គុណសម្បត្តិ ៥ យ៉ាងក្រោយរៀបការ អ្នក single អានរួចលែងចង់ single តទៀតហើយ

2018-11-12 03:47:06
ចំនួនមតិ 0 | ចំនួនចែករំលែក 0

តើអ្នកមានអារម្មណ៍ថាស្ទាក់ស្ទើរមែនទេ? តើគួររៀបការដែរទេ? ការរៀបអាពាហ៍ពិពាហ៍ ស្តាប់ទៅដូចជាមានរឿងរ៉ាវជាច្រើនដែលអ្នកត្រូវទទួលរ៉ាប់រង រួមទាំងគុណវិបត្តិដែលអ្នកតែងគិតខ្វល់ខ្វាយក្នុងចិត្ត ជាពិសេសគឺបាត់បង់សេរីភាព។ ទោះជាបែបនេះក្តី ការរៀបការនៅតែមានចំណុចល្អដែលអាចធ្វើឲ្យអ្នកលែងចង់នៅលីវតទៀត ក្រោយបានដឹងពីគុណសម្បត្តិ៥យ៉ាងនេះរួច។

១. ជួយឲ្យអ្នកមានអារម្មណ៍ល្អ

រស់នៅជាមួយគ្នា ប៉ះទង្គិចតិចតួចជៀសមិនផុតទេ សំខាន់គ្មានក្តីសុខណាអាចប្រៀបផ្ទឹមបាន នឹងការរស់នៅជាមួយមនុស្សដែលខ្លួនស្រលាញ់ឡើយ។ មនុស្សពីរនាក់ស្រលាញ់គ្នា យល់ចិត្តគ្នា បង្កើតសុភមង្គលជាមួយគ្នា ថែមទាំងអាចជួយលើកទឹកចិត្ត បង្កភាពសប្បាយរីករាយ ពេលដែលដៃគូមានអារម្មណ៍មិនល្អ។

២. ជួយឲ្យអ្នកមានអាយុវែង

ដោយសារតែចង់រួមរស់ជាមួយប្តីឬប្រពន្ធឲ្យបានយូរ ចង់បង្កើតគ្រួសារមួយដ៏មានន័យ ទើបធ្វើឲ្យមនុស្សយើង ងាកមកផ្តោតលើការថែរក្សាសុខភាព ត្បិតពីមុនមិនសូវខ្វល់ក៏ដោយ ជាហេតុធ្វើឲ្យជីវិតរបស់អ្នកអាចរស់នៅបានយូរអង្វែងជាងមុន។

៣. ជួយឲ្យអ្នកចេះសន្សំសំចៃ

ជីវិតគូត្រូវមានការពឹងផ្អែកគ្នាទៅវិញទៅមក ដូចជាថ្លៃចំណាយប្រចាំថ្ងៃនិងប្រចាំខែជាដើម គឺមានការកើនឡើងខ្ពស់ជាងពេលដែលអ្នកមិនទាន់រៀបការ ដូច្នេះហើយបានជាអ្នកចាំបាច់ត្រូវចេះបែងចែកលុយកាក់ឲ្យបានច្បាស់លាស់ និងសន្សំសំចៃឲ្យបានល្អ។

៤. លែងមានភាពឯកាកណ្តោចកណ្តែងម្នាក់ឯង

នេះហើយជាធំចំណុចធំមួយដែលធ្វើឲ្យមនុស្សភាគច្រើនសម្រេចចិត្តចង់រៀបការ។ ពេលដែលអ្នកនៅលីវយូរ អ្នកប្រាកដជាមានអារម្មណ៍ថាឯកា ពេលឃើញអ្នកផ្សេងរៀបការមានក្តីសុខ ហើយពេលខ្លះទោះបីស្ថិតនៅក្នុងចំណោមមនុស្សច្រើនប៉ុនណា ក៏នៅតែគិតថាខ្លួនឯងកណ្តោចកណ្តែង។ រហូតបានជួបក្តីស្រលាញ់ពិត នោះជីវិតអ្នកនឹងលែងអារម្មណ៍ថាខ្វះអ្វីម្យ៉ាងដូចកាលពីមុនទៀត។

៥. ធ្វើឲ្យស្នេហាស្ថិតស្ថេរបានយូរ

គ្រាន់តែការរៀបការ ក៏អាចធ្វើឲ្យស្នេហាស្ថិតស្ថេរយូរបានយូរដែរ ព្រោះអ្នកទាំងពីរនឹងមានទំនុកចិត្តខ្ពស់លើគ្នា ជាងពេលនៅជាសង្សារ។ ពាក្យសន្យា ព្រមទាំងសាក្សីជាច្រើនក្នុងថ្ងៃមង្គលការ បានក្លាយជាចំណងអាពាហ៍ពិពាហ៍ដ៏រឹងមាំសម្រាប់អ្នកទាំងពីរ។

ឃើញទេ ការរៀបការមិនមែនអាក្រក់ដូចអ្វីដែលអ្នកធ្លាប់បានគិតឡើយ។ គ្រប់យ៉ាងតែងមានគុណសម្បត្តិនិងគុណវិបត្តិ ដូច្នេះកុំចាំបាច់ស្ទាក់ស្ទើរអី កាលណាបានជួបមនុស្សដែលអ្នកស្រលាញ់ហើយ រៀបការជាមួយគ្នា មិនមែនជារឿងគួរឲ្យខ្លាចទៀតទេ៕

ចុចអានបន្ត៖