជាច្រើននោះ ស្រីស្អាតវ័យ៣៧ឆ្នាំ ក៏ត្រូវគេផ្ដាច់កុងត្រាធ្វើជាអ្នកតំណាងស្ទើរតែទាំងអស់ផងដែរ ព្រោះគេខ្លាចរូបភាពរបស់នាង នឹងជះឥទ្ធិពលអវិជ្ជមានលើប្រេនរបស់ពួកគេ។ អាស្រ័យហេតុនេះហើយ ទស្សនិកជនបានគិតថា តួរឿង “ព្រះនាងយេយេ” គឺអស់ផ្លូវរស់នៅក្នុងពិភពសិល្បៈហើយ។
យ៉ាងណាក្ដី មុននេះបន្តិច ប្រេនសំលៀកបំពាក់លំដាប់កំពូលពិភពលោកមួយ នៅតែជ្រើសយក Fan Bingbing ជាអ្នកតំណាងរបស់គេដដែល នោះគឺម៉ាកខោអាវ Louis Vuitton។ តាមនោះដែរ នៅក្នុងកម្មវិធីតាំងពិព័រណ៌ថ្មីបំផុតរបស់ខ្លួន ប្រេននេះបានតាំងរ៉ូបដែល តារាកើតឆ្នាំ១៩៨១ ស្លៀកក្នុងកម្មវិធី Cannes 2017 នៅកណ្ដាលសាលតែម្ដង ហើយក៏មានផ្លាកធំៗបញ្ជាក់យ៉ាងច្បាស់ថា Fan Bingbing គឺជាអ្នកតំណាងរបស់ពួកគេ។ សកម្មភាពរបស់ Louis Vuitton បានធ្វើឲ្យគេសរសើរគូដណ្ដឹង Li Chen យ៉ាងខ្លាំង ត្បិតជួបរឿងច្រើន តែនាងនៅតែមិនរបូតតំណែងតារាកំពូលរបស់ខ្លួនដដែល។
ជាមួយគ្នានេះដែរ ក៏ចាប់ផ្ដើមមានប្រេនដទៃទៀត ដែលចាប់ផ្ដើមប្រើរូបភាពរបស់នាងឡើងវិញ ដើម្បីធ្វើជាអ្នកតំណាង។ យោងតាមបណ្ដាញសង្គមរបស់ Fan Bingbing នាងនឹងចូលរួមក្នុងកម្មវិធីសិល្បៈដំបូងបង្អោះក្រោយរឿងអាស្រូវនៅថ្ងៃទី២០ ខែវិច្ឆិកាខាងមុខ៕