ទ្រាំលែងបាន កុំកុំ ប្ដឹងក្រុមហ៊ុនភាពយន្តដែលថាឲ្យលោកធ្វើឲ្យរឿងឡុងចុង

2018-11-17 04:23:04
ចំនួនមតិ 0 | ចំនួនចែករំលែក 0

ក្រោយពេលខាំមាត់សង្កត់ចិត្តជាយូរ កំពូលតារាសម្ដែងក្បាច់គុនចិន Donnie Yen បានសម្រេចចិត្តដាក់ពាក្យបណ្ដឹងក្រុមហ៊ុនផលិតភាពយន្ត “Ice Man” ដោយលើកឡើងថា ពួកគេបានប្រមាថកិត្តិយសលោក។

យោងតាមបណ្ដាញព័ត៌មាន Sina កាលពីថ្ងៃទី១៤ ខែវិច្ឆិកាមុននេះ តំណាងរបស់តារាចម្រៀងជើងចាស់ចិន Donnie Yen បានឲ្យដឹងថាពួកគេបានសម្រេចចិត្តដាក់ពាក្យបណ្ដឹង ប្ដឹងក្រុមហ៊ុនផលិតរឿង “Ice Man 2”។ មេធាវីរបស់តួរឿង “Ip Man” បានឲ្យដឹងថាក្រុមការងារខាងលើ បានចោទលក្ខណៈទម្លាក់កំហុសទាំងស្រុងលើកូនក្ដីរបស់ខ្លួន។ មិនតែប៉ុណ្ណោះ បានបៀតបៀនកេរ្តិ៍ឈ្មោះរបស់ កុំកុំជាទម្ងន់។ អាស្រ័យហេតុនេះ តារារូបនេះសម្រេចចិត្តនឹងប្ដឹងរឿងនេះដល់ទីបញ្ចប់។

“គ្រប់ការចោទប្រកាន់ទាំងអស់ គឺសុទ្ធតែជាពាក្យក្លែងក្លាយ។ ពួកខ្ញុំកំពុងប្រមូលភស្តុតាងដើម្បីផ្ញើទៅតុលាការ ដើម្បីការពារកេរ្តិ៍ឈ្មោះរបស់ Donnie Yen” មេធាវីដដែលឲ្យដឹង។

គួរបញ្ជាក់ផងដែរថា កាលពីដើមខែវិច្ឆិកាកន្លងទៅ ក្រុមការងាររឿង “Ice Man” បានបង្ហោះជាធារណៈលើបណ្ដាញសង្គមថា ដោយសារតែកុំកុំ ធ្វើចរិតឆ្មើងឆ្មៃ មិនព្រមសហការនឹងក្រុមការងារ ព្រមទាំងប្ដូរសាច់រឿងខ្លួនឯង ទើបធ្វើឲ្យរឿងដែលបោះទុន២៥លានដុល្លារនេះ ឡុងចុងជាទម្ងន់។ តារាវ័យ៥៥ឆ្នាំបានបកវិញថា មិនត្រឹមតែខ្លួនមិនបានលូកដៃចូលរឿងនោះទេ លោកថែមទាំងមិនទាន់បានទទួលលុយថតរឿងគ្រប់គ្រាន់ទៀតផង៕