ចរិតពិសេស៥យ៉ាងរបស់មនុស្សស្រីដែលបុរសធ្លាក់ក្នុងអន្លង់ស្នេហ៍លឿនបំផុត
- 2018-10-19 23:14:00
- ចំនួនមតិ 0 | ចំនួនចែករំលែក 0
ចរិតពិសេស៥យ៉ាងរបស់មនុស្សស្រីដែលបុរសធ្លាក់ក្នុងអន្លង់ស្នេហ៍លឿនបំផុត
មនុស្សស្រីមួយចំនួនអាចនឹងមើលទៅរឹងមាំ ប៉ុន្តែជឿទេថាពួកគេមានចរិតម្យ៉ាងដែលលាក់ទុកយ៉ាងជ្រៅ ហើយក៏ជាមន្តស្នេហ៍ដែលទាក់ទាញមនុស្សជុំវិញខ្លួនបានយ៉ាងឥតខ្ចោះ គ្រាន់តែពេលខ្លះអ្នកមិនបានចាប់អារម្មណ៍ដោយខ្លួនឯង។ ឥលូវនេះ កញ្ញា សូមបង្ហាញចរិត៥យ៉ាងក្នុងខ្លួនមនុស្សស្រីដែលអាចធ្វើឲ្យបុរសធ្លាក់ក្នុងអន្លង់ស្នេហ៍ឆាប់បំផុត។
១. ទន់ភ្លន់
នេះជាបុគ្គលិកលក្ខណៈដំបូងដែលបុរសតែងលង់ស្នេហ៍។ គ្មានមនុស្សប្រុសឯណាដែលធ្លាក់ក្នុងអន្លង់ស្នេហ៍លើនារីដែលមានភាពគំរោះគំរើយរហូតបាត់បង់មន្តស្នេហ៍នោះទេ។ មិនចាំបាច់ទន់ភ្លន់គ្រប់ពេលនោះទេ គឺគ្រាន់តែចេះស្គាល់ភាពរម្យទម ចេះឲ្យតម្លៃខាងប្រុសខ្លះ រៀបឫកពាឲ្យល្អ សម្ដីសំដៅសមរម្យ ក៏ធ្វើឲ្យបុរសបាក់ចិត្តបាត់ទៅហើយ។
២. ឆ្លាតខ្លះ ល្ងង់ខ្លះ
មនុស្សប្រុសមួយចំនួនមិនចូលចិត្តឃើញសង្សាររបស់ខ្លួនឆ្លាតជាង ឬមានអំនួតលើសខ្លួននោះទេ ព្រោះធម្មជាតិនិងសង្គមបានកំណត់ថាមនុស្សប្រុសគឺជាភេទរឹងមាំ ដែលជាមូលហេតុដែលពេលខ្លះអ្នកគួរធ្វើល្ងង់ ធ្វើមិនដឹងខ្លះ។ ទោះបីមនុស្សស្រីសម័យថ្មីពូកែ ឆ្លាត និងមើលទៅខ្លាំងជាងមនុស្សប្រុសមួយចំនួនក៏ដោយ ប៉ុន្តែពេលខ្លះភាពឥតខ្ចោះបែបនេះអាចជាចំណុចដែលធ្វើឲ្យអ្នកនៅព្រៅដោយមិនដឹងខ្លួន។
៣. ស្រស់ស្រាយ រួសរាយ
មនុស្សស្រី Cute មនុស្សប្រុសចូលចិត្ត ប៉ុន្តែមនុស្សស្រីដែលតែងមានភាពស្រស់ស្រាយ គឺជាចរិតមួយដែលធ្វើឲ្យមនុស្សប្រុសកាន់តែចូលចិត្ត ព្រោះបុរសៗច្រើនតែចាញ់ស្នេហ៍នារីអារម្មណ៍ល្អ ពូកែញញឹម អាចឲ្យគេមានអារម្មណ៍មានក្ដីសុខពេលបាននៅជាមួយ និងជាអ្នកដែលអាចធ្វើឲ្យគេធូរស្បើយចិត្តនៅពេលជួបបញ្ហា។ មិនមានបុរសណាដែលចូលចិត្តមនុស្សស្រីដែលចូលចិត្តធ្វើមុខតឹង ពូកែខឹង ឲ្យគេមានអារម្មណ៍ទើសទាល់គ្រប់ពេលនោះទេ ដូច្នេះបើចង់ឲ្យគេស្រឡាញ់ អ្នកត្រូវធ្វើខ្លួនជាមនុស្សស្រស់ស្រាយ ញញឹមឲ្យច្រើនៗ ប៉ុន្តែក៏ត្រូវមើលតាមកាលៈទេសៈដែរថាពេលណាត្រូវលេង ពេលណាត្រូវហ្មត់ចត់។
៤. មានទឹកចិត្ត និងភាពស្មោះត្រង់
អ្នកណាទៅដែលមិនចូលចិត្តមនុស្សល្អ។ អ្នកអាចមិនល្អដូចជាទេវតា ប៉ុន្តែយ៉ាងហោចក៏មានចរិតល្អៗមួយចំនួនក្នុងខ្លួន។ មនុស្សប្រុសម្នាក់ៗចូលចិត្តមនុស្សស្រីដែលមានទឹកចិត្ត ចេះយល់ចិត្តអ្នកដទៃ មិនអាត្មានិយម និងមនុស្សស្រីដែលធ្វើឲ្យគេជឿជាក់ថា នៅពេលស្រឡាញ់គ្នានាងនឹងខ្វល់ខ្វាយពីអារម្មណ៍របស់គេ។
៥. មានហេតុផល មិនលាក់ចរិត និងស្រួលនិយាយគ្នា
កុំព្យាយាមផ្លាស់ប្ដូរខ្លួនឯងដោយសារមនុស្សប្រុស។ បើគេស្រឡាញ់អ្នក នោះគឺដោយសារតែអ្នកជាខ្លួនអ្នក ម្ល៉ោះហើយត្រូវបញ្ចេញឲ្យគេដឹងថាចរិតពិតរបស់អ្នកយ៉ាងណា ល្អប៉ុណ្ណា អាក្រក់ប៉ុណ្ណា។ កុំព្យាយាមបិទបាំងចំណុចអាក្រក់ៗរបស់ខ្លួនឯង និងព្យាយាមធ្វើខ្លួនល្អៗ ព្រោះថាបើថ្ងៃមួយគេដឹង គេអាចនឹងទទួលយកអ្នកមិនបាន។ ម្យ៉ាងទៀតមនុស្សប្រុសមួយរយទាំងមួយរយគឺចូលចិត្តមនុស្សស្រីដែលមានហេតុផល និយាយអ្វីឆាប់យល់គ្នា ពេលមានបញ្ហាឈ្លោះគ្នាអាចប្រើហេតុផលច្រើនជាងអារម្មណ៍។ បើអ្នកមានចរិតបែបនេះ គ្មានបុរសណាចង់ដោះដៃពីអ្នកឡើយ ៕