៦តិកនិចរកការងារធ្វើបានឆាប់ដូចចិត្ត ពិសេសសម្រាប់អ្នកគ្មានបទពិសោធន៍

2018-09-25 23:00:00
ចំនួនមតិ 0 | ចំនួនចែករំលែក 0

“ការងារជាមាសប្រាក់” ជាអ្វីដែលគ្រប់គ្នាបានដឹង និងទទួលស្គាល់ ប៉ុន្តែការដែលត្រូវរកការងារឲ្យបានលឿន និងត្រូវចិត្តគឺមិនសូវជារឿងងាយទេក្នុងសម័យនេះ។ អ្នកខ្លះចេញរកតែប៉ុន្មានថ្ងៃក៏រកបានការងារដែលខ្លួនពេញចិត្ត ក្នុងខណៈដែលអ្នកខ្លះដើរទាត់ខ្យល់ ដើរសម្ភាសការងាររាប់ឆ្នាំហើយ តែត្រូវគេបដិសេធទាំងអស់។ ការរកការងារមិនបានមិនប្រាកដថាមកពីយើងគ្មានសមត្ថភាពនោះទេ តែពេលខ្លះអាចមកពីយើងគ្មានតិចនិកល្អក្នុងការស្វែងរកវា។ សាកល្បងផ្លាស់ប្ដូរសកម្មភាពមួយចំនួន នោះអ្នកនឹងអាចស្វែងរកការងារធ្វើបានកាន់តែស្រួល៖

រូបតំណាង

**១. ស្គាល់ខ្លួនឯង និងគោលដៅក្នុងអាជីពរបស់ខ្លួនមុនសិន**

មុននឹងផ្ញើពាក្យសុំធ្វើការ យើងត្រូវស្គាល់ខ្លួនឯងឲ្យច្បាស់ ហើយដឹងពីគោលដៅក្នុងការធ្វើការរបស់ខ្លួនឯងជាមុនសិន។ សួរខ្លួនឯងថាចូលចិត្តអ្វី ចង់ធ្វើការបែបណា ដូចជា ចង់ធ្វើជាបុគ្គលសំខាន់ក្នុងក្រុមហ៊ុនតូចតាច ដែលអាចមានហានិភ័យខ្ពស់ ឬចង់ធ្វើជាបុគ្គលិកតូចតាច ប៉ុន្តែមានស្ថិរភាពក្នុងក្រុមហ៊ុនធំមួយ ...។ ការស្គាល់ខ្លួនឯង ពិតជាសំខាន់ណាស់ ព្រោះជាច្រើននាក់ហើយទើបតែដឹងថាខ្លួនកំពុងដើរផ្លូវខុស នៅពេលដែលគ្រប់យ៉ាងពិបាកនឹងកែខៃទៅហើយ។

២. ផ្លាស់ប្ដូរទម្លាប់ខ្លួនឯងសិន

ពេលយើងទំនេរពីការងារ អាចនឹងមានឱកាសប្រើជីវិតខ្លួនឲ្យសប្បាយជ្រុលពេក ដូចជា ការដែលយើងចូលគេងពេលយប់ជ្រៅ ប៉ុន្តែក្រោកយឺត។ បើយើងចង់ធ្វើការពិតមែន ត្រូវផ្លាស់ប្ដូរទម្លាប់ឲ្យក្លាយមកដូចទម្លាប់ជីវិតរបស់អ្នកធ្វើការឲ្យបានច្រើនបំផុត។ ព្យាយាមប្រើប្រាស់ពេលវេលាឲ្យមានប្រយោជន៍ដោយការចូលវេបសាយស្វែងរកការងារនានា ឬសាកសួរឱកាសការងារពីមិត្តភ័ក្ដិ ឬសាច់ញាតិបងប្អូន ស្វែងរកចំណេះដឹងជុំវិញខ្លួនដែលដូចអ្វីដែលគេរៀបរាប់ក្នុង Job Description ឲ្យបានច្រើនបំផុត ដើម្បីប្រាកដថាអ្នកបានត្រៀមខ្លួនរួចរាល់ ពេលគេហៅទៅសម្ភាស។

៣. អាប់ឌែត CV ជាមួយព័ត៌មានចុងក្រោយបំផុត

នៅពេលស្វែងរកការងារថ្មី អ្នកត្រូវអាប់ឌែតប្រវត្តិរូបសង្ខេប (Resume) ជាមួយព័ត៌មានដែលថ្មីបំផុត។ ស្ថិតក្នុងចន្លោះពេលដែលគ្មានការងារធ្វើ បើសិនអាច កុំភ្លេចយកពេលទៅអភិវឌ្ឍចំណុចខ្វះខាតខ្លួនឯង។ ក្រៅពីអាចបង្កើនសមត្ថភាពផ្ទាល់ខ្លួនហើយ វាក៏ធ្វើឲ្យ CV របស់យើងល្អមើលជាងការដែលត្រូវឆ្លើយប្រាប់គេថាប៉ុន្មានឆ្នាំនេះមិនបានធ្វើអ្វីសោះ នៅពេលគេសួរពីចន្លោះពេលដែលយើងមិនបានបំពេញក្នុង CV នោះ។

