ទម្លាប់ចាយវាយអាក្រក់ៗគួរបោះបង់មុនអាយុ៣០ បើមិនចង់ដាច់បាយរាល់ចុងខែ
- 2018-09-15 05:13:00
- ចំនួនមតិ 0 | ចំនួនចែករំលែក 0
ទម្លាប់ចាយវាយអាក្រក់ៗគួរបោះបង់មុនអាយុ៣០ បើមិនចង់ដាច់បាយរាល់ចុងខែ
៣០ឆ្នាំគឺជាវ័យដែលមិនសប្បាយសម្រាប់មនុស្សភាគច្រើន ត្បិតវាលែងជាអាយុដែលយើងអាចរស់មួយថ្ងៃគិតមួយថ្ងៃទៀតហើយ តែតម្រូវឲ្យត្រូវគិតវែងឆ្ងាយ។ ដើម្បីឲ្យជីវិតនៅពេលវ័យ៣០បានសុខដុមរមនា ត្រូវបោះបង់ទម្លាប់ចាយវាយដូចខាងក្រោមនេះកាន់តែឆាប់ កាន់តែល្អ។
១. ទិញអីវ៉ាន់រំដោះទុក្ខ
តាមការពិសោធន៍របស់អ្នកវិទ្យាសាស្ត្រ ការទិញទំនិញពិតជាជួយឲ្យអារម្មណ៍មនុស្សស្រស់ស្រាយជាងមុនមែន ជាពិសេសពេលពិបាកចិត្ត។ យ៉ាងណាក្ដី ទម្លាប់នេះក៏ធ្វើឲ្យគណនីធនាគាររបស់លោកអ្នកស្រែកក្ដែងៗនៅចុងខែផងដែរ ព្រោះវាគ្មានសេសសល់អ្វី ក្រោយអ្នករំដោះទុក្ខឡើយ។
២. គិតថាបណ្ណឥណទានថាជាលុយរបស់ខ្លួន
បណ្ណឥណទានរបស់ធនាគារអាចឲ្យយើងប្រើលុយសិន រួចចាំសងលុយក្រោយរហូតដល់រាប់ម៉ឺនដុល្លារ។ អ្នកខ្លះសប្បាយឆូតកាតពេក មិនដឹងថាខ្លួនកំពុងប្រើកាតទាំងលុយខ្លួនកំពុងអវិជ្ជមានឡើយ។ ដល់ពេលចាយហើយ ត្រូវរកលុយសងគេវិញរាប់ខែ ឬរាប់ឆ្នាំមិនទាន់អស់ផង។
៣. ដើរលេងមិនឡើងគម្រោងមុន
ទោះដឹងថា បើដើរលេងគិតលុយច្រើនពេក ពិតជាមិនសូវសប្បាយឡើយ តែបើអ្នកគ្មានគម្រោងច្បាស់លាស់ទេ នោះពេលមកវិញប្រាកដជាហូបសៀងមិនខាន។ ដូចនេះ មុនពេលសម្រេចចិត្តចេញដំណើរ គួររៀបគម្រោងឲ្យបានលម្អិត។
៤. ទិញទំនិញរាយច្រើនពេក
ច្បាស់ណាស់នៅពេលយើងទិញទំនិញរាយ នឹងត្រូវចាយលុយតិចជាពេលយើងទិញដុំ យ៉ាងណាក្ដី បើយើងទិញរាយច្រើនដង ជំនួសឲ្យការដុំតែម្ដង យើងនឹងត្រូវចាយលុយច្រើនណាស់។ ដូចនេះ គួរប្ដូរទម្លាប់ទិញរាយទំនិញដែលត្រូវប្រើប្រចាំថ្ងៃ មកទិញដុំវិញ ដូចជាក្រដាសអនាម័យ ថ្នាំដុះធ្មេញ និងសាប៊ូកក់សក់ជាដើម។
ចុចអាន៖ ស្រីៗចូលចិត្តដើរផ្សារ មានជំងឺចង់ចាយលុយ?
៥. មិនហ៊ានតថ្លៃ
លើកលែងតែផ្សារទំនើបដែលមានបិទតម្លៃស្រាប់ ក្រៅពីនោះគឺអ្នកអាចតថ្លៃបានទាំងអស់ តាំងពីទិញខោអាវ រហូតដល់បន្លែ ត្រី សាច់។ គ្មានអ្វីគួរឲ្យខ្មាសអៀននោះឡើយ ព្រោះបើត្រូវថ្លៃគ្នាទើបលក់ យើងមិនបានបង្ខំគេឲ្យលក់ទាំងខាតនោះឡើយ។
៦. ផឹកស្រា ជក់បារី ញ៉ាំម្ហូបស្រាប់
ការស្រង់មតិមួយរបស់អាមេរិកបានបង្ហាញឲ្យឃើញថា ក្នុងមួយឆ្នាំៗ សម្រាប់អ្នកដែលឧស្សាហ៍ផឹកស្រា ជក់បារី និងញាំម្ហូបខាងក្រៅ គឺត្រូវចំណាយលើសអ្នកមិនផឹកស្រា ជក់បារី និងញ៉ាំនៅផ្ទះដល់ទៅ៥ពាន់ដុល្លារ។ ដូចនេះបើអ្នកចង់សន្សំបានលុយប៉ុននេះ ក្នុងមួយឆ្នាំ គឺត្រូវតែចោលទម្លាប់នេះ៕