រឿងរ៉ាវដែលអ្នកគួរដឹងពីមនុស្សស្រីចាស់ទុំម្នាក់

2018-11-14 05:30:00
ចំនួនមតិ 0 | ចំនួនចែករំលែក 0

ភាពចាស់ទុំមិនសំដៅទៅលើអាយុនោះទេ ព្រោះពេលខ្លះអាយុច្រើនតែនៅតែចរិតក្មេងក៏មាន។ ការអប់រំចិត្ត ការប្រឡូកជាមួយរឿងរ៉ាវច្រើន ឬអាចជាចរិតពីកំណើតរបស់មនុស្សម្នាក់ៗ។ យ៉ាងណាមិញអត្ថបទខាងក្រោមនឹងបង្ហាញអ្នកនូវរឿងរ៉ាវខ្លះរបស់មនុស្សស្រីដែលមានចរិតចាស់ចិត្ត ចាស់គំនិតម្នាក់៖

នាងមើលទៅសាមញ្ញបំផុត៖ ការរៀបចំខ្លួនរបស់នាងគ្មានភាពឆើតឆាយ និងទាន់សម័យអីប៉ុន្មានទេ តែនាងចូលចិត្តភាពជាខ្លួនឯង។ នាងស្លៀកពាក់បែបសាមញ្ញៗ ស្រួលខ្លួន ហើយមិនសូវជាខ្វល់ថា នាងមានភាពទាក់ទាញចំពោះអ្នកដទៃ ឬក៏អត់ទេ។ តែអ្វីដែលពិសេសគឺនាងមើលទៅប្លែក និងស្រស់ស្រាយចេញពីខាងក្នុងតែម្ដង ដោយមិនបាច់តុបតែងច្រើន។

មិនសូវជាចូលចិត្តនិយាយច្រើនប៉ុន្មានទេ៖ មនុស្សស្រីដែលចាប់ផ្ដើមចាស់ទុំគឺមិនសូវនិយាយរឿងអត់ប្រយោជន៍នោះទេ។ នាងភាគច្រើនគិតមុននិយាយ ព្រោះដឹងស្រាប់ហើយថាពាក្យសម្ដីអាចសម្លាប់មនុស្សបាន។ នាងអាចនឹងលេងសើចច្រើនបន្តិចនៅពេលនៅជិតមនុស្សមនុស្សជិតស្និទ្ធ ហើយអាចនឹងរាក់ទាក់ជាមួយមនុស្សទើបនឹងស្គាល់ ព្រោះនោះទើបជាភាពចាស់ទុំ មិនមែនក្រៅពីមិត្តភក្តិឯងមិននិយាយជាមួយនោះទេ។

គ្រប់គ្រងអារម្មណ៍បានល្អ៖ នាងអាចទប់អារម្មណ៍នៅពេលមានរឿងប៉ះទង្គិចមកលើនាង ហើយព្យាយាមរកដំណោះស្រាយជាជាងអង្គុយ យំ អង្គុយពិបាកចិត្ត។ នាងអាចគ្រប់គ្រងអារម្មណ៍បាន មិនឲ្យបែងចែកខុសរបៀបនោះទេ។ មួយវិញទៀតនាងមិនមែនជាមនុស្សខឹងគោ វាយរទេះ។

មិនផ្ញើក្ដីសុខខ្លួនឯងទៅឲ្យអ្នកណា៖ នាងមិនផ្ញើសុភមង្គលខ្លួនឯងទៅឲ្យអ្នកណាងាយៗនោះទេ ព្រោះនាងជឿថាគ្មានអ្នកណាស្រឡាញ់នាងជាងនាងស្រឡាញ់ខ្លួនឯងឡើយ។ នាងមិនឲ្យអ្នកណាមកជាន់ឈ្លីទឹកចិត្តនាង ឬមើលស្រាលតម្លៃរបស់នាងបានឡើយ។

ពេលវេលាគឺមានតម្លៃណាស់សម្រាប់នាង៖ នាងមិនយកពេលទៅអង្គុយគិតរឿងអត់ប្រយោជន៍ ឬចេះដឹងរឿងអ្នកដទៃនោះទេ។ នាងចូលចិត្តចំណាយពេលទៅលើអ្វីដែលធ្វើឲ្យនាងរីកចម្រើន និងសប្បាយចិត្ត។

មិនសូវមានមនុស្សក្បែរខ្លួនប៉ុន្មានឡើយ៖ នាងភាគច្រើនមើលទៅឯកាណាស់ ព្រោះនាងមិនសូវជាមានមិត្តភក្តិអីច្រើនឡើយ ឬពេលខ្លះសូម្បីមនុស្សប្រុសដែលនាងស្រឡាញ់ក៏គ្មានដែរ។ ប៉ុន្តែនាងមិនសូវជាខ្វល់រឿងហ្នឹងប៉ុន្មានទេ មានអ្នកជិតស្និទ្ធម្នាក់ ពីរនាក់គ្រប់គ្រាន់ហើយ។

រើសមនុស្សប្រុសបែបចាស់ទុំដូចគ្នា៖ រូបសម្បត្តិជារឿងមួយផ្នែកតូច តែមនុស្សស្រីចាស់ទុំ នាងចូលចិត្តមនុស្សប្រុសដែលមានបញ្ញា ខ្ពស់ និងឆ្លាត ហើយមានភាពរឹងមាំ។