កុំបាច់ឆ្ងល់ថាចាស់ហើយរកសង្សារមិនបាន បើនៅមាន៧ចំណុចនេះក្នុងខ្លួន

2018-09-23 07:00:56
ចំនួនមតិ 0 | ចំនួនចែករំលែក 0

មិនថាសម្លឹងមើលទៅខាងណា អ្នកនឹងឃើញតែគ្រប់គ្នាដែលអាយុស្របាលៗអ្នកមានគូអស់រលីង រហូតពេលខ្លះក៏មានអារម្មណ៍ហេលហាលនឹកឆ្ងល់ថាហេតុអ្វីខ្លួនឯងនៅតែគ្មានសង្សារ ទាំងមុខមាត់ អត្តចរិត និស្ស័យក៏ហាក់មិនមែនជាបញ្ហា។ បើចង់ដឹងថាមូលហេតុយ៉ាងណានោះ សូមតាមដានជាមួយ កញ្ញា ដូចតទៅ៖

១. កំណត់ស្តង់ដារខ្ពស់ខ្លាំងពេក

ការដែលអ្នកនៅតែគ្មានស្នេហាអាចបណ្ដាលមកពីអ្នកដាក់ការរំពឹងទុកខ្ពស់ខ្លាំងពេករហូតមិនចង់បើកចិត្ត ឬផ្ដល់ឱកាសដល់អ្នកមកចែចង់ ដែលគ្មានគុណសម្បត្តិត្រូវ ឬស្រដៀងនឹងស្ដង់ដារដែលអ្នកកំណត់ទុក។ វាមិនខុសទេដែលអ្នកមានលក្ខខណ្ឌសម្រាប់ខ្លួនឯង ប៉ុន្តែលក្ខខណ្ឌទាំងនោះគួរតែសមហេតុសមផល។

២. មើលអ្នកដទៃក្នុងផ្លូវអវិជ្ជមានខ្លាំងពេក

ការសម្លឹងមើលអ្នកដទៃក្នុងផ្លូវអវិជ្ជមានខ្លាំងពេកក៏មិនមែនជារឿងប្លែកដែរដែលធ្វើឲ្យអ្នកនៅលីវយូររហូតមកដល់សព្វថ្ងៃនេះ។ បើមើលតែមួយជ្រុង ការមិនងាយទុកចិត្តអ្នកដទៃក៏មិនល្អដែរ ព្រោះយើងនឹងអាចប្រុងប្រយ័ត្ននៅពេលទាក់ទងជាមួយនរណាម្នាក់ ប៉ុន្តែនៅពេលអ្នកសម្លឹងរកមើលតែចំណុចមិនល្អរបស់គេខ្លាំងពេក វានឹងអាចឲ្យអ្នកបាត់បង់ឱកាសស្គាល់មនុស្សល្អៗបាន។

៣. ភ្លេចអ្នកចាស់មិនបាន

ការដែលអ្នកមិនអាចចាប់ផ្ដើមជាថ្មីជាមួយនរណាម្នាក់ អាចដោយសារអ្នកនៅតែភ្លេចសង្សារចាស់មិនបាន ដោយអ្នកតែងយកគេមកប្រៀបធៀបជាមួយអ្នកថ្មីដែលព្យាយាមចូលមកក្នុងជីវិតអ្នក ហើយទីបំផុតអ្នកក៏គិតថាគ្មាននរណាល្អស្មើសង្សារចាស់ទេ ទាំងសង្សារចាស់អ្នកពេលនេះសង្ស័យមានអ្នកថ្មី រៀបការមានកូនបាត់ទៅហើយ។

៤. មិនទាន់ដល់គូ

ពេលខ្លះពិបាកដែរ ទោះបីអ្នកសាកល្បងសេពគប់ ឬណាត់ជួបមនុស្សជាច្រើននាក់ហើយក៏ដោយក៏អាចមិនទាន់ជួបមនុស្សដែលមាននិស្ស័យ។ ពេលខ្លះការគិតមិនដូចគ្នា ចំណូលចិត្តមិនដូចគ្នា ធ្វើឲ្យអ្នកពិបាកទាក់ទងជាមួយនរណាម្នាក់ឲ្យពិតប្រាកដ។

៥. ស្ថិតនៅកន្លែងដែលមិនទំនងរកគូឃើញ

ការជួបមនុស្សដែលត្រូវចិត្តក្រៅពីត្រូវអាស្រ័យលើពេលវេលាសក្ដិសមហើយ ទីកន្លែងក៏ជាចំណុចសំខាន់ដែរ ព្រោះបើអ្នកសម្ងំនៅតែក្នុងផ្ទះ ឬធ្វើការនៅកន្លែងដែលមានតែមនុស្សស្រី ក៏ធ្វើឲ្យឱកាសដែលអ្នកអាចជួបបុរសត្រូវចិត្តមានកាន់តែតិច។

៦. វីវក់តែនឹងការងារ

សម្រាប់អ្នកដែលមានមុខតំណែងការងារធំដុំហើយ រួមទាំងមានប្រាក់កាសចាយគ្រប់គ្រាន់ទៀតនោះ ពួកគេអាចគិតថាមិនត្រូវការអ្វីទៀតឡើយក្នុងជីវិតនេះ ព្រោះអ្វីដែលខ្លួនកំពុងមានអាចផ្ដល់សេចក្ដីសុខគ្រប់គ្រាន់ទៅហើយ ហើយអ្នកខ្លះទៀតក៏រវល់រហូតលែងមានពេលគិតរឿងស្នេហា។

៧. មានក្ដីសុខនឹងជីវិតស្រាប់ទៅហើយ

ការដែលអ្នកមានគ្រួសារកក់ក្ដៅ រួមទាំងមានមិត្តភ័ក្ដិល្អៗ ក៏អាចធ្វើឲ្យអ្នកមានអារម្មណ៍លែងខ្វល់ខ្វាយពីស្នេហារវាងបុរសនិងនារី ព្រោះត្រឹមតែទទួលបានក្ដីស្រឡាញ់ពីមនុស្សទាំងអស់នេះ អ្នកក៏អាចមានអារម្មណ៍ថាមានក្ដីសុខជាមួយជីវិតខ្លួនឯងបាត់ទៅហើយ ៕

ប្រភព៖ Orami ប្រែសម្រួល៖ ស្វាយ វ៉ាន់ថន