៦សញ្ញាបង្ហាញថាអ្នកជាមនុស្សរឹងមាំខ្លាំង រហូតធ្វើឲ្យអ្នកដទៃខ្លាច

2018-11-09 09:54:58
ចំនួនមតិ 0 | ចំនួនចែករំលែក 0

អ្នកដែលមានបុគ្គលិកលក្ខណៈរឹងមាំអាចនឹងធ្វើឲ្យមនុស្សភាគច្រើនយល់ច្រឡំថា បុគ្គលប្រភេទនេះមិនសូវបើកចិត្តងាយៗ នៅពេលជួបអ្នកដទៃលើកដំបូង។ កាន់តែសំខាន់ ពួកគេអាចនឹងត្រូវមើលឃើញថាជាមនុស្សសោះកក្រោះ នឹងន ឬកាចឆ្នាសថែមទៀត។ នៅមានអាថ៌កំបាំងជាច្រើនទៀតដែលលាក់កប់ខាងក្រោយលក្ខណៈខាងក្រៅរបស់បុគ្គលប្រភេទនេះ បើទោះបីពួកគេអាចនឹងមិនដឹងខ្លួនថាទង្វើរបស់ពួកគេកំពុងធ្វើឲ្យអ្នកដទៃខ្លាចក្រែងក្ដី ហើយខាងក្រោមនេះគឺជាសញ្ញាទាំង ៦ដែលប្រាប់ថាចរិតខាងក្រៅរបស់អ្នកកំពុងធ្វើឲ្យអ្នកដទៃខ្លាចរអា៖

រូបតំណាង

**១. មិនបង្ហិនពេលវេលាជាមួយរឿងតូចតាចក្នុងជីវិត**

ពេលវេលារបស់អ្នកគឺសំខាន់បំផុត ដូច្នេះអ្នកនឹងមិនចំណាយពេលធ្វើអ្វីដែលគ្មានប្រយោជន៍ ឬប្រើពេលនៅជាមួយមនុស្សដែលអ្នកមិនចូលចិត្តនោះទេ។

២. មើលឃើញវិធីដោះស្រាយបញ្ហា ខណៈដែលអ្នកដទៃមើលឃើញតែបញ្ហា

អ្នកមើលឃើញវិធីដោះស្រាយបញ្ហា ខណៈដែលអ្នកដទៃរវល់តែភិតភ័យជាមួយបញ្ហា និងផលប៉ះពាល់របស់វា។ ពួកគេរមែង សម្លឹងមើលឃើញវែងឆ្ងាយជាងអ្នកដទៃ និងត្រៀមខ្លួនរួចរាល់ជានិច្ចក្នុងការដោះស្រាយបញ្ហានានា។

៣. ចូលចិត្តនិយាយត្រង់ៗតាមអ្វីដែលខ្លួនកំពុងគិត

មនុស្សប្រភេទនេះចូលចិត្តត្រង់ទៅត្រង់មក និងតែងនិយាយពីអារម្មណ៍ពិតៗរបស់ខ្លួនឯងដែលខុសពីអត្តចរិតរបស់មនុស្សជាច្រើនទៀត។ ទោះយ៉ាងណា ពួកគេគឺគ្រាន់បើជាងមនុស្សដែលចូលចិត្តនិយាយ ប៉ុន្តែមិនព្រមធ្វើ។

៤. ឆ្លាតលើសអាយុ

ធម្មតាមនុស្សដែលមានចរិតចាស់ទុំតែងឆាប់ចូលចុះជាមួយអ្នកដទៃបានងាយ ប៉ុន្តែក៏នៅមានរឿងធ្វើឲ្យអ្នកដទៃមានអារម្មណ៍មិនសូវស្រួលដែរ។ ពួកគេមានភាពវៃឆ្លាត ថែមទាំងអាចវាយតម្លៃរឿងផ្សេងៗបានយ៉ាងគួរឲ្យសរសើរ ដែលធ្វើឲ្យអ្នកដទៃមានអារម្មណ៍ថាខ្លាចរអាម្ដងៗ។

៥. ចូលចិត្តធ្វើអ្វីថ្មីៗ

អ្នកចូលចិត្តការសាកល្បង ស្រឡាញ់ការប្រឈមមុខនឹងឧបសគ្គ សប្បាយរីករាយនឹងសាកល្បងធ្វើអ្វីថ្មីៗ ហើយគិតថាបរាជ័យគឺគ្មានអ្វីគួរឲ្យខ្លាច ដោយសារអ្នកអាចក្រោកឈរវិញបានបន្ទាប់ពីនោះ។ អ្នកព្រមទទួលយកការប្រថុយប្រថាន និងចូលចិត្តការធ្វើដំណើរឆ្ងាយៗតែម្នាក់ឯង។

៦. មិនអាចឲ្យអ្នកណាប្រមាថ

អ្នករំពឹងថាអ្នកដទៃមានភាពពិតប្រាកដ និងត្រង់ទៅត្រង់មកមិនខុសពីអ្វីដែលអ្នកធ្វើចំពោះគេ ដូច្នេះអ្នកនឹងទ្រាំមិនបានឡើយ ប្រសិនបើត្រូវអ្នកដទៃប្រមាថ ហើយនឹងសុំឲ្យគេផ្លាស់ប្ដូរទង្វើ ប្រសិនបើគេនៅត្រូវការទំនាក់ទំនងជាមួយអ្នក។

យ៉ាងណាក៏ដោយ អ្នកដែលមានចំណុចទាំងអស់នេះ គឺចាត់ទុកថាមានលក្ខណៈពិសេសប្លែក ហើយជាគុណសម្បត្តិដែលមានជាប់ខ្លួនគេមួយជីវិតតែម្ដង។ ទោះយ៉ាងណា ក្នុងកាលៈទេសៈខ្លះអ្នកក៏គួរបន្ទន់ខ្លួន ឬសម្របខ្លួនបន្តិចដើម្បីឲ្យទំនាក់ទំនងកាន់តែប្រសើរ ៕

ប្រភព៖ issue247 ប្រែសម្រួល៖ ស្វាយ វ៉ាន់ថន