ស្រីស្អាតទម្លាយរូបមន្តសម្រកទម្ងន់បាន ១៩គីឡូ ដោយវិធីងាយៗបំផុត
- 2018-11-06 04:58:36
- ចំនួនមតិ 0 | ចំនួនចែករំលែក 0
ស្រីស្អាតទម្លាយរូបមន្តសម្រកទម្ងន់បាន ១៩គីឡូ ដោយវិធីងាយៗបំផុត
ជឿថាមនុស្សស្រីជាច្រើនដែលមានក្ដីស្រមៃចង់បានរាងស្អាត ព្រោះវាជាចំណែកមួយដែលធ្វើឲ្យពួកគេកាន់តែមានភាពជឿជាក់លើខ្លួនឯង ស្លៀកពាក់អ្វីក៏ស្អាត ថតរូបពីជ្រុងណាក៏មើលទៅស្អាត។ សម្រាប់អ្នកដែលកំពុងស្វែងរកវិធីសម្រកទម្ងន់ដែលបានផល ថ្ងៃនេះកញ្ញាសូមចែករំលែកអំពីវិធីសម្រកទម្ងន់របស់តារាអ៊ីនធឺណិតម្នាក់ឈ្មោះ Belllybang ដែលអាចសម្រកទម្ងន់បានជោគជ័យ គឺរហូតដល់ ១៩គីឡូ។ ចង់ដឹងថាវិធីសម្រកទម្ងន់របស់នាងមានអ្វីខ្លះ សូមអានខាងក្រោមនេះតែម្ដង៖
១. ផឹកទឹកឲ្យច្រើន
Bell បានឲ្យដឹងថានាងតែងព្យាយាមផឹកទឹកឲ្យបានមួយថ្ងៃ ១លីត្រកន្លះ ទៅ២លីត្រ ដើម្បីលាងជាតិពុលចេញពីរាងកាយ ធ្វើឲ្យប្រព័ន្ធរំលាយអាហារធ្វើការបានស្រួល ថែមទាំងជួយកាត់បន្ថយការឃ្លានអាហារបានទៀតផង ដោយព្យាយាមផឹកទឹកម្ដងបន្តិចៗពេញមួយថ្ងៃ និងផឹកទឹក១កែវ ឬ២កែវមុនញ៉ាំបាយ។
២. បែងចែកអាហារតាមពេល
ពេលព្រឹកគឺនាងផ្ដោតលើការញ៉ាំបាយឲ្យឆ្អែត ជាមួយស៊ុតស្ងោរ ស៊ុតចំហុយ និងទឹកស៊ុប ចំណែកពេលថ្ងៃត្រង់គឺផ្ដោតលើប្រូតេអ៊ីន ដូចជា Steak សាច់មាន់ Steak សាច់ជ្រូក ឬបាយសាច់ទ្រូងមាន់ស្ងោរ។ ចំណែកពេលល្ងាចគឺញ៉ាំអាហារដែលងាយរំលាយ មានកាឡូរីទាប ដូចជាសាច់មាន់ជាមួយបុកល្ហុង ស៊ុត ទឹកសណ្ដែកជាដើម ប៉ុន្តែបើថ្ងៃណាមិនសូវឃ្លាន នាងនឹងញ៉ាំតែផ្លែឈើតិចតួចប៉ុណ្ណោះ។ អ្វីដែលសំខាន់គឺត្រូវញ៉ាំឲ្យបានមុនចូលគេងចំនួន ៦ម៉ោង ដើម្បីឲ្យរាងកាយមានពេលវេលារំលាយអាហារមុនពេលគេងលក់។
៣. ផ្លាស់ប្ដូរទម្លាប់ញ៉ាំនំកញ្ចប់ផ្សេងៗ មកជាការញ៉ាំផ្លែឈើ
Bell គឺជាមនុស្សស្រីដែលមានចូលចិត្តញ៉ាំនំផ្សេងៗដូចគ្នាមិនថានំកញ្ចប់ នំខេក ឬគុកគីផ្សេងៗ ប៉ុន្តែនៅពេលសម្រកទម្ងន់ បើនាងមានអារម្មណ៍ថាហេវនៅចន្លោះម៉ោងបាយ នាងនឹងញ៉ាំផ្លែឈើជំនួសវិញ ដូចជាផ្លែឪឡឹក ក្រូច ល្ហុង ជម្ពូ និងផ្លែប៉ោម ដែលអាចជួយរក្សាទម្ងន់ និងធ្វើឲ្យឆ្អែតដូចគ្នា។
៤. ដើរឲ្យបានច្រើន
ពេលសម្រកទម្ងន់ដំបូងៗ Bellybang គ្រាន់តែគ្រប់គ្រងអាហារតែម្យ៉ាងប៉ុណ្ណោះ មិនបានហាត់ប្រាណឡើយ ប៉ុន្តែនៅពេលសម្រកបាននៅសល់ ៥០គីឡូ ក៏ចាប់ផ្ដើមមានអារម្មណ៍ថាគីឡូលែងស្រកទៀត ដូច្នេះហើយទើបនាងងាកមកហាត់ប្រាណដោយការដើរច្រើនៗ ដើម្បីដុតកាឡូរី និងយឹតបន្តឹងសាច់ដុំ។ នាងបានព្យាយាមដើរឲ្យបាន ៥០០០ជំហានក្នុងមួយថ្ងៃ។ ការដើរគឺជាវិធីសម្រកទម្ងន់ដែលមិនធ្វើឲ្យនឿយហត់ខ្លាំងឡើយ ប៉ុន្តែអាចសម្រកទម្ងន់បានផលល្អតែម្ដង។
៥. ហាត់ប្រាណស្រាលៗ
ដោយសារមិនចូលចិត្តការហាត់ប្រាណខ្លាំងៗ Bell បានជ្រើសរើសការហាត់ប្រាណងាយៗនៅផ្ទះ និងជិះកង់ ឬធាក់កង់ យ៉ាងហោច ៤៥នាទី ដោយហាត់ប្រាណបែបនេះយ៉ាងតិច ៣ទៅ៥ថ្ងៃក្នុងមួយសប្ដាហ៍។ ចំណែកចន្លោះម៉ោងថ្ងៃៗនាងក៏ព្យាយាមធ្វើចលនាច្រើន ដើម្បីឲ្យរាងកាយបានបញ្ចេញកម្លាំង ដូចជាធ្វើការងារផ្ទះ លោត ឬលើកជើងតិចៗ។
៦. គេងឲ្យបានគ្រប់គ្រាន់
អាថ៌កំបាំងមួយទៀតដែលធ្វើឲ្យនាងស្រកទម្ងន់បានជោគជ័យគឺការគេងលក់ និងសម្រាកឲ្យបានគ្រប់គ្រាន់។ Bell តែងគេងយ៉ាងហោច ៨ម៉ោងក្នុងមួយថ្ងៃ ព្រោះការគេងនឹងធ្វើឲ្យរាងកាយបញ្ចេញអ័រម៉ូនម្យ៉ាងដែលជួយរម្ងាប់ការចង់អាហារ មិនធ្វើឲ្យយើងចង់ញ៉ាំលើសធម្មតា ៕