ចេនី៖ ស្អាតដើម្បីអ្នកដទៃ មិនមែនជាភាពស្អាតពិតប្រាកដទេ ត្រូវស្រលាញ់ភាពមិនឥតខ្ចោះរបស់ខ្លួន

2018-09-24 07:36:12
ចំនួនមតិ 0 | ចំនួនចែករំលែក 0

សម័យនេះទាល់តែរាងស្គម កម្ពស់ខ្ពស់ សាច់សផូរផង់បានគេហៅស្រីស្អាត។ រាងមិនស្អាតក៏ហីទៅចុះ តែបើកាលណាមានស្នាមនៅលើខ្លួនប្រាណទៀត នាងនឹងបាត់បងភាពជឿជាក់លើខ្លួនឯង ហើយព្យាយាមបិតបាំងវាកុំឱ្យអ្នកដទៃឃើញ ចៀសវាងត្រូវគេនិន្ទា។

ប៉ុន្តែថ្មីៗនេះ រូបថតមួយសន្លឹកបានបង្ហាញពីភាពស្រស់ស្អាតរបស់នារីសម័យថ្មី ទោះជានាងមិនមានភាពល្អឥតខ្ចោះទៅតាមស្ពង់ដារសម្រស់ដែលសង្គមបច្ចុប្បន្នឱ្យតម្លៃក៏ដោយ។ រូបថតនេះត្រូវបានគេចែករំលែកក្នុងបណ្ដាញសង្គមហ្វេសប៊ុក ដែលមានទាំងមតិគាំទ្រ និងកោតសរសើរពីភាពក្លាហាន និងភាពជឿជាក់របស់នាង ហើយក៏មានមតិមិនល្អមួយចំនួនទៅលើការមិនកែច្នៃលុបបំបាត់ស្នាមនៅលើដងខ្លួនម៉ូដែលនៅក្នុងរូបថតមួយនោះ។

រូបថតដោយ Pu Sam

រូបថតនេះម៉ូដែលដោយកញ្ញា មិន ចេនី ដែលក្នុងនោះកញ្ញាបានបញ្ជាក់ពីការពេញចិត្ត និងអរគុណទៅដល់អ្នកថតរូបដែលមិនបានធ្វើការកែច្នៃ ទៅលើស្នាមសង្វាររបស់កញ្ញា ហើយក៏បានផ្កាំផ្ញើទៅកាន់អ្នកដែលចែករំលែករូបកញ្ញាជាមួយនឹងមតិអវិជ្ជមានទាំងអស់ថា "វាប្រហែលជាគួរឱ្យខ្ពើមរអើម សម្រាប់អ្នកដែលមិនមានវា (សង្វារ) លើដងខ្លួនអ្នក តែចំពោះអ្នកដែលមានវា ខ្ញុំសង្ឃឹមថា អ្នកនឹងស្រលាញ់ភាពមិនល្អឥតខ្ចោះរបស់អ្នកដូចខ្ញុំដែរ។"

ចេនីបានប្រាប់មកកាន់វិបសាយ កញ្ញាបន្តថា "តាមបទពិសោធន៍ផ្ទាល់ខ្លួនរបស់ខ្ញុំ ស្អាតដើម្បីអ្នកដទៃមិនបានធ្វើឱ្យខ្ញុំមានអារម្មណ៍ល្អទេ ប៉ុន្តែខ្ញុំមានអារម្មណ៍ល្អ នៅពេលដែលខ្ញុំពេញចិត្តចំពោះស្បែកនឹងស្នាមរបស់ខ្ញុំ។ នារីទាំងឡាយគួរតែបង្ហាញខ្លួនឯងតាមអ្វីដែលអ្នកមាន ហើយស្រឡាញ់ពេញចិត្តចំពោះភាពមិនល្អឥតខ្ចោះដែលអ្នកមានទាំងអស់ ពីព្រោះថាយើងរស់នៅដើម្បីខ្លួនឯង មិនមែនដើម្បីតម្រូវចិត្តអ្នកណានោះឡើយ។"

គួរបញ្ជាក់ផងដែរ សង្វារជាស្នាមដែលបណ្ដាលមកពីការប្រែប្រួលភ្លាមៗដែលធ្វើឱ្យស្បែកយារ មិនសំដៅតែលើការមានផ្ទៃពោះម្យ៉ាងនោះទេ ក្នុងនោះការឆាប់ពេញវ័យ ឬក៏ការឡើងចុះទម្ងន់ភ្លាមៗក្នុងរយៈពេលខ្លីក៏អាចបណ្ដាលឱ្យកើតសង្វារផងដែរ។ សង្វារមិនមានគ្រោះថ្នាក់ដល់សុខភាពនោះទេ ហើយការព្យាបាលវាភាគច្រើនគឺសម្រាប់លើកសម្រស់អ្នកដែលមានវាតែប៉ុណ្ណោះ៕