មិនខ្វល់ពីការរិះគន់ Fan Bingbing ត្រលប់មកធ្វើការជាធម្មតាវិញ

2018-10-23 04:24:03
ចំនួនមតិ 0 | ចំនួនចែករំលែក 0

កំពុងស្ថិតនៅកណ្ដាលមតិរិះគន់ជាខ្លាំងរបស់មហាជន តែតារាសម្ដែងជួរមុខចិន Fan Bingbing នៅតែធ្វើខ្លួនធម្មតា ត្រលប់មកធ្វើការវិញ។

ក្រោយរយៈពេលបាត់មុខក្នុងរង្វង់សិល្បៈ៤ខែរួចមក ដោយសារតែរឿងអាស្រូវគេចពន្ធនោះ នៅពេលនេះ កំពូលតារាសម្ដែងស្រីចិន Fan Bingbing បានត្រលប់មកធ្វើការងារវិញហើយ។ តាមនោះដែរ កាលពីថ្ងៃទី២១ ខែតុលាកន្លងទៅនេះ ស្រីស្អាតវ័យ៣៧ឆ្នាំ ព្រមទាំងម្ដាយបានបង្ហាញខ្លួននៅទីក្រុងប៉េកាំង ដែលជាកន្លែងទីស្នាក់ការរបស់នាងផ្ទាល់តែម្ដង។ មានវត្តមាននៅទីនេះ តួរឿង “ព្រះនាងយេយេ” បានតុបតែងខ្លួនយ៉ាងស្រស់ស្អាតដោយមានពាក់មួក និងវ៉ែនតាការពារកម្ដៅថ្ងៃខ្នាតធំផងដែរ។ អ្នកកាសែតមានវត្តមាននៅនឹងកន្លែងបានរាយការណ៍ថា គូដណ្ដឹងរបស់ Li Chen បាននៅធ្វើការនៅទីនេះដល់ទៅ៤ម៉ោង ដោយចូលម៉ោង៥ ចេញម៉ោង៩។

ទោះបីជាអ្នកគាំទ្ររបស់ Bingbing ត្រេកអរជាខ្លាំងពេលឃើញតារារបស់ខ្លួនត្រលប់មកវិញនោះ តែមហាជនភាគច្រើនមិនបានស្វាគមន៍ការត្រលប់មកវិញរបស់រូបនាងឡើយ ដោយមានអ្នកខ្លះថែមទាំងចង់ហាមនាងមិនឲ្យត្រលប់ចូលសិល្បៈទៀតផង។ ទន្ទឹមនឹងគ្នានោះដែរ ភាពយន្តហូលីវូដ “Air Strike” ដែលមានការចូលរួមរបស់តារាកើតឆ្នាំ១៩៨១នោះ គឺមិនអាចដាក់បញ្ចាំងនៅចិនបានឡើយ ដោយសារតែរឿងគេចពន្ធរបស់នាង ខណៈអាចបញ្ចាំងនៅអាមេរិកជាធម្មតា តែគេមិនទាន់ដឹងថា ឈុតរបស់នាងនឹងត្រូវកាត់ចេញឬអត់នោះទេ៕