មុខគ្មានស្នាមជ្រីវជ្រួញ ដោយវិធីម៉ាស្សាមុនពេលចូលគេងងាយៗ

2018-09-14 09:34:06
ចំនួនមតិ 0 | ចំនួនចែករំលែក 0

ការម៉ាស្សាមុខមុនពេលចូលគេងពិតជាមានអត្ថប្រយោជន៍ ជាងការលាបឡេនិងការចាប់ Botox ទៅទៀត ព្រោះវាសម្រួលឲ្យឈាមដើរស្រួល ជួយឲ្យស្បែកមុខភ្លឺ តឹងណែន មិនងាយលេចចេញស្នាមជ្រីវជ្រួញ។ ខាងក្រោមនេះ ជាវិធីម៉ាស្សាដ៏ត្រឹមត្រូវនិងងាយៗបំផុត ដែលអ្នកអាចអនុវត្តបាននៅផ្ទះ រៀងរាល់យប់មុនពេលចូលគេង។

ជំហានទី១

មុនពេលចាប់ផ្តើមម៉ាស្សា ត្រូវលាងសម្អាតមុខឲ្យបានស្អាតល្អ ជាមួយទឹកក្ដៅឧណ្ណៗ ឬហ្វូមលាងមុខ។ បន្ទាប់មកចាក់គ្រីមឬប្រេងលាបមុខនៅលើដៃ ហើយត្រូវយកម្រាមដៃមកអូសដូចជារូបដែលបានបង្ហាញខាងលើ។

ជំហានទី២

យកម្រាមចង្អុលនិងម្រាមកណ្តាល មកសង្កត់ញីថ្នមៗ នៅផ្នែកក្រោមភ្នែក និងផ្នែកសងខាងនៃចុងច្រមុះ។ ធ្វើបែបនេះពី១០-១៥ដង មិនត្រូវសង្កត់ខ្លាំងពេក។

ជំហានទី៣

ដាក់ម្រាមដៃឲ្យមានរាងកោងបន្តិច បន្ទាប់មកត្រូវអូសពីថ្ពាល់ចេញទៅខាងក្រៅត្រង់សៀតផ្កា ប្រមាណ៣នាទី។

ជំហានទី៤

ផ្គុំម្រាមដៃ អូសពីត្រង់ចង្កា ដល់គុម្ពត្រចៀក ឲ្យ១០-១៥ដង។ ការម៉ាស្សាបែបនេះ អាចជួយបំបាត់បឿក និងធ្វើឲ្យមុខស្លីម។

ជំហានទី៥

ក្តាប់ម្រាមដៃ ហើយម៉ាស្សាជារង្វង់ថ្នមៗនៅត្រង់ថ្គាម ធ្វើជាប់រហូតឲ្យបាន៣០វិនាទីសឹមឈប់ ដើម្បីជួយបណ្តុះកោសិកាថ្មី ស្បែកភ្លឺបែបស៊ីជម្ពូ។

ជំហានទី៦

ជំហានចុងក្រោយគេ គឺត្រូវលាម្រាមដៃទាំងពីរឲ្យអស់ ហើយអូសពីលើមុខចុះរហូតមកដល់ក ឲ្យបានពី១០-១៥ដង។ វាជាដំណាក់កាលសំខាន់ អាចជួយបណ្តេញជាតិពុល ឈាមដំណើរការល្អ និងធ្វើឲ្យអារម្មណ៍ធូរស្រាល។

ប្រសិនបើមិត្តៗនារីចង់ឲ្យស្បែកមុខស្អាត ក្មេងជាងវ័យ គ្មានស្នាមជ្រួញ អាចឆ្លៀតពេលត្រឹម៥-១០នាទីប៉ុណ្ណោះក្នុងមួយថ្ងៃ ដើម្បីសម្រស់ដ៏ស្រស់ស្អាតរបស់ខ្លួន កុំចាំតែបណ្តោយឲ្យហួសពេលកែលែងឡើង ទើបខំប្រឹង។