៦សំណួរគួរសួរខ្លួនឯងមុនសម្រេចចិត្តបែកគ្នា កុំឲ្យស្តាយក្រោយ
- 2018-10-11 04:26:28
- ចំនួនមតិ 0 | ចំនួនចែករំលែក 0
៦សំណួរគួរសួរខ្លួនឯងមុនសម្រេចចិត្តបែកគ្នា កុំឲ្យស្តាយក្រោយ
មានហេតុផលជាច្រើនបានធ្វើឲ្យដៃគូម្ខាងៗ មានអារម្មណ៍ថានឿយហត់ ហើយសម្រេចចិត្តចង់ចាកចេញ។ អ្នកខ្លះបែកគ្នាដោយចិត្តដាច់ ឯអ្នកខ្លះទៀតបែកគ្នាទាំងមិនអស់ចិត្ត និងអាចស្តាយក្រោយពេញមួយជីវិត ដូច្នេះមុនធ្វើការសម្រេចចិត្ត ត្រូវសួរ៦សំណួរសំខាន់ៗទៅកាន់ខ្លួនឯង។
១. តើនៅជាមួយគាត់ គ្រប់យ៉ាងប្រសើរជាងមុនឬក៏កាន់តែចុះអន់ថយ?
ពេលទាក់ទងគ្នា តើអ្នកមានការវិវឌ្ឍខ្លួនប្រសើរជាងមុនដែរទេ? ជាធម្មតា បើគាត់ស្រលាញ់អ្នកពិតប្រាកដមែន គាត់ច្បាស់ជានៅចាំលើកទឹកចិត្តអ្នកគ្រប់ពេល និងចូលរួមត្រេកអរជាមួយរាល់សមិទ្ធផលដែលអ្នកទទួលបាន។ ផ្ទុយទៅវិញ ប្រសិនបើគាត់ ជារនាំងមកបិទបាំង មិនឲ្យធ្វើអ្វីដែលអ្នកចូលចិត្ត នេះជាហេតុផលដែលអ្នកគួរពិចារណាឡើងវិញ។
២. តើអ្នកនិងគាត់មានគម្រោងនាពេលអនាគតដូចគ្នាដែរទេ?
គម្រោងការនិងគោលដៅជីវិត ជាអ្វីដែលគូស្នេហ៍គួរសាងឡើងរួមគ្នាសម្រាប់ពេលអនាគត ដើម្បីជៀសវាងភាពចម្រូងចម្រាសខ្វែងគំនិតគ្នា។ ក្នុងពេលបច្ចុប្បន្ន បើអ្នកទាំងពីរ មានមតិផ្ទុយគ្នាស្រឡះ គ្មានវិធីណាអាចដោះស្រាយបាន ទោះជាបន្តទៅមុខក៏គ្មានន័យអីដរ។
៣. តើអ្នកសប្បាយចិត្តដែរទេ ពេលនៅជាមួយគ្នា?
មួយសំណួរនេះ អាចជួយអ្នក ឲ្យយល់ស៊ីជម្រៅពីស្នេហាដែលកំពុងមានសព្វថ្ងៃ។ មានរឿងរ៉ាវស្មុគស្មាញជាច្រើនដែលអ្នកត្រូវប្រឈម ប៉ុន្តែពេលនៅក្បែរគាត់ បែរជាមានអារម្មណ៍កក់ក្តៅ មានកម្លាំងចិត្តឡើងវិញ បង្ហាញថាវាជាសញ្ញាដ៏ល្អមួយ។ យ៉ាងណាមិញ ប្រសិនបើអ្វីៗ មិនដូចការរំពឹងទុក អ្នកគួរគិតគូរពីទំនាក់ទំនងស្នេហាសាជាថ្មីឡើងវិញ។
៤. តើគាត់ចេះសម្របសម្រួលដែរទេ ពេលមានបញ្ហា?
នៅក្នុងទំនាក់ទំនងមួយ ដែលគ្មានការសម្របសម្រួល គឺមិនអាចស្ថិតស្ថេរបានយូរឡើយ ព្រោះអ្នកទាំងពីរ នឹងមានជម្លោះមិនចេះចប់។ បើមានតែម្ខាង ជាអ្នកលះបង់ ហើយម្ខាងទៀតធ្វើហីមិនខ្វល់ នោះអ្នកស្នេហានឹងក្លាយជាអសារបង់ទៅថ្ងៃមុខ។
៥. តើអ្វីជាហេតុផលចម្បង ដែលធ្វើឲ្យអ្នកសម្រេចចិត្តចង់បែកគ្នា?
ហេតុផលមានច្រើនណាស់ ដែលអាចធ្វើឲ្យស្នេហាប្រេះឆាបាន ប៉ុន្តែមិនមែនទាំងអស់សុទ្ធតែនាំទៅរកការបែកបាក់នោះទេ។ ឧទាហរណ៍ថា គាត់ជាមនុស្សខ្ជិលមិនចូលចិត្តស្លៀកពាក់ស្អាតបាត តើគួរបែកគ្នាឬទេ? បើវាមិនមែនជាហេតុផលសមរម្យដែលត្រូវបែកគ្នា គួរចេះរកវិធីដោះស្រាយ និយាយសម្រួលគ្នាជាមុនសិន។ ក្នុងស្ថានភាពយ៉ាប់ខ្លាំង ពេលនៅជាមួយគ្នាមានតែភាពឈឺចាប់ សឹមធ្វើការសម្រេចចិត្តសាជាថ្មី។
៦. បើគ្មានគេ តើជីវិតអ្នកស្រស់ថ្លាជាងមុនដែរទេ?
ចំណាយពេលបន្តិច ដើម្បីគិតសំណួរនេះ មុនពេលអ្នកចង់នៅបន្ត ឬមួយក៏ចង់ឈប់ត្រឹមហ្នឹង។ បើគិតថា ពេលគ្មានគេ ជីវិតខ្លួនឯងនឹងស្រស់ថ្លាជាងមុន គ្មានអ្វីគួរនៅស្ទាក់ស្ទើរទៀតនោះទេ។
មិនចង់ស្តាយក្រោយ មុនបញ្ចប់សេចក្តីស្នេហា ត្រូវគិតគូរឲ្យបានវែងឆ្ងាយ មិនត្រូវធ្វើដោយប្រញាប់ប្រញាល់ ឬសម្រេចចិត្តនៅពេលចិត្តក្តៅ៕
ចុចអានបន្ត៖