៦ហេតុផលចំៗដែលដាច់មួយឆ្នាំចូលមួយឆ្នាំ អ្នកនៅតែរកសង្សារមិនបាន
- 2018-11-13 10:15:49
- ចំនួនមតិ 0 | ចំនួនចែករំលែក 0
៦ហេតុផលចំៗដែលដាច់មួយឆ្នាំចូលមួយឆ្នាំ អ្នកនៅតែរកសង្សារមិនបាន
រឿងស្នេហានេះមួយប្រាកដជាគ្មានអ្នកណាកំណត់បានទេ។ ដាច់មួយឆ្នាំចូលមួយឆ្នាំ អ្នកតែងនិយាយថាមិនអីទេ គ្មានស្នេហាក៏អាចរស់បាន។ ប្រាកដហើយ សម័យនេះមនុស្សស្រីឯករាជ្យគឺត្រូវគិតគូររឿងជាច្រើន រហូតលែងមានអារម្មណ៍ខ្វល់ខ្វាយរឿងស្នេហា តែកុំភ្លេចថាឆ្នាំកើន អាយុអ្នកក៏កើនដូចគ្នា។ បើដល់វេលាដែលអ្នកចង់មានគូ តែរកមិនបាន អ្នកគួរងាកមើលមកខ្លួនឯង ស្វែងរកមូលហេតុ ហើយចាប់ផ្ដើមកែប្រែវាបន្តិចម្ដងៗទៅ។ ខាងក្រោមនេះគឺជាមូលហេតុមួយចំនួនដែលអាចឲ្យអ្នកនៅតែ Single ពីមួយឆ្នាំទៅមួយឆ្នាំ៖
១. ខ្លាចជីវិតប្រចាំថ្ងៃត្រូវផ្លាស់ប្ដូរ
ជឿអត់ថាមានមនុស្សជាច្រើនគិតបែបនេះ។ ពួកគេមានកាលវិភាគប្រចាំថ្ងៃច្បាស់លាស់ថាតើមួយថ្ងៃៗពួកគេត្រូវធ្វើអ្វីខ្លះ ដូចជាធ្វើការ ទៅរៀន អានសៀវភៅ ញ៉ាំអីជាមួយមិត្តភ័ក្ដិ លេងហ្គេម ស្ដាប់ភ្លេងនៅផ្ទះជាដើម ដែលធ្វើឲ្យពួកគេមានការភ័យខ្លាចថា ប្រសិនបើមានមនុស្សម្នាក់ចូលក្នុងជីវិតរបស់ពួកគេៗអាចនឹងលែងបានធ្វើសកម្មភាពដែលពួកគេចូលចិត្តទាំងអស់នេះ។
២. កំណត់ស្ដង់ដារខ្ពស់ពេក
អ្នកខ្លះសុខចិត្តនៅព្រៅ បើរកមិនបានបុរស ស ស្អាត ឆ្លាត សង្ហា ជាអ្នកមាន រៀនពូកែ… តែចង់ប្រាប់ថាគ្មាននរណាល្អទាំងព្រមទាំងអស់នោះទេ។ ដូច្នេះអ្នកគួរសួរខ្លួនឯងឡើងវិញថាតើបុរសបែបណាដែលអ្នកត្រូវការពិតប្រាកដ ដែលក្នុងនោះតើល្អកម្រិតណា និងអាក្រក់កម្រិតណាដែលអ្នកអាចទទួលយកបាន។
៣. ស្រឡាញ់ឯករាជ្យ
មនុស្សស្រីសម័យនេះភាគច្រើនគឺស្រឡាញ់ភាពឯករាជ្យច្រើនជាង ហើយបើសិនជ្រើសរើសមានសង្សារ ក៏ខ្លាចបាត់បង់ឯករាជ្យដែលខ្លួនមាននេះ។ ស្ដាប់ទៅគួរឲ្យខ្លាច ប៉ុន្តែវាជាការពិត ព្រោះអ្នកនៅចង់ទៅ Party សប្បាយៗជាមួយមិត្តភ័ក្ដិ ចង់ធ្វើអ្វីតាមចិត្ត មិនចង់ចាំទទួលទូរសព្ទដែលតាមសួរថា “នៅឯណា នៅជាមួយអ្នកណា ទៅប៉ុន្មាននាក់ ...”។ ព្រោះមិនចង់ឮប្រយោគទាំងអស់នេះហើយ ជាហេតុផលធ្វើឲ្យអ្នកនៅតែមិនទាន់មានគូ។
៤. មានអារម្មណ៍ថាខ្លួនឯងមិនល្អគ្រប់គ្រាន់
មនុស្សជាច្រើនមិនហ៊ានបើកចិត្តស្រឡាញ់អ្នកណាឡើយ ព្រោះមានអារម្មណ៍ថាខ្លួនឯងគ្មានអ្វីល្អគ្រប់គ្រាន់ មិនមានអ្វីប្រជែងជាមួយនារី ឬបុរសផ្សេងៗរបស់មនុស្សដែលខ្លួនស្រឡាញ់ គ្រួសារក៏មិនមានទ្រព្យច្រើន ប្រាក់ខែក៏តិច រូបសម្បត្តិក៏មិនសូវបាន... តែបើនៅគិតបែបនេះ អ្នកនឹងអត់គូរហូតហើយ ព្រោះមនុស្សដែលស្រឡាញ់អ្នក គេនឹងមិនមើលឃើញតែចំណុចអវិជ្ជមានរបស់អ្នកនោះទេ។ ដូច្នេះគួរព្យាយាមផ្លាស់ប្ដូរការគិតជាថ្មី។
៥. ភ្លេចសង្សារចាស់មិនបាន
ពិតណាស់ ការបំភ្លេចមនុស្សម្នាក់ដែលខ្លួនស្រឡាញ់ខ្លាំងគឺមិនមែនជារឿងងាយទេ ប៉ុន្តែជីវិតរបស់យើងត្រូវបន្តដំណើរទៅមុខ ដូច្នេះសូមកុំឲ្យឱកាសល្អៗរបស់អ្នកកន្លងទៅដោយសារភាពជំពាក់វាក់វិនក្នុងអតីតកាល។ ប៉ុន្តែបើអ្នកបំភ្លេចគេមិនបាន ហើយសាកល្បងទាក់ទងអ្នកថ្មីដើម្បីបំភ្លេចអ្នកចាស់ គួរកុំអីល្អជាង។ គួរចាប់ផ្ដើមម្ដងទៀត នៅពេលអ្នកជឿជាក់និងមានក្ដីស្រឡាញ់ពិតៗ ទើបមិនជួបបទពិសោធន៍ច្រំដែល។
៦. ចង់មានដែរ តែគ្មានអ្នកយក
ចំណុចនេះចាក់ដោតតែម្ដង ចង់មានដែរ តែព្យាយាមទាក់ទងអ្នកណាក៏គេមិនចាប់អារម្មណ៍។ តែកុំចុះចាញ់អី ដរាបណាព្រះអាទិត្យនៅរះពីទិសខាងកើត គឺអ្នកនៅតែមានសង្ឃឹម ស៊ូៗថ្ងៃណាមួយនឹងបានជួបមនុស្សដែលស្រឡាញ់អ្នកប្រាកដ ៕
ចុចអាន៖
មនុស្សស្រី ៥ ប្រភេទដែលសក្ដិសមនៅម្នាក់ឯងជាងមានសង្សារ
ធ្វើយ៉ាងណាទើបទទួលបានការចាប់អារម្មណ៍ខ្លាំងពី crush?