ជំងឺគ្មានថ្នាំព្យាបាលម្យ៉ាងរបស់ឪពុកម្ដាយចាស់ ដែលកូនៗត្រូវដឹងហើយប្រុងប្រយ័ត្ន

2018-09-25 09:14:24
ចំនួនមតិ 0 | ចំនួនចែករំលែក 0

កាលពីមួយឆ្នាំមុន ខ្ញុំបាននាំម្ដាយខ្ញុំទៅមណ្ឌលថែទាំមនុស្សចាស់ជរា។ ដោយសារមមាញឹកការងារច្រើន កាលនោះខ្ញុំមិនសូវបានទៅមើលគាត់ទេ។ ម្យ៉ាងខ្ញុំក៏មិនសូវបារម្ភពីគាត់ដែរ ដោយសារគិតថាទីនោះមានអ្នកមើលថែគាត់បានល្អ មានម្ហូបអាហារល្អៗ ហើយក៏មានមិត្តភ័ក្ដិវ័យស្រករៗគាត់ដែរ។

ថ្ងៃមួយ លោកគ្រូពេទ្យម្នាក់ពីមណ្ឌលថែទាំមនុស្សចាស់បានទូរសព្ទមកខ្ញុំ ប្រាប់ថាម្ដាយរបស់ខ្ញុំកំពុងឈឺធ្ងន់។ ខ្ញុំបានទៅរកគាត់ភ្លាម។ ទៅដល់ទីនោះ គ្រូពេទ្យក៏ប្រាប់ថាម្ដាយខ្ញុំកើតជំងឺដែលគ្មានថ្នាំព្យាបាល ហើយមិនអាចរស់បានយូរទៀតទេ។ ខ្ញុំក៏សម្រេចចិត្តយកគាត់មកផ្ទះវិញ ដើម្បីឲ្យគាត់បាននៅជាមួយគ្រួសារសម្រាប់រយៈពេលចុងក្រោយនៃជីវិតរបស់គាត់។

ខ្ញុំបានមើលថែគាត់យ៉ាងយកចិត្តទុកដាក់។ ខ្ញុំបានប្រាប់គាត់ពីរឿងរ៉ាវនានាដែលកើតឡើងចំពោះខ្ញុំក្នុងរយៈពេលមួយឆ្នាំកន្លងទៅ ដែលគាត់មិនបាននៅក្បែរខ្ញុំ។ មួយសប្ដាហ៍ក្រោយមក ស្រាប់តែគាត់អាចក្រោកដើរចេញពីគ្រែបាន ហើយមួយខែក្រោយមក សុខភាពគាត់ក៏ប្រែមកជាធម្មតាវិញ។

ខ្ញុំបានប្រាប់ដំណឹងនេះដល់គ្រូពេទ្យ ហើយក៏បានសួរបញ្ជាក់កាលដែលលោកគ្រូពេទ្យប្រាប់ថាម្ដាយខ្ញុំឈឺធ្ងន់នោះ តើជាជំងឺអ្វី? គ្រូពេទ្យប្រាប់ថា គាត់មានជំងឺអស់សង្ឃឹម (Despondency) ហើយវិធីព្យាបាលតែម្យ៉ាងគត់សម្រាប់ជំងឺនេះគឺ “ការស្រលាញ់ និងការថែទាំពីមនុស្សជាទីស្រលាញ់” ៕

ចុចអាន៖

ប្រភព៖ fabiosa ប្រែសម្រួល៖ ស្វាយ វ៉ាន់ថន