មង្គលការ Zhao Liying និងតួថាងចេង បង្ហាញថាស្រលាញ់គ្នាយូរក៏មិនប្រាកដថាអាចដើរជាមួយគ្នាដល់ទីបញ្ចប់
- 2018-10-18 02:23:40
- ចំនួនមតិ 0 | ចំនួនចែករំលែក 0
មង្គលការ Zhao Liying និងតួថាងចេង បង្ហាញថាស្រលាញ់គ្នាយូរក៏មិនប្រាកដថាអាចដើរជាមួយគ្នាដល់ទីបញ្ចប់
មុនពេលឈានដល់មង្គលដ៏ស្ងប់ស្ងាត់ជាមួយតារាសម្ដែងស្រី Zhao Li Ying តារាសម្ដែងប្រុសល្បីឈ្មោះចិន Feng Shaofeng ធ្លាប់មានពេលកម្សត់កម្រជា សិល្បការិនី Ni Ni ដល់ទៅជាង៣ឆ្នាំ តែទីបំផុត អ្នកដែលលោកជ្រើសដើរជាមួយដល់ទីបញ្ចប់ក៏មិនមែនជារូបនាង។
កាលពីថ្ងៃទី១៦ ខែតុលាថ្មីៗនេះ ពិភពសិល្បៈចិនទាំងមូលបានកក្រើកនៅពេលគូស្នេហ៍តារាជួរមុខគឺ តារាសម្ដែង Feng Shaofeng និង Zhao Li Ying ប្រកាសថាពួកគេបានចុះសំបុត្រអាពាហ៍ពិពាហ៍ និងក្លាយជាប្ដីប្រពន្ធស្របច្បាប់។ ពេលបានឮព័ត៌មាននេះ អ្នកគាំទ្ររបស់សិល្បករទាំង២បានជូនពរពួកគេយ៉ាងភ្លូកទឹកភ្លូកដី។ តែមានមនុស្សស្រីគួរឲ្យអាណិតម្នាក់ដែលត្រូវគេគាស់ហៅដែរនោះគឺ តារាសម្ដែងស្រីកំពុងឡើងកូដ Ni Ni។
មូលហេតុដែលតួស្រីរឿង “17 Again” ត្រូវគេស្វែងរកច្រើនបំផុតនោះគឺ អ្នកដែលធ្លាប់ហែលឆ្លងទុក្ខលំបាកជាមួយ ប្រុសស្អាតវ័យ៤០ឆ្នាំ មិនមែន Li Ying ឡើយ គឺ Ni Ni ទៅវិញទេ។ តាមនោះដែរ តួរឿង “ស៊ុន អ៊ូខុង” ចាប់ផ្ដើមមានមនោសញ្ចេតនាជាមួយ Ni NI នៅដើមឆ្នាំ២០១២ នៅពេលដែលអ្នកទាំង២មិនទាន់ជាតារាជួរមុខនៅឡើយ។ នៅក្នុងកំឡុងពេលនេះ ទាំងលើបណ្ដាញសង្គម និងជីវិតខាងក្រៅ ពួកគេតែងបង្ហាញពីភាពផ្អែមល្ហែមសម្រាប់គ្នាជានិច្ច។ រាល់ថ្ងៃខួបកំណើត ក៏តែងចាំម៉ោង១២យប់ដើម្បីជូនពរគ្នាដែរ។ មិនត្រឹមតែប៉ុណ្ណោះ ពួកគេក៏ធ្លាប់បានគិតដល់មង្គលការតូច តែកក់ក្ដៅមួយទៀតផង។ យ៉ាងណាមិញ មនុស្សគិតមិនដល់ទេវតាគិត មានជួបគង់មានបែក។ ដល់ពាក់កណ្ដាលឆ្នាំ២០១៥ នៅពេលអ្នកទាំង២សុទ្ធតែមានកេរ្តិ៍ឈ្មោះល្បីអស់ហើយ គេក៏ចាប់ផ្ដើមឃើញថា ពួកគេលែងនិយាយរកគ្នាលើបណ្ដាញសង្គមទៀត។ ចូលរួមកម្មវិធីតែ១ក៏មិនថតរូបជាមួយគ្នា បុគ្គលទាំង២សុទ្ធតែរក្សាភាពស្ងៀមស្ងាត់រៀងខ្លួន។
ខែកក្កដា ឆ្នាំដដែល តំណាងរបស់សិល្បករទាំង២បានចេញមុខប្រកាសថា តារាទាំង២បានចែកផ្លូវគ្នាហើយ ដោយគំនិតមិនចុះសម្រុងគ្នា។ នៅពេលនោះ អ្នកគាំទ្របានសោកស្ដាយជាខ្លាំងជាមួយមនោសញ្ចេតនាមួយដែលដើរជាមួយគ្នាតាំងពីកម្សត់ដល់ជោគជ័យរៀងខ្លួន។
ក្រោយបែកគ្នា ២ឆ្នាំ Ni Ni ក៏មានមនោសញ្ចេតនាថ្មីជាមួយ តារាសម្ដែងប្រុស Jing Boran តែមិនបានយូរប៉ុន្មានក៏បែកគ្នាទៀត។ រីឯ Feng Shao Feng វិញ នៅពេលនេះបានរកឃើញសុភមង្គលថ្មីរបស់ខ្លួនហើយ ដោយរៀបការជាមួយ Zhao Li Ying។ ក្រោយឃើញហេតុការណ៍នេះ ទស្សនិកជនបានបញ្ចេញមតិថា ពិតជាមិនអាចមើលឃើញអ្វីមុនពិតមែន រាល់ពាក្យធ្លាប់សន្យាជាមួយគ្នា ទោះច្រើនប៉ុណ្ណា ស្មោះស្ម័គ្រប៉ុណ្ណាក៏នៅតែបែក នៅពេលមនុស្សអស់ចិត្តហើយ៕