សញ្ញាច្បាស់ៗដែលបង្ហាញថាអ្នកមានជំងឺខ្លាចស្នេហា Philophobia
- 2018-09-24 08:08:38
- ចំនួនមតិ 0 | ចំនួនចែករំលែក 0
សញ្ញាច្បាស់ៗដែលបង្ហាញថាអ្នកមានជំងឺខ្លាចស្នេហា Philophobia
Philophobia ឬជំងឺខ្លាចស្នេហា គឺជាជំងឺផ្លូវចិត្តមួយប្រភេទ ដែលជាភាសាក្រិកពីរពាក្យបញ្ចូលគ្នាគឺ Philo ប្រែថាការស្រលាញ់ ជាមួយពាក្យ Phobia ដែលប្រែថា ការខ្លាច។ ស្រីៗដែលមានអារម្មណ៍មិនស្រួល ពេលមានប្រុសៗមកញ៉ែ ឬមិនហ៊ាននិយាយជាមួយមនុស្សប្រុសដែលខ្លួនស្រលាញ់ គឺអាចកំពុងមានជំងឺមួយនេះ។ ខាងក្រោមនេះគឺជាសញ្ញាផ្សេងៗទៀតដែលអាចបង្ហាញថា អ្នកកំពុងមានជំងឺខ្លាចស្នេហា៖
**៥. ចាប់ផ្ដើមគេចពីមនុស្សភេទផ្ទុយ**
ប្រសិនបើ Facebook, IG ឬ Line របស់អ្នកមិនមានមិត្តភ័ក្ដិប្រុសសោះ ឬនៅពេលមានប្រុសៗមក Request Friend ឬ Follow អ្នកក៏បដិសេធគេភ្លាមៗ ឬសូម្បីតែចូលរួមកម្មវិធីអ្វីមួយដែលមានមនុស្សប្រុសចូលរួម ក៏អ្នកមិនចូលរួមដែរ នោះមានន័យថាអ្នកកំពុងគេចពីមនុស្សប្រុសហើយ។
៤. ចំណាយពេលវេលាភាគច្រើននៅម្នាក់ឯង ហើយមានអារម្មណ៍ឯកោ
នៅពេលមិត្តភ័ក្ដិបបួលទៅណា អ្នកតែងបដិសេធមិនទៅជាមួយគេឡើយ ហើយក៏ប្រាប់ថាចូលចិត្តនៅម្នាក់ឯង ប៉ុន្តែដល់នៅម្នាក់ឯងបានមួយភ្លែតក៏មានអារម្មណ៍ថាឯកោ ហេលហាលខ្លាំងមែនទែន។ អាការនេះ ក៏អាចបង្ហាញថាអ្នកមានជំងឺ Philophobia ដែរ។
៣. មិនជឿជាក់លើមនុស្សប្រុសដែលចូលមក
អ្នកអាចនឹងចាប់ផ្ដើមបើកចិត្តសេពគប់បុរសណាម្នាក់ ប៉ុន្តែនៅពេលមានបញ្ហា ចង់ប្រឹក្សាអ្វីមួយ អ្នកបែរទៅសាកសួរ ឬនិយាយជាមួយមិត្តភ័ក្ដិស្រីៗច្រើនជាង។ បើទោះបីបុរសម្នាក់នោះល្អ ឬព្រមជួយអ្នកគ្រប់ពេលគ្រប់វេលាក្ដី ប៉ុន្តែក៏មិនអាចធ្វើឲ្យអ្នកជឿជាក់លើគេ និងនិយាយរឿងពិបាកចិត្តជាមួយគេបានឡើយ។
២. មិនទៅកន្លែងដែលសំបូរគូស្នេហ៍
នៅក្នុងថ្ងៃបុណ្យនៃសេចក្ដីស្រលាញ់ សម្រាប់មនុស្សស្រីធម្មតាដែលមិនមានជំងឺនេះ ពួកគេគ្រាន់តែមានអារម្មណ៍ធុញតិចតួច នៅពេលឃើញគូស្នេហ៍ដទៃគេស្រលាញ់គ្នា ឬអាចច្រណែនតិចតួច។ ប៉ុន្តែសម្រាប់មនុស្សស្រីដែលមានជំងឺខ្លាចស្នេហាវិញ នឹងមានអារម្មណ៍ថាចង់លាក់ខ្លួន មានអារម្មណ៍មិនសប្បាយចិត្ត មិនចង់ចេញទៅណា ហើយមិនចង់បើកមើលបណ្ដាញសង្គមអ្វីទាំងអស់ ព្រោះមិនចង់ឃើញគូស្នេហ៍ដទៃ។
១. អារម្មណ៍ដិតជាប់តែស្នេហាដែលបរាជ័យ
មនុស្សស្រីមួយចំនួនអាចនឹងធ្លាប់មានស្នេហាបរាជ័យ រហូតខ្លាចលែងចង់មានទៀត មានអារម្មណ៍ហត់នឿយដែលត្រូវលះបង់ មើលថែ អ្នកថ្មី ឬអ្នកខ្លះមានឪពុកម្ដាយលែងលះ ក៏ខ្លាចមិនចង់មានស្នេហាដែរ។ អារម្មណ៍ឆ្លងកាត់បរាជ័យស្នេហាទាំងនេះ បើសិនជាមនុស្សស្រីធម្មតា គេនឹងមានអារម្មណ៍ថាខ្លួនអាចចាប់ផ្ដើមថ្មីបាន គ្រាន់តែត្រូវរង់ចាំពេលវេលា។ ប៉ុន្តែសម្រាប់មនុស្សស្រីដែលមានជំងឺខ្លាចស្នេហា នឹងមានអារម្មណ៍ថាគ្មានផ្លូវចាប់ផ្ដើមជាថ្មីបានឡើយ ហើយក៏គ្មានសង្ឃឹមថាជួបមនុស្សល្អឡើយក្នុងជីវិតនេះ។
អ្នកមានសញ្ញាទាំងអស់នេះ គួរបើកចិត្តកែប្រែទម្លាប់ខ្លួនឯង ឬគួរពិភាក្សាជាមួយអ្នកជំនាញ ឬគ្រូពេទ្យផ្នែកចិត្តសាស្ត្រ បើសិនជានៅតែគ្មានការជឿជាក់លើខ្លួនឯង ៕
ចុចអាន៖
សញ្ញាទាំងនេះបង្ហាញថាប្រុសៗស្រលាញ់ខ្លាំង គ្រាន់តែខ្ជិលនិយាយចេញមកប៉ុណ្ណោះ!
សញ្ញាទាំង ៨ បង្ហាញពីការចង់ចាកចេញរបស់បុរស បើឃើញហើយឲ្យគេទៅចុះ