ហេតុអ្វីស្នេហាក្នុងសម័យទំនើបងាយនឹងប្រេះឆាម្ល៉េះ?
- 2018-09-20 09:58:48
- ចំនួនមតិ 0 | ចំនួនចែករំលែក 0
ហេតុអ្វីស្នេហាក្នុងសម័យទំនើបងាយនឹងប្រេះឆាម្ល៉េះ?
ហេតុអ្វីស្នេហាក្នុងសម័យទំនើបងាយនឹងប្រេះឆាម្ល៉េះ? ហេតុអ្វីមនុស្សសព្វថ្ងៃ ភាគច្រើនងាយនឹងលង់ស្រលាញ់ ប៉ុន្តែមិនចេះថែរក្សា? ហេតុអ្វីចាំបាច់ធ្វើខ្លួនដូចជាយ៉ាប់យ៉ឺនខ្លាំងម្ល៉េះ គ្រាន់តែថែរក្សាស្នេហាឲ្យបានគង់វង្សសោះ? ដោយសារតែមិនដឹងថា ត្រូវធ្វើរបៀបណា ឬមួយក៏ភ្លេចថាស្នេហាគឺជាអ្វី?
ហេតុផលមានច្រើនយ៉ាងណាស់ អ្នកអាចនឹងខ្វះការរៀបចំយកចិត្តទុកដាក់ ខ្វះការលះបង់ឲ្យគ្នាទៅវិញទៅមក មិនអាចសម្របសម្រួលពេលនៅជាមួយគ្នា។ អ្នកមានគំនិតរាក់ពេកចំពោះស្នេហា គិតថាវាងាយស្រួលគ្មានអ្វីពិបាក ប៉ុន្តែដល់ពេលជួបឧបសគ្គ បែរជាសម្រេចចិត្តចង់បោះបង់ចោលកណ្តាលទី មិនចេះប្រឈមឬព្យាយាមរកវិធីល្អដើម្បីដោះស្រាយទេ។ អ្នកមិនអាចធ្វើឲ្យស្នេហារីកលូតលាស់ទៅមុខបាន ថែមទាំងបណ្តោយឲ្យវាក្រៀមស្វិត ស្លាប់មុនអាយុកាលទៅទៀត។
នេះមិនមែនហៅថាស្នេហាទេ គ្រាន់តែជាអារម្មណ៍ដែលអ្នកមានលើគ្នាមួយឆាវ ដើម្បីកែភាពឯកា មានមនុស្សកំដរ នៅពេលអ្នកទំនេរអផ្សុកប៉ុណ្ណោះ ប៉ុន្តែបើឲ្យយល់ចិត្តគ្នាច្បាស់ជ្រាលជ្រៅនោះគឺគ្មានទេ។ បើអ្នកមានទំនាក់ទំនងជាមួយនរណាម្នាក់ ដើម្បីបំបាត់ទុក្ខ ដើម្បីជំនួសអ្វីមួយ ឬក្នុងហេតុផលណាផ្សេងក្រៅពីក្តីស្រលាញ់ ទោះបីជាចំណាយពេលនៅជាមួយគ្នាច្រើនយ៉ាងណា ក៏គ្មានការចងចាំនិងមនោសញ្ចេតនាអីដែរ ជាមូលហេតុធ្វើឲ្យស្នេហាផុយមិនរឹងមាំ។
មនុស្សខ្លះវិញ ងប់ងុលនឹងទឹកប្រាក់ យសស័ក្ដិ សម្ភារនិយម ហើយគ្មានពេលសម្រាប់ស្នេហាពិតឡើយ មានតែពេលសម្រាប់ស្វែងរកអ្នកណាដែលអាចបំពេញតម្រូវការរបស់ខ្លួនបាន។ ឯអ្នកខ្លះទៀត រវល់ខ្វល់ខ្វាយតែពីរឿងការងារ ការប្រកួតប្រជែងគ្នា ភាពជោគជ័យ រវល់រហូតមិនអាចបែងចែកពេលវេលាសម្រាប់មនុស្សសំខាន់នៅក្បែរខ្លួន។
អ្នកបានណាត់ជួបមនុស្សជាច្រើន ប៉ុន្តែមិនបានតាំងចិត្ត ថាចង់រស់នៅជាមួយគ្នាអស់មួយជីវិត ព្រោះអ្នកគ្មានទំនុកចិត្តចំពោះស្នេហា។ នេះមិនមែនជាកំហុសរបស់អ្នកទាំងស្រុងទេ ព្រោះពេលខ្លះអ្នកធ្លាប់ជួបរឿងឈឺចាប់ច្រើនរាប់មិនអស់ ទើបធ្វើឲ្យបាត់បង់ជំនឿចិត្ត ខ្វះភាពតស៊ូ ដើម្បីកាន់ដៃបន្តដំណើរទៅមុខជាមួយគ្នា។
យ៉ាងណាគួរកុំអស់សង្ឃឹមអី បើជួបមនុស្សល្អ ពេញចិត្តហើយ ត្រូវចេះបើកឱកាស រៀនសង្កេតពីគ្នា ប្រើក្តីស្រលាញ់ដែលខ្លួនមានចេញពីបេះដូងពិត។ កាលណាអ្នកមានការតាំងចិត្តខ្ពស់មុះមុត ស្នេហាក៏រឹងមាំទៅតាមហ្នឹងដែរ ដោយមិនប្រកាន់ថាសម័យកាលណាឡើយ ៕
ចុចអានបន្ត៖