៧ចំណុចបង្ហាញថាបុរសម្នាក់នោះពិតជាជាប្ដីល្អម្នាក់មែន

2018-10-22 03:32:36
ចំនួនមតិ 0 | ចំនួនចែករំលែក 0

ជីវិតពេលនៅកំលោះ និងរៀបការរួច មនុស្សប្រុសនឹងប្រែប្រួលខ្លាំងដោយខ្លួនឯង។ លើសពីនេះបើគេជាប្ដីដ៏ល្អម្នាក់ទៀតនោះ គេនឹងមានចំណុចដូចខាងក្រោមសម្រាប់អ្នក ដោយគ្មានអ្នកណាបង្ខំ។ យ៉ាងណាក៏បើអ្នកពិតជាទទួលបានបែបនេះមែន នោះជីវិតគ្រួសារអ្នកនឹងមានសុភមង្គល ដោយមិនចាំបាច់តែមានលុយរាប់រយលាននោះទេ ៖

១. ចែករំលែករឿងគ្រប់យ៉ាងជាមួយអ្នក

ជាទូទៅមនុស្សប្រុសមិនសូវបើកកកាយរឿងខ្លួនឯងឲ្យអ្នកក្រៅដឹងឡើយ តែសម្រាប់មនុស្សស្រីម្នាក់ដែលគេស្រឡាញ់ខ្លាំង គេរីករាយនឹងចែករំលែកវា។ ការចែករំលែករឿងរ៉ាវក្នុងជីវិតជាមួយគ្នា ជារឿងសំខាន់មួយដែលប្ដីប្រពន្ធគ្រប់រូបត្រូវតែមាន មិនថាជារឿងល្អ ឬជារឿងអាក្រក់នោះទេ ព្រោះរៀបការហើយជីវិតអ្នកទាំង ២ត្រូវផ្សាភ្ជាប់គ្នា ដោយគ្មានភាពលាក់បាំង ឬកប់ទុកតែឯងឡើយ។

២. ឧស្សាហ៍ព្យាយាម

នៅពេលមនុស្សប្រុសឈានជើងចូលដំណាក់កាលបង្កើតគ្រួសារមួយ គេកាន់តែត្រូវមានទំនួលខុសត្រូវខ្ពស់ ដូច្នេះគេមិនអាចធ្វើដូចពេលគេនៅម្នាក់ឯងបានដែរ។ គេកាន់តែឧស្សាហ៍ កាន់តែព្យាយាមក្នុងការរកលុយ ដើម្បីផ្គត់ផ្គង់គ្រួសារ ហើយក៏មិនចង់ឲ្យអ្នករស់នៅក្នុងស្ថានភាពលំបាកដែរ។ គេចាប់ផ្ដើមរវល់ច្រើន ហើយការងារក៏កាន់តែច្រើន មិនមែនដេកស៊ី ដើរសប្បាយអត់ប្រយោជន៍ទេ។

៣. ចាត់ទុកអ្នកសំខាន់ជាងគេ

ទោះបីជាគេមានរឿងរ៉ាវជាច្រើនដែលត្រូវធ្វើក៏ដោយក៏គេនៅតែចាត់ទុកអ្នកនៅលេខរៀងទី១។ ការបារម្ភ ការយកចិត្តទុកដាក់គឺគេមានចំពោះអ្នកមិនដែលខាន ទោះបីពេលខ្លះតិចក្ដី ច្រើនក្ដីក៏គេនៅតែព្យាយាមដើម្បីអ្នក។ ពេលខ្លះគេក៏ទុករឿងមួយចំនួនចោលនៅពេលដែលអ្នកត្រូវការគេ ដោយមិនដែលបដិសេធន៍។

៤. សួរយោបល់អ្នកមិនដែលខាន

ទោះបីជាទូទៅបុរសត្រូវបានចាត់ជាមេគ្រួសារក៏ដោយ តែជាប្ដីល្អគឺគេតែងតែពិភាក្សាជាមួយអ្នក ដើម្បីសម្រេចចិត្ត មិនមែនគិតតែឯងឡើយ។ គ្រប់យ៉ាងគេតែងឲ្យតម្លៃអ្នកជាប្រពន្ធ មិនមែនអាងខ្លួនជាប្ដីចង់ធ្វើអីក៏បាននោះទេ។

៥. មានពេលវេលាសម្រាប់អ្នក និងគ្រួសារ

ពេលខ្លះដោយសារចង់មានបានពេក មនុស្សប្រុសខ្លះក៏ភ្លេចថាខ្លួនឯងមានប្រពន្ធ មានកូន។ ជាប្ដីល្អម្នាក់ គេនឹងផ្ដល់ពេលវេលាដល់គ្រួសារបានយ៉ាងកក់ក្ដៅ ព្រោះសុភមង្គលក្នុងគ្រួសារគឺភាពកក់ក្ដៅ ពេលវេលារីករាយ ជាមួយគ្នា មិនមែនលុយអាចទិញគ្រប់យ៉ាងបាននោះទេ។

៦. ជួយសម្រាលការងារអ្នក

គេមិនប្រកាន់ថាអ្នកណាជាអ្នកធ្វើម្ហូប បោកខោអាវ អីនោះទេ បើទំនេរគេនឹងជួយសម្រាលការងារអ្នក។ បើគេមានចំណុចនេះ អាចពិតជាមិនសូវមានសម្ពាធផ្លូវចិត្តជាមួយការងារផ្ទះនោះទេ ព្រោះអ្នកនឹងមានអារម្មណ៍ធូរស្រាលនៅពេលប្ដីរបស់អ្នកយល់ពីរឿងនេះ។

៧. មិនក្បត់មានស្រីក្រៅ

វាជាសំណាងមួយរបស់មនុស្សស្រីដែលអ្នកមានប្ដីស្មោះត្រង់ម្នាក់ ព្រោះពេលនោះសុភមង្គលក្នុងគ្រួសារនឹងកើតឡើង ដោយអ្នកមិនបាច់គ្រាំគ្រាចិត្តនៅពេលប្ដីលួចមានស្រី។ ចំណុចនេះបើគេជាប្ដីល្អម្នាក់ គេនឹងឲ្យវាទៅអ្នក ដោយមិនបាច់ឲ្យអ្នកដេកភ័យ ដេកព្រួយបីរឿងស្រីញីឡើយ៕

ចុចអាន៖៥ សំណួរ មនុស្សស្រីគួរតែសួរខ្លួនឯង មុនពេលរៀបការ

អត្ថបទ៖ ផេង ផលធិតា