កំហុសធំ ៣ ដែលអាចធ្វើឲ្យហាងកាហ្វេខាតដើមខាតចុងដួលរលំ
- 2018-11-02 06:19:24
- ចំនួនមតិ 0 | ចំនួនចែករំលែក 0
កំហុសធំ ៣ ដែលអាចធ្វើឲ្យហាងកាហ្វេខាតដើមខាតចុងដួលរលំ
នាពេលបច្ចុប្បន្ននេះ ដោយសារតែការនិយមផឹកកាហ្វេកើនឡើងគួរឲ្យកត់សម្គាល់ ទើបមានហាងកាហ្វេរីកដុះដាលជាច្រើនកន្លែងមិនថាក្នុងទីប្រជុំជន ឬជាយក្រុងឡើយ។ បើសង្កេតមើលទៅឃើញថាមានតម្រូវការច្រើនពិតមែន ប៉ុន្តែមូលហេតុអ្វី បានជាហាងកាហ្វេមួយចំនួន ទីបំផុតនៅតែដួលរលំបិទទ្វារ?
ថ្ងៃនេះ វិបសាយ "កញ្ញា” បានធ្វើបទសម្ភាសន៍ ជាមួយម្ចាស់ហាងកាហ្វេ ឈ្មោះថា លី សូនីតា ដែលធ្លាប់ឆ្លងកាត់ភាពបរាជ័យលើមុខជំនួញកាហ្វេ ដល់ទៅខ្ទង់ម៉ឺនដុល្លារ។ អតីតម្ចាស់ហាងកាហ្វេរូបនេះ នឹងចែករំលែកបទពិសោធន៍ខ្លះៗ ដល់អ្នកទាំងអស់គ្នា ជាពិសេសអ្នកមានបំណងចង់បើកហាងកាហ្វេ ដើម្បីអាចជៀសផុតពីកំហុសធំៗ ខាតបង់ដូចជានាង។
១. មិនបានធ្វើការសិក្សាស្រាវជ្រាវលើគម្រោងឲ្យបានច្បាស់លាស់
ក្លាយជាម្ចាស់ហាងកាហ្វេមួយរូប គឺជាក្តីស្រមៃរបស់នាងតាំងយូរមកម្ល៉េះ ដូច្នេះហើយពេលដែលឱកាសមកដល់ នាងក៏ចាប់ផ្តើមធ្វើគម្រោង ដោយមិនបានសិក្សាស្រាវជ្រាវឲ្យបានល្អិតល្អន់ ពីចំណុចសំខាន់ផ្សេងទៀតដូចជា កម្រិតនៃការចំណាយដើមទន់ គូប្រកួតប្រជែង ស្វែងយល់ពីប្រភពគ្រាប់កាហ្វេ....។ មុនគិតដល់ភាពជោគជ័យលើមុខជំនួញជួញដូរអ្វីមួយ ដាច់ខាតមិនត្រូវមើលរំលងពីហានិភ័យរបស់វានោះទេ។
ចុចអាន៖ អ្នកមានគម្រោងបើកហាងកាហ្វេ ត្រូវដឹងពីហានិភ័យទាំងនេះសិន
២. មិនពិនិត្យមើលលើទីតាំង
ទីតាំងពិតជាសំខាន់ដែលអ្នកគួរយកចិត្តទុកដាក់បំផុត។ "ជាក់ស្តែងទីតាំងហាងកាហ្វេរបស់ខ្ញុំ ស្ថិតក្នុងតំបន់មានមនុស្សច្រើនគួរសម ប៉ុន្តែឧបសគ្គចម្បងនោះគឺ ទីធ្លាខាងក្រុងមិនសូវធំទូលាយ ចំណតតូចចង្អៀត បាំងដោយរនាំងផ្លូវ និងមានហាងកាហ្វេថ្មីៗ យីហោល្បីៗ ច្រើនរាប់មិនអស់នៅជុំវិញនោះ"។ សូនីតា បញ្ជាក់។
៣. មិនបានត្រៀមទុកលុយបម្រុង
ការចំណាយដើមទុនមិនមែនដូចអ្វីដែលបានគ្រោងទុកទាំងស្រុងនោះទេ។ ថ្លៃតុបតែងហាង សម្ភារៈនានា បុគ្គលិក និងឈ្នួលផ្ទះ តែងតែលើសចំនួនដែលបានកំណត់ ជាហេតុបណ្តាលឲ្យមានហានិភ័យខ្ពស់ប្រសិនបើហាងដំណើរការមិនរលូន។ កាន់តែពិបាកជាងនេះទៅទៀត ពេលដែលអ្នកគ្មានលុយគ្រប់គ្រាន់ទុកសម្រាប់បម្រុង ទប់ឈ្នួលផ្ទះជាដើម វានឹងធ្វើឲ្យការរកស៊ីដួលរំលំមុនពេលទទួលបានផលចំណេញ។
ភាពបរាជ័យមួយនេះមិនមែនជាចំណុចបញ្ចប់ ប៉ុន្តែជាមេរៀនដ៏ល្អសម្រាប់រៀនសូត្របន្ថែមនិងកែប្រែឲ្យប្រសើរឡើងទៅថ្ងៃអនាគត់ ហើយនាងក៏មិនបោះបង់ក្តីស្រមៃដែរ គ្រាន់តែត្រូវការពេលវេលា ស្រាវជ្រាវឲ្យបានម៉ត់ចត់ ជាពិសេសកំហុសដែលធ្លាប់បានកើតឡើង៕