គន្លឹះល្អៗជួយឲ្យអ្នកក្លាយជានារីជោគជ័យទាំងវ័យក្មេង
- 2018-11-13 06:17:42
- ចំនួនមតិ 0 | ចំនួនចែករំលែក 0
គន្លឹះល្អៗជួយឲ្យអ្នកក្លាយជានារីជោគជ័យទាំងវ័យក្មេង
នារីគ្រប់រូបសុទ្ធតែចង់ឲ្យខ្លួនឯងជោគជ័យទាំងវ័យក្មេងមិនថាចំពោះជីវិតផ្ទាល់ខ្លួន ឬរឿងការងារឡើយ។ ប៉ុន្តែផ្លូវទៅកាន់ភាពជោគជ័យនេះមិនងាយស្រួលដូចដែលយើងគិតនោះទេ វាទាមទារឲ្យយើងរុករកវា បញ្ចេញសកម្មភាព និងមានក្ដីរំពឹងក្នុងជីវិត។ ទោះបីជាលំបាកបន្តិចមែន តែគន្លឹះខាងក្រោមនេះអាចជួយបាន៖
គន្លឹះជោគជ័យរឿងជីវិតផ្ទាល់ខ្លួន៖
ត្រូវមានគោលដៅជីវិតថាខ្លួនចង់បានអី? ចង់សម្រេចអ្វី? នៅកន្លែងណា? ហើយទៅណា? នោះទើបអ្នកដឹងថាអ្នកត្រូវដើរតាមផ្លូវណា ហើយមានអ្វីខ្លះជួយគាំទ្រអ្នក។
ភាពជឿជាក់គឺជាគន្លឹះយ៉ាងរឹងមាំដែលជួយឲ្យអ្នកឈានទៅរកភាពជោគជ័យ ព្រោះបើអ្នកគ្មានទំនុកចិត្តលើខ្លួនឯង អ្នកក៏មិនអាចធ្វើអ្វីបានដែរ។
កុំគិតថាខ្លួនឯងល្អឥតខ្ចោះ មិនចាំបាច់ស្ដាប់អ្នកណា។ ការដែលមានមោទនភាពលើខ្លួនឯងជ្រុលអាចនាំឲ្យអ្នកបរាជ័យបាន ព្រោះនៅក្នុងលោកនេះមានរឿងដែលអ្នកមិនចេះ មិនដឹង ហើយត្រូវរៀនច្រើនណាស់។
ទំនាក់ទំនងល្អក៏ជាចំណុចខ្លាំងមួយជួយឲ្យអ្នកសម្រេចក្ដីស្រមៃអ្នកដែរ ដូច្នេះអ្នកគួរតែមានការរាបឮអានមួយជាមួយមិត្តភក្ដិ គ្រួសារ ឬដៃគូការងារណាឲ្យបានល្អ។ មានមនុស្សល្អៗនៅជិតខ្លួន អ្នកកាន់តែជោគជ័យ។
ត្រូវចេះថែរក្សាខ្លួនឯងឲ្យបានល្អទាំងផ្លូវចិត្ត និងផ្លូវកាយ ព្រោះមានផ្នែកណាមួយមានបញ្ហា អ្នកក៏អាចប៉ះទង្គិចខ្លាំងលើគោលដៅអ្នកដែរ។ សុខភាពគឺសំខាន់ ផ្លូវចិត្តរឹតតែសំខាន់ ដូច្នេះត្រូវចេះថែរក្សាឲ្យបានល្អ។
លុយមុននឹងចាយគួរតែគិត ព្រោះបើអ្នកចេះតែចាយគ្មានដឹងក្បាល ដឹងកន្ទុយ អ្នកអាចជួបបញ្ហាលុយកាក់បាន។
គន្លឹះជោគជ័យលើការងារដែលខ្លួនកំពុងមាន
អ្នកគួរតែទម្លាប់មានផែនការការងារឲ្យបានច្បាស់លាស់ ព្រោះបើចេះតែធ្វើមួយថ្ងៃរួចមួយថ្ងៃ អ្នកពិតជាមិនងាយឡើងទៅកន្លែងដែលខ្ពស់នោះទេ។
ទទួលការអប់រំ និងការបណ្ដុះបណ្ដាលផ្សេងៗឲ្យបានច្រើនតាមដែលអាចធ្វើទៅបាន ព្រោះវាសុទ្ធតែមានប្រយោជន៍សម្រាប់អ្នក។ កាន់តែមានចំណេះដឹង សមត្ថភាពអ្នកក៏កាន់តែខ្លាំង ហើយគំនិតអ្នកធ្វើការក៏កាន់តែទូលាយ។
អ្នកត្រូវមានទំនុកចិត្តហើយជឿថាអ្នកនឹងជោគជ័យលើការងារដែលអ្នកកំពុងធ្វើ ហើយអ្នកអាចធ្វើបានយ៉ាងល្អ។
ធ្វើការងារដែលអ្នកស្រឡាញ់ ទើបអ្នកអាចរកឃើញអ្វីជាខ្លួនឯងបាន។ ម្យ៉ាងទៀតពេលដែលអ្នកស្រឡាញ់ការងារនោះ អ្នកនឹងគ្មានអារម្មណ៍ថាហត់ ចង់បោះបង់ឡើយ។
កុំខ្លាចនឹងការប្រថុយប្រថាន ព្រោះបើអ្នកនៅតែមួយកន្លែងដដែលៗ ជីវិតអ្នកគ្មានរីកចម្រើនទេ។ ចេញទៅរកអ្វីដែលប្លែក ដែលថ្មី និងរៀនពីវា។
កុំធ្វើជាមនុស្សគល់ឈើនៅកន្លែងធ្វើការឲ្យសោះ អ្នកត្រូវចេះទាក់ទងជាមួយមនុស្សជុំវិញខ្លួន។ នេះគឺជាការពង្រឹងទំនាក់ទំនងការងារ ហើយវាក៏ជួយអ្នកបានយ៉ាងប្រសើរផងដែរ។
គិតតែការងរខ្លាំងពេកក៏មិនល្អដែរ អ្នកត្រូវមានពេលវេលាខ្លះសម្រាប់សម្រាក យកកម្លាំងមកបន្តក្ដីស្រមៃអ្នកទៀត៕
ចុចអាន៖ទម្លាប់ល្អ៥យ៉ាង នារីសម័យថ្មីតែងមានជាប់ខ្លួន