ប្លែកមាត់! នំបញ្ចុកសម្លណាំយ៉ាគ្រឿងសមុទ្រ ទំនងឆ្ងាញ់ មិនពិបាកធ្វើ
- 2018-11-09 09:24:26
- ចំនួនមតិ 0 | ចំនួនចែករំលែក 0
ប្លែកមាត់! នំបញ្ចុកសម្លណាំយ៉ាគ្រឿងសមុទ្រ ទំនងឆ្ងាញ់ មិនពិបាកធ្វើ
ធ្លាប់ឃើញគេ Share ច្រើនមកហើយអំពីវិធីធ្វើសម្លការី និងសម្លប្រហើរសម្រាប់ញ៉ាំជាមួយនំបញ្ចុក អីចឹងទេថ្ងៃនេះកញ្ញាសូមចែករំលែកអំពីវិធីធ្វើសម្លណាំយ៉ាគ្រឿងសមុទ្រវិញម្ដងដែលអាចនិយាយថាប្លែកបន្តិចសម្រាប់គ្នាយើង។ យ៉ាងណាមិញ វិធីធ្វើគឺមិនមានអ្វីស្មុគស្មាញឡើយ។
ជាដំបូងគឺត្រូវយកសាច់ត្រីប្លាធូដែលស្ងោរ ឬចំហុយឆ្អិន (ប្រើសាច់ត្រីផ្សេងៗក៏បានតាមចូលចិត្ត) មកបុកជាមួយម្ទេសក្រៀមចិញ្ច្រាំ។ បន្ទាប់មកយកខ្ទិះដើមចាក់ចូលឆ្នាំង បើកភ្លើងឲ្យពុះ រួចដាក់សាច់ត្រីនិងម្ទេសដែលបុករួចចូល តាមដោយខ្ទិះលាយទឹកចំនួន ២ចានគោម ទឹកត្រី ២ស្លាបព្រា ស្ករត្នោត ២ស្លាបព្រា និងប្រហិតត្រីចូល។ កូរល្មមប្រហិតត្រីឆ្អិន អាចបិទភ្លើង ហើយរៀបញ៉ាំជាមួយនំបញ្ចុកបានហើយ។ ចំណែកគ្រឿងសមុទ្រ អាចស្ងោរ ឬស្រុះដោយឡែក។ ទស្សនាវីដេអូខាងក្រោមតែម្ដង៖
គ្រឿងផ្សំ៖
ខ្ទិះដើម ១ចានគោម
ខ្ទិះចុង ១ចានគោម
ម្ទេសក្រៀមចិញ្ច្រាំ ៣ស្លាបព្រាបាយ
សាច់ត្រីបា្លធូ ១
ទឹកត្រី ២ស្លាបព្រាបាយ
ស្លឹកក្រូចសើច ៣សន្លឹក
នំបញ្ចុក និងបន្លែល្បោយតាមចូលចិត្ត
បង្កង ឬបង្គា ៣ក្បាល មឹក ២ក្បាល និងប្រហិតត្រី ៥០ក្រាម