រូបតំណាង

៤. ផ្លាស់ប្ដូរការគិត

អ្នកដែលបាត់បង់ការងារមួយរយៈ មិនថាជាការបាត់បង់ដោយស្ម័គ្រចិត្ត ឬដោយការបញ្ហាផ្សេងៗដែលអាចធ្វើឲ្យកើតមានជំងឺបាក់ទឹកចិត្ត បាត់បង់ទំនុកចិត្តមួយចំណែកក្នុងការធ្វើការ ឬអ្នកខ្លះអាចឈានដល់ថ្នាក់គិតអគតិចំពោះកន្លែងធ្វើការចាស់ មេចាស់ ជាដើម ប្រសិនបើនៅតែមានគំនិតអវិជ្ជមានដូចរៀបរាប់ខាងលើនេះ សូមបញ្ឈប់ទៅ ហើយផ្លាស់ប្ដូរការគិតថ្មីឲ្យទៅក្នុងផ្លូវវិជ្ជមានវិញ ព្រោះអ្វីក៏ដោយដែលយើងគិត វានឹងដិតដាមជាប់ក្នុងចិត្តរបស់យើង ដែលវានឹងបង្ហាញឲ្យគេឃើញបានតាមរយៈការនិយាយស្ដី ឬបញ្ចេញយោបល់របស់យើង។

៥. សម្ភាសការងារលំដាប់អ្នកជំនាញ

សម្ភាសការងារគឺជាដំណាក់កាលដ៏សំខាន់ក្នុងការជ្រើសរើសបុគ្គលិក ដូច្នេះរាល់ការស្ដែងចេញរបស់យើងនឹងជាអ្វីដែលអាចកំណត់ថាយើងនឹងអាចជាប់ចូលធ្វើការជាមួយគេឬអត់ ដែលការស្ដែងចេញនេះ មិនមែនសំដៅតែលើការឆ្លើយសំណួរនោះទេ ប៉ុន្តែក៏រួមទាំងការតុបតែងខ្លួនទៅសម្ភាសឲ្យបានសមរម្យ សមកាលៈទេសៈ សុភាពរាបសា មិនមែនឆ្នូត ផ្កា ឆើតឆាយរញ៉េរញ៉ៃ ឬវាលខ្លី ដើម្បីជាការបង្ហាញពីភាពគួរឲ្យជឿទុកចិត្តក្នុងខ្លួនរបស់យើង។ ត្រៀមឯកសារពាក់ព័ន្ធសំខាន់ៗទៅឲ្យស្រេច ហើយនៅពេលសម្ភាស ត្រូវឆ្លើយសំណួរឲ្យបានច្បាស់ សំឡឹងមើលភ្នែកអ្នកសម្ភាសដោយការជឿជាក់ មិនចាំបាច់ប្រញាប់ ត្រូវគិតឲ្យបានល្អសិនសឹមឆ្លើយ ហើយដែលសំខាន់បំផុតគឺមិនត្រូវអួតអាង កុហក ឬពន្លើសហួសការពិត។ នៅពេលគេសួរថាហេតុអ្វីឈប់ពីកន្លែងចាស់ គឺមិនគួរនិយាយបែបបន្តុះបង្អាប់កន្លែងចាស់ឡើយ ព្រោះនឹងធ្វើឲ្យអ្នកសម្ភាសមើលយើងក្នុងផ្លូវមិនល្អ។

ចុចអាន៖ តិចនិកទាមទារប្រាក់ខែឲ្យបានខ្ពស់ ពេលសម្ភាសការងារ

៦. កុំចុះចាញ់

ការដែលត្រូវគេបដិសេធ មិនថាមិនហៅសម្ភាស ឬហៅសម្ភាសហើយគេមិនយកយើងចូលធ្វើការ គឺសុទ្ធតែជារឿងធម្មតាដែលអ្នកស្វែងរកការងារត្រូវជួបប្រទះ។ ដូច្នេះអ្វីដែលយើងត្រូវធ្វើគឺត្រូវពិចារណាខ្លួនឯងថាមានចំណុចខុសឆ្គង ឬខ្វះខាតអ្វីខ្លះ។ ពេលរកឃើញហើយត្រូវអភិវឌ្ឍខ្លួនឯងឲ្យរីកចម្រើនតទៀត ព្រោះពេលខ្លះអាចមិនមែនដោយសារយើងគ្មានសមត្ថភាព ប៉ុន្តែអាចដោយសារយើងមិនសក្ដិសមជាមួយក្រុមហ៊ុន ឬមុខតំណែងទាំងនោះទៅវិញទេ។ បរាជ័យម្ដងមិនមែនមានន័យថាយើងនឹងបរាជ័យរហូតនោះទេ ភាពជោគជ័យនឹងចូលមករកមនុស្សដែលមានការព្យាយាម និងមិនចុះចាញ់ ៕

ចុចអាន៖ រឿង៦យ៉ាងដែលស្ត្រីគួរជៀសវាងនៅកន្លែងធ្វើការ

ប្រភព៖ tnews ប្រែសម្រួល៖ ស្វាយ វ៉ាន់ថន